އިތުރު 100 ދޯންޏެއްގައި ލޮނުފެނުން މަސް ފިނިކުރާ ނިޒާމް ގާއިމުކުރަނީ
މަސްވެރިން ތެލަށް ކުރާ ހޭދަ ކުޑަކުރުމުގެ ގޮތުން މަދުވެގެން އިތުރު 100 ދޯންޏެއްގައި ލޮނުފެނުން މަސް ފިނިކުރާ ނިޒާމް، ރެފްރިޖިރޭޓެޑް ސީވޯޓާ ސިސްޓަމް (އާރުއެސްޑަބްލިޔު) ގާއިމުކުރެވިގެންދާނެ ކަމަށް ފިޝަރީޒް އެންޑް އޯޝަން ރިސޯސަސް މިނިސްޓަރު އަހްމަދު ޝިޔާމް ވިދާޅުވެއްޖެ އެވެ.
އާރުއެސްޑަބްލިޔު ފައިނޭންސިން ފެސިލިޓީގެ ސްޓޭކްހޯލްޑަރުންނާ ބައްދަލު ކުރުމަށް ބުރާސްފަތި ދުވަހުގެ މެންދުރު ރައީސް އޮފީހުގައި ހާއްސަ ރަސްމިއްޔާތެއް ވަނީ ބާއްވާފަ އެވެ. އެ ރަސްމިއްޔާތުގައި މުރާބަހާ އާރުއެސްޑަބްލިޔު ފައިނޭންސިން ފެސިލިޓީގެ ދަށުން ފައިނޭންސިން ލިބިފައިވާ ފަރާތްތަކަށް އެވޯޑު ލެޓާ ހަވާލުކުރުން ކުރިއަށް ގެންދިޔަ އެވެ. އެވޯޑު ލެޓާ ހަވާލުކޮށްދެއްވީ ރައީސް ޑރ. މުހައްމަދު މުއިއްޒެވެ.
ރަސްމިއްޔާތުގައި ވާހަކަ ދައްކަވަމުން ޝިޔާމް ވިދާޅުވީ އެސްއެމްއީ ޑިވެލޮޕްމަންޓް ފައިނޭންސް ކޯޕަރޭޝަން (އެސްޑީއެފްސީ) އާ ގުޅިގެން މިދިޔަ ސެޕްޓެމްބަރު މަހުގެ 24 ވަނަ ދުވަހު ހުޅުވާލި ފުރުސަތުގެ ދަށުން 100 އާއި 115 އާ ދެމެދުގެ އަދަދަކަށް މަސްދޯނިތަކުގައި އެ ނިޒާމް ގާއިމުކުރެވިގެންދާނެ ކަމަށެވެ.
މިހާރު އާރުއެސްޑަބްލިޔު ސިސްޓަމް ގާއިމުކުރެވިފައި ވަނީ 74 މަސްދޯންޏެއްގައި ކަން ފާހަގަކުރެއްވި އެވެ.
"ގާތްގަނޑަކަށް 470 ވަރަކަށް މަސްވެރި އުޅަނދު އެބައުޅޭ. އަޅުގަނޑުމެން މި ފަހަރު މި ހުޅުވާލާ ފުރުސަތުން އިރާދަކުރެއްވިޔާ 100 އާއި 115 އާއި ދޭތެރޭގައި އާރުއެސްޑަބްލިޔު ސިސްޓަމް ގާއިމުކުރެވިގެންދާނެ،" ޝިޔާމް ވިދާޅުވި އެވެ.
އާރުއެސްޑަބްލިޔު ފައިނޭންސިން ފެސިލިޓީގެ ދަށުން ފައިނޭންސިން ލިބުނު ފަރާތަކަށް އެވޯޑު ލެޓާ ހަވާލުކޮށްދެއްވަނީ / ފޮޓޯ:ރައީސް އޮފީސް
މިނިސްޓަރު ވިދާޅުވީ ސިސްޓަމް ގާއިމުކުރެވުމުން މަސްވެރިން ތެލަށް ކުރާ ހޭދަ ބޮޑުތަނުން ކުޑަވެގެންދާނެ ކަމަށެވެ. މިހާރު ނިޒާމު އޮތްގޮތުން މަސްވެރިންނަށް ޖެހެނީ އައިސް ހޯދަން އެއްގަމުގައި ހުންނަ އައިސް ފެސިލިޓީތަކަށް ދާން ކަމަށާއި ދަތުރުކޮށްފައި ފެސިލިޓީއަށް ދާއިރު އައިސް ނުލިބޭ ފަހަރުތައް ވެސް އަންނަ ކަމަށެވެ.
ޝިޔާމްގެ ވާހަކައިގައި ވަނީ ދިވެހި މަސްވެރިން ބާނާ މަހަކީ ތާޒާ މަހުގެ ގޮތުގައި ދުނިޔޭގެ ބާޒާރަށް ވިއްކޭ، ކޮލިޓީ އަދި ރަނގަޅު މަހަކަށް ހެދުމަކީ އަމާޒެއް ކަމުގައި ފާހަގަކުރައްވާފަ އެވެ.
އިސްލާމިކް ޑިވެލޮޕްމަންޓް ބޭންކްގެ "ސަޕޯޓް ޕީޕަލްސް ލައިވްލިހޫޑް އިން ފިޝަރީޒް ސެކްޓަ އިން މޯލްޑިވްސް ތްރޫ ސަސްޓެއިނަބަލް އެނަޖީ މަޝްރޫއު" ގެ ދަށުން ދޫކުރާ ފެސިލިޓީން ރަހުނަކާ ނުލައި އެއްލައްކަ ރުފިޔާއިން ފެށިގެން ދެ މިލިއަން ރުފިޔާ އާ ހަމައަށް އާރުއެސްޑަބްލިޔު ސިސްޓަމަކާއި ޖަނޭޓަރަކާ އަދި ސޯލާ ޕެނަލް ގަތުމަށް ފައިސާ ލިބޭނެ އެވެ. އަދި އެސްޑީއެފްސީގައި ރަޖިސްޓްރީކޮށްފައިވާ ވެންޑަރެއް މެދުވެރިކޮށް އޮޑިވެރިން އަމިއްލައަށް ތަކެތި ގަތުމުގެ އިހުތިޔާރު ވަނީ ފަހިކޮށްދީފަ އެވެ. އަދި މި ފެސިލިޓީގެ ދަށުން ނަގާ ތަކެތީގެ އަގުގެ 35 އިންސައްތަ ސަރުކާރުން ދައްކައިދޭ ގޮތަށް ވެސް ވަނީ ނިންމާފަ އެވެ.
