ޔުނިވާސަލް ޕީރިއަޑިކް ރިވިއުގެ 47 ވަނަ ސެޝަންގައި ރާއްޖެއިން ބައިވެރިވަނީ

ޔުނިވާސަލް ޕީރިއަޑިކް ރިވިއުގެ47 ވަނަ ސެޝަންގައި ދިވެހިރާއްޖެއިން ބައިވެރިވެފައިވާ ކަމަށް ފޮރިން މިނިސްޓްރީން ބުނެފި އެވެ.

Ads by MWSC

ޔުނިވާސަލް ޕީރިއަޑިކް ރިވިއުގެ 47 ވަނަ ސެޝަން ފަށާފައިވަނީ ސްވިޒަލޭންޑްގެ ޖެނީވާގައި ހުންނަ އދގެ އޮފީހުގަ އެވެ.

ފޮރިން މިނިސްޓްރީން ބުނީ މިއަދުން ފެށިގެން މި މަހުގެ 15 ވަނަ ދުވަހާ ހަމައަށް ކުރިއަށްދާ މި ސެޝަންގައި 14 ގައުމެއްގައި އިންސާނީ ހައްގުތައް ނަގަހައްޓާ މިންވަރު ވަޒަންކުރުމަށް ހަމަޖެހިފައިވާ ކަމަށެވެ.

އިންސާނީ ހައްގުތައް ނަގަހައްޓާ މިންވަރު ވަޒަންކުރާ 14 ގައުމު:

1. އަލްބޭނިއާ
2. ބޫޓާން
3. ބްރުނާއި ދާރުއްސަލާމް
4. ޑިމޮކްރެޓިކް ރިޕަބްލިކް އޮފް ދަ ކޮންގޯ
5. ކޮސްޓަ ރީކާ
6. ކޮޓް ޑިވުއާ
7. ޑޮމިނިކާ
8. އިކުއިޓޯރިއަލް ގިނީ
9. އިތިއޯޕިއާ
10. ޑިމޮކްރެޓިކް ޕީޕަލްސް ރިޕަބްލިކް އޮފް ކޮރެއާ
11. ނިކަރާގުއާ
12. ނޯވޭ
13. ޕޯޗުގަލް
14. ގަތަރު

ފޮރިން މިނިސްޓްރީން ބުނީ ޔުނިވާސަލް ޕީރިއަޑިކް ރިވިއުއަކީ މެމްބަރު ގައުމުތަކުގައި އިންސާނީ ހައްގުތަކުގެ ހާލަތު ވަޒަންކޮށް ދެނެގަތުމަށް އެ ޖަމިއްޔާއިން ކަނޑައަޅާފައިވާ ނިޒާމެއް ކަމަށެވެ.

އަދި އެ ނިޒާމު ގާއިމުކޮށްފައިވަނީ އިންސާނީ ހައްގުތަކާ ބެހޭ އިލްތިޒާމުތައް އުފުލުމުގައި މެންބަރު ގައުމުތަކުން އިތުރަށް ރަނގަޅުކުރަން ފެންނަ ކަންކަން ހުށަހަޅައި، އެ ގައުމުތަކުން ކުރަމުން އަންނަ މަސައްކަތް އަގުވަޒަންކުރެވޭނެ ފަދަ ގޮތަކަށް ކަމަށް މިނިސްޓްރީން ބުންޏެވެ.

އިންސާނީ ހައްގުތަކުގެ ހާލަތު ރަނގަޅުކުރުމަށާއި، އިންސާނީ ހައްގުތައް ކަށަވަރުކުރުމުގައި މެންބަރު ގައުމުތަކުން ހޯދާފައިވާ ކުރިއެރުން އ.ދ ގެ އިންސާނީ ހައްގުތަކާ ބެހޭ ކައުންސިލަށް ހުށަހެޅުމުގެ ފުރުސަތު ޔޫޕީއާރު މެދުވެރިކޮށް މި ގައުމުތަކަށް ލިބޭނެ ކަމަށްވެސް ފޮރިން މިނިސްޓްރީން ބުންޏެވެ.

ޔޫޕީއާރު ވޯކިން ގްރޫޕްގެ ބައްދަލުވުންތަކުގައި ކަނޑައެޅިފައިވާ ކޮންމެ ގައުމެއްގެ އިންސާނީ ހައްގުތަކުގެ ހާލަތު ވަޒަންކުރުމަށް އެހީތެރިވުމުގެ ގޮތުން އދގެ އިންސާނީ ހައްގުތަކާ ބެހޭ ކައުންސިލްގެ ތިން މެމްބަރުން "ޓްރޮއިކާ" ގެ ގޮތުގައި ހަރަކާތްތެރިވާއިރު، މިފަހަރުގެ އދގެ އިންސާނީ ހައްގުތަކާ ބެހޭ ކައުންސިލްގެ މެންބަރެއްގެ ހައިސިއްޔަތުން މެންބަރުކަން ކުރާނީ ރާއްޖެއިން ކަމަށް ފޮރިން މިނިސްޓްރީން ބުންޏެވެ.