އެޑިއުކޭޝަން މިނިސްޓްރީން ކޮންޓްރެކްޓަރުންނަށް ނުދެވި 32 މިލިއަން
އެޑިއުކޭޝަން މިނިސްޓްރީން ކޮންސްޓްރަކްޝަނާއި އެހެނިހެން މަސައްކަތް ކުރުވުމަށް ފަހު، ކޮންޓްރެކްޓަރުންނަށް ނުދެވި ހުރި ފައިސާގެ އަދަދު ޖުމުލަ 32 މިލިއަނަށް އަރާ ކަމަށާއި، މި އަހަރު ނިމުމުގެ ކުރިން އެ ފައިސާ ދައްކާ ހަލާސް ކުރެވޭނެ ކަމަށް އެޑިއުކޭޝަން މިނިސްޓަރު ޑރ. އިސްމާއީލް ޝަފީއު މިއަދު ވިދާޅުވެއްޖެ އެވެ.
ޝަފީއު އެހެން ވިދާޅުވީ، ގަލޮޅު އުތުުރު ދާއިރާގެ މެންބަރު މުހައްމަދު އިބްރާހީމް (ކުޑޫ) ކުރައްވާ ސުވާލަކަށް ޖަވާބުދެއްވުމަށް މަޖިލީހަށް ހާޒިރުވެވަޑައިގެން، ބާރަށު ދާއިރާގެ ޕީއެންސީ މެންބަރު އިބްރާހިމް ޝުޖާއު ކުރެއްވި ސުވާލަކަށް ޖަވާބު ދެއްވަމުންނެވެ.
"މިނިސްޓްރީ އޮފް އެޑިއުކޭޝަންގައި ކޮންސްޓްރަކްޝަން ދާއިރާގެ ބޭފުޅުންނާއި، އެހެނިހެން ދާއިރާތަކުގެ ބޭފުޅުންއެއްކޮށް ރުފިޔާ ދޭން ޖެހޭ ފަރާތްތަކަށް މިހާރު ފައިސާ ނުދެވިފައިވަނީ ގާތްގަނޑަކަށް 32 މިލިއަން ރުފިޔާ. އެއީ ކުރީގައި އޮތް އަދަދާއި ބަލާއިރު، ވަރަށް ކުޑަ އަދަދެއް. އިރާދަ ކުރެއްވިއްޔާ މި އަހަރު ނިމުމުގެ ކުރިން އަޅުގަނޑު މެންނަށް އެ އަދަދު ދައްކާ ހަލާސް ކުރެވޭނެ،" ޝަފީއު ވިދާޅުވި އެވެ.
އެޑިއުކޭޝަން ދާއިރާގެ ޕްރޮޖެކްޓްތައް ލަސްވަމުންދާތީ އެކަން ހައްލުކުރުމަށް ކުރަމުންދާ މަަސައްކަތާއި ގުޅިގެން ތިނަދޫ އުތުރު ދާއިރާގެ ޕީއެންސީ މެންބަރު ސައުދުﷲ ހިލްމީ ވެސް ސުވާލު ކުރެއްވި އެވެ. އެ ސުވާލަަށް ޖަވާބު ދެއްވަމުން މިނިސްޓަރ ޝަފީއު ވިދާޅުވީ، ޕްރޮޖެކްޓަތައް ލަސްވެގެން ދިއުމުގައި އެކި ސަބަބުތައް އެބަހުރި ކަމަށެވެ.
އޭގެ ތެރެއިން، ފައިސާގެ މުއާމަލާތް ލަސްވެގެން ދިއުމާއި، ކުރެހުން ފާސްކުރެވިފައި އޮންނައިރު މުހިންމު ބައިތައް ނުހިމަނާ ފާސްކޮށްފައިވުމާއި، ސްކޫލްތަކުން ބޭނުންވެގެން ގެންނަ ބަދަލުތައް ފާސްކުރުމަށް ވެސް ޕްރޮޖެކްޓް ޑިލޭ ވެގެންދާކަން ފާހަގަކުރެއްވި އެވެ.
އެއިން ކޮންމެ ބަދަލަކީ ފިނޭންސް މިނިސްޓްރީއަށް ހުށަހަޅާ އެ މިނިސްޓްރީގެ އެޕްރޫވަލް ހޯދަން ޖެހޭ ކަމެއްކަމަށް ވިދާޅުވި އެވެ. އަދި އެ އެޕްރޫވަލްތައް ނުހޯދާ މަސައްކަތް ކުރާނަމަ، "ލަނޑު" ލިބިފައި ވެސް އެބަހުރިކަން ފާހަގަކުރެއްވި އެވެ.
އެގޮތުން ދިމާވި ކަމެއް ހިއްސާކުރައްވާ ޝަފީއު ވިދާޅުވީ، ސްކޫލެއްގެ ކޮންޓްރެކްޓަރަކަށް ލިބެންޖެހޭ ފައިސާ ހޯދަން އައި އިރު މިނިސްޓްރީގައި އެއްވެސް ލިޔެކިޔުމެއް ނެތް ކަމަށެވެ.
"މާލޭގެ ވަރަށް ބޮޑު ސްކޫލެއްގެ ކޮންޓްރެކްޓަރެއް އަޅުގަނޑުމެންނާއި ހިސާބަށް އައި. ވިދާޅުވި ތިމަންނާމެންނަށް 16 މިލިއަން ރުފިޔާ މިނިސްޓްރީއިން ދޭން އެބަ ޖެހެއޭ. އެ ދޭން އެއްބަސް ވެގެންނޭ މަސައްްކަތް ކުރީ. އެހެން ނަމަވެސް އެއްވެސް ލިޔުމެއް ނެތް. އެއްވެސް މުއާމަލާތެއް ނެތް. ފައިނޭންސް އެގްޒެކެޓިވްގެ ހުއްދައެއް ނެތް. ބިޑް ކޮމެޓީގެ ހުއްދައެއް ނެތް. ފިނޭންސް މިނިސްޓްރީގެ ހުއްދައެއް ނެތް،" އޭނާ ވިދާޅުވި އެވެ.
އިތުރަށް މިނިސްޓަރު ވިދާޅުވީ، އެ ކޮންޓްރެކްޓަރާއި މިނިސްޓްރީން ކުރެވުނު މުއާމަލާތްތައް ހޯދަން މަސައްކަތްކުރިއިރު ހުރިހާ އީމެއިލްތަކެއް ޑިލިޓް ކޮށްފައިވާ ކަމަށެވެ. އެހެންވެ އެކަން ފެންނާކަށް ނެތް ކަމަށް ޝަފީއު ވިދާޅުވި އެވެ.
