ތައުލީމަށް ހިދުމަތް ކުރުުމުގެ އެންމެ މަތިވެރި ޝަރަފް ޑރ. ޒާހިރު ހުސެއިނަށް އަރުވައިފި
ރާއްޖޭގެ ތައުލީމަށް ހިދުމަތްކުރުމުގެ އެންމެ މަތިވެރި ޝަރަފު، ނިޝާން އިއްޒުއްދީނުގެއިއްޒަތުގެ ވެރިޔާ އަދި ރާއްޖޭގެ އިސްލާމީ ޔުނިވަރސިޓީގެ ޗާންސެލާ ކަމުގެ މަގާމުގައި މިހާރު ހުންނެވި ޑރ. މުހައްމަދު ޒާހިރު ހުސެއިން އަރުވަައިިފި އެވެ.
ޒާހިރު ހުސެއިންއަށް އެ ޝަރަފް އެރުވީ ޖުމްހޫރީ ދުވަހުގެ މުނާސަބަތާ ގުޅިގެން މިރޭ ބޭއްވި ހާއްސަ ޖަލްސާގައި ރައީސް ޑރ. މުހައްމަދު މުއިއްޒު އެވެ.
އެ ޝަރަފު، ޒާހިރުއަށް އެރުވުމަށް ރައީސުް ކަނޑައެޅުއްވީ، ޒާހިރު ރާއްޖޭގެ ތައުލީމީ ތަރައްގީއަށާއި، ރާއްޖޭގައި ތައުލީމު ފުޅާކުރެއްވުމަށާއި، ތައުލީމީ ރޮނގުން ރާއްޖޭގެ ރައްޔިތުން ހޭލުންތެރިކުރުވުމަށް އިިހުލާސްތެރިކަމާއެކުގައި، ގިނަގުނަ ހިދުމަތްތަކެއް ކޮށްދެއްވާފައިވާތީ، އެކަމުގެ އަގު ވަޒަންކުރެއްވުމުގެ ގޮތުންނެވެ.
ޑރ. ޒާހިރު މިސްރުގެ އަލްއަޒްހަރު ޔުނިވަރސިޓީން މަތީ ތައުލީމު ފުރިހަމަ ކުރެއްވުމަށްފަހު ރާއްޖެއަށް ވަޑައިގެން، އެންމެ ފުރަތަމަ ހިދުމަތް ފެއްޓެވީ، އަމީނިއްޔާ ސްކޫލްގަ އެވެ.
އެއަށްފަހު ތައުލީމީ ދާއިރާގެ އެކި މަގާމުތައް ފުރުއްވައި އެޑިއުކޭޝަން މިނިސްޓަރުގެ މަގާމުވެސް އެމަނިކުފާނު ފުރުއްވިއެވެ. އަދި މި މަގާމުގައި ހުންނަވައިގެން ތައުލީމީ ދާއިރާގެ ކުރިއެރުމަށް ގިނަގުނަ މަސައްކަތްތަކެއް ވަނީ ކޮށްދެއްވާފަ އެވެ.
އެގޮތުން ސައިންސް އެޑިޔުކޭޝަން ސެންޓަރު 1979 ވަނަ އަހަރު ހުޅުވިގެންދިޔައީ އެމަނިކުފާނުގެ މޭސްތިރިކަމުގެ ދަށުންނެވެ. އޭގެ އިތުރުން ޒަމާނާ އެކަށޭނަ އަދި ދިވެހިވަންތަ ނިޒާމަކަށް ކިޔަވައިދެވޭނެ ގޮތަކަށް، ރާއްޖޭގެ ތައުލީމީ މުގައްރަރަށްވެސް އެކިފަހަރު މަތިން އިސްލާހީ ހެޔޮ ބަދަލުތަކެއް ގެނެސްދެއްވި އެވެ.
ޒާހިރު ހުސެއިން އިސްވެ ހުންނަވައިގެން ހިންގެވި އެންމެބޮޑު އަނެއް މަޝްރޫއަކީ އަސާސީ ތައުލީމުގެ މަޝްރޫއު އެވެ.
ޒާހިރު ހުސައިން ޕީއެޗްޑީ ހާސިލުކުރެއްވީ، ތިއޯލޮޖީ އެންޑް ފިލޯސޮފީގެ ރޮނގުން، 2001 ވަނަ އަހަރު މެލޭޝިއާއިންނެވެ. ޕީއެޗްޑީ ހާސިލުކުރެއްވުމާ ގުޅިގެން، ސަރުކާރުން ދެއްވާ ހާއްސަ އިނާމު، އެ އަހަރު އެ މަނިކުފާނަށް ވަނީ ލިބިވަޑައިގެންފަ އެވެ. ނިޝާން އިއްޒުއްދީންގެ އިއްޒަތުގެ ލަގަބު، އެ މަނިކުފާނަށް އެރުވުނީ 10 ނޮވެންބަރު 2008ގަ އެވެ.
ޒާހިރު ހުސައިން، ދައުލަތަށް ހިދުމަތް ކުރައްވަމުން ގެންދަވާތާ މިހާރު 48 އަހަރުވެއްޖެ އެވެ. އަދި ތައުލީމީ ދާއިރާގައި އެމަނިކުފާނު ހިދުމަތް ކުރައްވަމުން ގެންދަވާތާ މިހާރު 32 އަހަރަށްވުރެ ގިނަ ދުވަސްވެއްޖެ އެވެ.
