Monday, 16 November 2026
Advertisement
Ooredoo — Airfibre (leaderboard)
މުނިފޫހިފިލުވުން

އެމްއެސްޕީއޭގެ އެކްޓިން ވޯކްޝޮޕްގެ ތާރީހަށް ބަދަލެއް، ފަށާނީ ޖެނުއަރީ 10 ގައި

އެމްއެސްޕީއޭގެ އެކްޓިން ވޯކްޝޮޕްގެ ތާރީހަށް ބަދަލެއް، ފަށާނީ ޖެނުއަރީ 10 ގައި
މޯލްޑިވްސް ސޮސައިޓީ ފޯ ޕާފޯމިންގް އާޓްސް (އެމްއެސްޕީއޭ) އިން ފެށޭ ހަފުތާގެ ހުކުރު ދުވަހު ބާއްވަން ނިންމި "އެކްޓިން ވޯކްޝޮޕް ފޯ ތިއޭޓަ އެންޑް ފިލްމް" ގެ ތާރީހަށް ބަދަލު ގެނެސްފި އެވެ. އެކްޓިން ވޯކްޝޮޕްގައި ބައިވެރިވުމުގެ ފުރުސަތު ހުޅުވާލީ އެ ސޮސައިޓީން ބާއްވަން ނިންމާފައިވާ ފުރަތަމަ ފިލްމު އެވޯޑު، "އެމްއެސްޕީއޭ ފިލްމު އެވޯޑް 2024" ލޯންޗްކުރުމަށް މިދިޔަ މަހުގެ 15 ވަނަ ދުވަހުގެ ރޭ ބޭއްވި ހާއްސަ ހަފުލާގަ އެވެ. ފަންނާނުންގެ އިތުރުން ތަމްރީނު ލިބިގެން ފިލްމީ ދާއިރާގައި ހަރަކާތްތެރިވާން ޝައުގުވެރިވާ ކުދިންނަށް ބައިވެރިވުމުގެ ފުރުސަތު ހުޅުވާލައިގެން ކުރިއަށް ގެންދަން ތާވަލުކުރި މި ވޯކްޝޮޕް ބާއްވަން ނިންމީ ހިނގަމުންދާ ނޮވެމްބަރު މަހުގެ 15 ވަނަ ދުވަހުން ފެށިގެން ޑިސެމްބަރު މަހުގެ 10 ވަނަ ދުވަހުގެ ނިޔަލަށެވެ. އެމްއެސްޕީއޭއިން ވަނީ ފަންނާނުންނަށް ހުޅުވާލައިގެން މިދިޔަ އަހަރު ވެސް މިފަދަ ވޯކްޝޮޕެއް ބާއްވާފަ އެވެ. އެހެންނަމަވެސް އެމްއެސްޕީއޭއިން ވަނީ އެކްޓިން ވޯކްޝޮޕް ބާއްވަން ހަމަޖެއްސި ތާރީހު ފަސްކޮށްފައިވާކަން ހާމަކޮށްފަ އެވެ. އެއް މަސް ދުވަހުގެ މުއްދަތަށް ކުރިއަށް ގެންދަން ރާވާފައިވާ މި ވޯކްޝޮޕް މިހާރު ފެށުމަށް ނިންމާފައި ވަނީ އަންނަ ޖެނުއަރީ މަހުގެ 10 ވަނަ ދުވަހު އެވެ. ވޯކްޝޮޕް ބާއްވަން ހަމަޖެއްސި ތާރީހަށް ބަދަލު ގެނެސްފައި ވަނީ ފިލްމީ ދާއިރާ ގުޅުންހުރި އަދި ކަމަށް ޝައުގުވެރިވާ ގިނަ ކުދިން މިވަގުތު ތިބީ މާލެއިން ބޭރުގައި ކަމަށް ވުމާ އެކު ބައިވެރިންގެ އެދުމުގެ މަތިން ވީހާވެސް ގިނަ ފަރާތްތަކަށް ފުރުސަތު ދިނުމުގެ ގޮތުންނެވެ. އެކްޓިން ވޯކްޝޮޕާ ގުޅޭގޮތުން ވާހަކަ ދައްކަވަމުން އެމްއެސްޕީއޭގެ ބޯޑު މެމްބަރު ހަމްދާ މުހައްމަދު "ދެން" އަށް ވިދާޅުވީ މި ވޯކްޝޮޕަކީ ތަސައްވުރުތަކަކާ އެކު ފިލްމީ ދާއިރާ އިތުރު ހަރުފަތަކަށް ގެންދިއުމަށް އެ ސޮސައިޓީން ކުރިއަށް ގެންދިއުމަށް ތާވަލުކޮށްފައިވާ ގިނަ ހަރަކާތްތަކުގެ ތެރޭގައި ހިމެނޭ ހަރަކާތެއް ކަމަށެވެ.
"އެންޓަޓެއިންމެންޓް އިންޑަސްޓްރީއަކީ ވަރަށް ޕޮޓެންޝިއަލް ހުރި އިންޑަސްޓްރީއެއް. ހަގީގަތުގައި އޭގެ ބޭނުން އެންމެ ރަނގަޅު ގޮތުގައި ހިފައިފި ނަމަ އިގުތިސޯދީ، އިޖުތިމާއީ، ތައުލީމީ އަދި ނަފުސާނީ ގޮތުން ބެލިޔަސް މި އިންޑަސްޓްރީން ރާއްޖެއަށް އެކި ގޮތްގޮތުން ކޮންޓްރިބިއުޓް ކުރެވެން އެބައޮތް،" ހަމްދާ ވިދާޅުވި އެވެ.
ދާއިރާގައި ހަރަކާތްތެރިވާ ބޭރުގެ ފަންނީ މީހުން ގެނެސްގެން ބާއްވާ މި ވޯކްޝޮޕް ފަހުގެ ތާރީހަކަށް ބަދަލުކުރުމާ އެކު، ބައިވެރިވުމަށް އެދި އެޕްލިކޭޝަން ހުށަހެޅުމުގެ މުއްދަތު ވެސް ވަނީ އިތުރުކޮށްފަ އެވެ. އެގޮތުން މި ތަމްރީނު ޕްރޮގްރާމުގައި ބައިވެރިވުމުގެ ފުރުސަތު ވޯކްޝޮޕް ފަށާ ތާރީހާ ހަމައަށް ހުޅުވާލާފައިވާއިރު، ޝައުގުވެރިވާ ފަރާތްތަކުން އައިޑީ ކާޑު ނަމްބަރު ޖެހުމަށް ފަހު 9986585 ނުވަތަ 7727264 އަށް ވައިބަ ނޫނީ ވަޓްސްއެޕްއިން މެސެޖު ކުރުމަށް އެމްއެސްޕީއޭއިން އެދެ އެވެ. އެމްއެސްޕީއޭ ފިލްމު އެވޯޑު ހަފުލާ ބާއްވަން ތާވަލުކޮށްފައި ވަނީ ޑިސެމްބަރު މަހުގެ 30 ވަނަ ދުވަހު އެވެ. ފިލްމު އެވޯޑުގެ އިތުރުން އެ މަހުގެ 22 ވަނަ ދުވަހުން ފެށިގެން 29 ވަނަ ދުވަހަށް ފިލްމު ފެސްޓިވަލެއް ބޭއްވުމަށް ވެސް އެ ސޮސައިޓީން ވަނީ ނިންމާފަ އެވެ. ފެސްޓިވަލުގެ ތެރެއިން ސިނަމާގައި ދައްކާނީ އެވޯޑުގައި ބައިވެރިކުރާ ފިލްމުތަކެވެ.

ރިއެކްޝަން

Advertisement
Allied — Dhen Online (box)

ކޮމެންޓް

މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.