އިހްސާންގެ އިންޒާރެއް: ކުށަށް ހުޅުވާލާފައިވާ ފްލެޓުތައް ނެގުމުގެ މަސައްކަތް ކުރާނަން
ހުޅުމާލެ ދެވަނަ ފިޔަވަހީގައި ހުންނަ ހިޔާ ޓަވަރުގެ ބައެއް ފްލެޓުތަކަކީ ކުށުގެ ހާއްޔަކަށް ވެފައިވާ ތަންތަން ކަމަށާއި އެފަދަ ތަންތަނުގެ ވެރިންނާ ވާހަކަ ދައްކައިގެން މައްސަލައަށް ހައްލެއް ނުލިބިއްޖެ ނަމަ ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އާ ގުޅިގެން އެ ތަންތަން ނެގުމުގެ މަސައްކަތް ކުރާނެ ކަަމަށް ހޯމްލޭންޑް ސެކިއުރިޓީ އެންޑް ޓެކްނޯލޮޖީ މިނިސްޓަރު އަލީ އިހުސާން ވިދާޅުވެއްޖެ އެވެ.
ހިޔާ ޓަވަރުގެ ފްލެޓެއްގައި ގޭންގަކުން ރަހީނުކުރި ދިވެއްސެއް ރޭ ފުލުހުން ވަނީ ސަލާމަތްކޮށްފަ އެވެ. އެ މީހާ ސަލާމަތްކުރުމުގެ އޮޕަރޭޝަން ހިންގީ ރޭ އިރާކޮޅު ފުލުހުންނަށް ލިބުނު އިންޓެލިޖެންސް މައުލޫމާތަކާ ގުޅިގެންނެވެ. އެ މައްސަލަ އާ ގުޅިގެން 12 މީހަކު ފުލުހުންގެ ބެލުމުގެ ދަށަށް ވަނީ ގެންގޮސްފަ އެވެ.
މި ނޫހަށް އެނގިފައިވާ ގޮތުން އެކަމެއް ހިނގީ އެޗް-9 ޓަވަރުގެ 20 ވަނަ ފަންގިފިލާގެ އެޕާޓްމަންޓެއްގަ އެވެ. ރަހީނުކުރި މީހުން އުޅުނީ އެ މީހާގެ އިނގިލި ބުރިކޮށްލަން ކަމަށް އެ ސަރަހައްދުގައި ހަރަކާތްތެރިވި ނޫސްވެރިންނަށް ފުލުހުން މައުލޫމާތު ދީފައިވެ އެވެ.
ފުލުހުން ހިންގި އޮޕަރޭޝަނާ ގުޅޭގޮތުން "ސަންގު ޓީވީ" އާ ވާހަކަ ދައްކަވަމުން އިހުސާން ވިދާޅުވީ ސަރުކާރާ ހަވާލުވިއިރު ރާއްޖޭގައި ގޭންގްތަކާއި ޑްރަގް ބޭނުންކުރާ މީހުންނާއި ވިއްކާ މީހުންގެ މައްސަލަތައް އޮތީ އާދަޔާ ހިލާފަށް ބޮޑުވެފައި ކަމަށެވެ. ރައީސް ޑރ. މުހައްމަދު މުއިއްޒުގެ ވައުދުފުޅަކީ ފަސް އަހަރު ދުވަހުގެ ތެރޭގައި އެ ކަންކަމަށް ދާއިމީ ހައްލެއް ހޯދުން ކަމަށެވެ. އެގޮތުން ރާއްޖެއަކީ ރައްޔިތުންނަށް ފަސޭހަކަމާ އެކު ދިރިއުޅެވޭނެ އަމާން މާހައުލަކަށް ހެދުމަކީ އަމާޒެއް ކަމަށެވެ.
"ފުލުހުން ކުށްކުރާ ފަރާތްތަކާ ދޭތެރޭގައި ގާނޫނުގެ ތެރެއިން އެޅެން އޮތް އެންމެ ހަރުކަށި ފިޔަވަޅު އަޅާނެ. ދިވެހި ރައްޔިތުންގެ ސަލާމަތާއި ރައްކާތެރިކަމަކީ އަދުގެ ސަރުކާރަށް ވަރަށް މުހިންމު ކަމެއް. ރައީސް ޑރ. މުއިއްޒު އެއްވެސް ވަރަކަށް ނެގޯޝިއޭޓް ކުރާނެ ކަމެއް ނޫން ދިވެހި ރައްޔިތުންގެ ސަލާމަތާއި ރައްކާތެރިކަން މިގޮތަށް ޖެޕަޑައިޒް ކުރުމަކީ،" އިހްސާން ވިދާޅުވި އެވެ.
މިނިސްޓަރު ވިދާޅުވި ގޮތުގައި ބައެއް ފްލެޓްތަކާއި ކުއްޔަށް ހިފާފައިވާ ބައެއް ތަންތަނަކީ ތަކުރާރުކޮށް ކުށްކުރުމަށް ބޭނުން ކުރަމުންދާ ތަންތަނުގެ ގޮތުގައި ފާހަގަކުރެވިފައިވާ ކަމުގަ އެވެ. އެފަދަ ތަންތަނުގެ ވެރިންނާ ވާހަކަ ދައްކާނެ ކަމަށާއި ތަކުރާރުކޮށް އެފަދަ ކަންކަން ދިމާވާ ނަމަ ގާނޫނުގެ ތެރެއިން ދައުލަތަށް ތަންތަން ނަގައިގެން ހައްލެއް ލިބެން އޮތް ނަމަ އެކަން ވެސް ކުރައްވާނެ ކަމުގަ އެވެ.
ހިޔާގެ ބައެއް ފްލެޓުތަކަކީ އެކި ކުށްތައްކުރާ މީހުންގެ ހާއްޔަކަށް ހަދައިގެން ބޭނުންކުރަމުންދާ ތަންތަން ކަމުގަ އެވެ. އެކަމާ ގުޅިގެން ހުކުރު ދުވަހުން ފެށިގެން އެޗްޑީސީ އާއެކު ހާއްސަ މަސައްކަތްތަކެއް ފެށުމަށް ނިންމަވާފައިވާ ކަމުގަ އެވެ.
"މި ފްލެޓްތަކުގެ ވެރިން މިކަން ހައްލުނުކޮށްފި ނަމަ، މިގޮތަށް ކުށްކުުރުމުގެ މާހައުލަށް މި ތަންތަން ހުޅުވާލާފައި ތަކުރާރުކޮށް މިގޮތަށް އޮންނަ ނަމަ އަޅުގަނޑުމެން އެ ތަންތަން އަނބުރާ ނެގޭނެ ގޮތެއް ހޯދާނަން،" އިހްސާން ވިދާޅުވި އެވެ.
ގަވާއިދާއި ގާނޫނުތަކާ ހިލާފަށް ރާއްޖޭގައި ހާއްސަކޮށް ގޭންގްތައް ހަދައިގެން ކުށްކުރަމުންދާ ފަރާތްތަކަށް އެފަދަ ކަންކަން ހުއްޓާލުމަށް ގޮވާލައްވާ މިނިސްޓަރު ވަނީ ކުދިންގެ މުސްތަގުބަލު ހަލާކުނުކޮށް، ޖަލުތަކުގެ ތޭރިތަކުގެ ތެރެއަށް ވަނުމުގެ ބަދަލުގައި ގައުމަށް ފައިދާހުރި ޒުވާނުންގެ ގޮތުގައި ކަމުން ނެއްޓި ހެޔޮ މަގަށް އެޅުމަށް ނަސޭހަތްތެރިވެ ވަޑައިގެންފަ އެވެ.
ގޭންގް ކުށްތަކާ ދެކޮޅަށް މަސައްކަތް ކުރުމަށް ފުލުހުންގެ ތެރޭގައި ހާއްސަ ޔުނިޓެއް ގާއިމުކޮށްފައި އޮންނައިރު، ރޭ ހިންގި އެ އޮޕަރޭޝަނުގައި ފުލުހުން ދެއްކި ހުޝިޔާރު ކަމަށް އިހްސާން ވަނީ ޝުކުރު އަދާކުރައްވާފަ އެވެ.
