Tuesday, 17 November 2026
Advertisement
MWSC — SmartMeter (leaderboard)
ސިޔާސީ

ނޮވެމްބަރު 3 ގެ މައުލޫމާތު ދީފައިވާއިރު ސިއްކަ ބަދުނާމު ކުރުމަކީ ކުރެވޭ ބޭއިންސާފެއް: ނަޝީދު

ނޮވެމްބަރު 3 ގެ މައުލޫމާތު  ދީފައިވާއިރު ސިއްކަ ބަދުނާމު ކުރުމަކީ ކުރެވޭ ބޭއިންސާފެއް: ނަޝީދު
މީގެ 36 އަހަރުކުރިން 1988 ވަނަ އަހަރުގެ ނޮވެމްބަރު މަހުގެ ތިން ވަނަ ދުވަހު ރާއްޖެއަށް ދިން އުދުވާނީ ހަމަލާ އާ ގުޅޭ މައުލޫމާތު އަހުމަދު އިސްމާއިލް (ބޮޑު ސިއްކަ) އަށް އެނގިހުރި މިންވަރަށް އޭރު ވެރިކަމުގައި ހުންނެވި ކުރީގެ ރައީސް މައުމޫން އަބްދުލްގައްޔޫމާ ހިއްސާކޮށްފައިވާއިރު، އެކަމާ ގުޅިގެން ސިއްކަ  އާއި އާއިލާ ބަދުނާމު ކުރަމުން ގެންދިއުމަކީ ކުރެވޭ ބޭއިންސާފެއް ކަމުގައި ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ. ބޮޑު ސިއްކައަށް ކުރި ތުހުމަތަކީ ތަމަޅައިންގެ ބަޔަކާ ގުޅިގެން ބަޑި ހިފައިގެން މާލެ އަރައި ދިން އެ ހަމަލާގައި ބައިވެރިވެފައިވާ ކަމުގެ ތުހުމަތެވެ. ތުހުމަތާ ގުޅިގެން އޭނާގެ މައްޗަށް ހުކުމެއް ވެސް ކުރި އެވެ. އެހެންނަމަވެސް މައުމޫން ވަނީ ފަހުން ސިއްކައަށް މާފު ދީފަ އެވެ. ރާއްޖޭގެ ސިޔާސީ މައިދާން ހަލަބޮލި ވުމާ އެކު 2000 ވަނަ އަހަރުގެ ތެރޭގައި އޭނާ ވަނީ ސްރީލަންކާއަށް ދިރިއުޅުން ބަދަލުކޮށްފަ އެވެ. ބޮޑު ސިއްކައަކީ ކުރީގެ ރައީސް އިބްރާހިމް މުހައްމަދު ސޯލިހުގެ އަނބިކަނބަލުން ފަޒުނާ އަހުމަދުގެ ބައްޕަ އެވެ. އަދި އެއީ ނަޝީދާ އާއިލީ ގޮތުން ގުޅުން އޮންނަ މީހެކެވެ. ނަޝީދުގެ ނުރަސްމީ "އެކްސް" އެކައުންޓް، "އަނެއްދިވެހިރާއްޖެ" އިން ރޭ ކުރެއްވި ޕޯސްޓެއްގައި ވިދާޅުވީ ނޮވެމްބަރު ތިނަކާ ގުޅޭގޮތުން ސިއްކައަށް އެނގިހުރި މިންވަރަށް އެނގި ތިބި ކިތަންމެ ބައެއް އެބަތިބި ކަމަށެވެ. އަޑުއައްސަވާފައިވާ ގޮތުގައި ސިއްކަ އޮތީ މައުމޫން އަރިހުގައި އޭނާއަށް އިނގޭ މިންވަރު މާކުރިން ދަންނަވާފައި ކަމަށެވެ.
"ސިއްކަ އަނދަގޮނޑި ޖަހައި، ޗޭނު ޖަހައި، އަނިޔާކޮށް، ރައީސް މައުމޫން އެދިވަޑައިންނަވާ ގޮތަށް ބަޔާން ނެގި ކަމުގައި ވިޔަސް އެއީ ކަން ހިނގާ ދިޔަ ގޮތް ކަމަށް މިއަދު ދެކޭ ނަމަ އެއީ ވަރަށް ބޮޑު ދެރައެއް،" ނަޝީދު ވިދާޅުވި އެވެ.
ނަސްރުގެ ދުވަހާ ގުޅިގެން ކޮންމެ އަހަރަކު ވެސް ބޮޑު ސިއްކައަށް ތުހުމަތުކޮށް ތަފާތު އެކި ވާހަކަތައް ދައުރުވެ އެވެ. ނަމަވެސް ސޯޝަލް މީޑިއާގައި ފެތުރޭ ވާހަކަތައް އޭނާގެ އާއިލާއިން ދޮގުކުރެ އެވެ. އެ ވާހަކަތަކަށް ރައްދުދެއްވާ ނަޝީދުގެ ޕޯސްޓުގައި ވަނީ ކޮންމެ ނޮވެމްބަރު ތިނެއްގައި މައުމޫނަށް ސަނާކިޔާ އަދި ސިއްކަ އާއި އޭނާގެ އާއިލާ ބަދުނާމު ކުރަމުންގެންދާ ގެންދިއުމަކީ ކުރެވޭ ވަރަށް ބޮޑު ބޭއިންސާފެއް ކަމުގަ އެވެ.

ރިއެކްޝަން

Advertisement
Allied Insurance — Square (box)

ކޮމެންޓް

މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.