ކޮޕް ސަމިޓްގައި ބައިވެރިވެ ވަޑައިގަތުމަށް ރައީސް އަޒަރުބައިޖާނަށް
މޫސުމަށް އަންނަ ބަދަލުތަކުގެ މުއާހަދާގެ 29 ވަނަ ކޮންފަރެންސް އޮފް ދަ ޕާޓީސް (ކޮޕް 29) ގައި ބައިވެރިވެވަޑައިގަތުމަށް ރައިސުލްޖުމްހޫރިއްޔާ ޑރ. މުހައްމަދު މުއިއްޒު އަޒަރުބައިޖާނަށް މިއަދު ފުރާވަޑައިގެންފި އެވެ.
މި އަހަރުގެ ކޮޕް ސަމިޓް ކުރިއަށްދާނީ މި ނޮވެމްބަރު މަހުގެ 11 އިން 22 އަށް އަޒަރްބައިޖާންގެ ވެރިރަށް ބަކޫގެ، ބަކޫ ސްޓޭޑިއަމްގަ އެވެ.
މި ސަމިޓުގައި ރައީސް ރާއްޖޭގެ ފަރާތުން އިއްވަވާ ހާއްސަ ގައުމީ ބަޔާން އިށްވަވައި، މަތީ ފަންތީގެ އެކިއެކި އިވެންޓްތަކާއި މަޝްވަރާތަކުގައި ބައިވެރިވެވަޑައިގަތުމުގެ އިތުރުން ބައެއް ގައުމުތަކުގެ ވެރިންނާ ބައްދަލުކުރެއްވުމަށް ވަނީ ހަމަޖެހިފަ އެވެ.
މި ބައްދަލުވުމަކީ ރާއްޖެއިން ދެމެހެއްޓެނިވި ތަރައްގީގެ ލަނޑުދަނޑިތަކާއި މޫސުމީ ބަދަލުތަކަށް ހޭނުމަށް ކުރަމުންދާ މަސައްކަތަކާ ބެހޭގޮތުން ވާހަކަދެއްކުމަށް ފުރުސަތު ލިބޭ ވަރަށް މުހިންމު ބައްދަލުވުމެކެވެ.
ކޮޕް 29 ގައި ކްލައިމެޓް ފައިނޭންސްގެ އާ ލަނޑުދަނޑިތައް އެކަށައެޅުމާއި ކާބަން މާކެޓް އޮޕަރޭޝަނަލައިޒް ކުރުމާބެހޭ ގޮތުން މަޝްވަރާ ކުރުމާއި އެއްބާރުލުން އިތުރުކުރުމާއި އެންޑީސީ ތަރައްގީކުރުމަށް ހުރި ހުރަސްތައް ނައްތާލުމާ ބެހޭ ގޮތުން މަޝްވަރާ ކުރުމަށްވެސް ބައްދަލުވުމުގައި ހަމަޖެހިފައިވެ އެވެ.
އޭގެ އިތުރުން މަތީ ފަންތީގެ އެކިއެކި މަޝްވަރާތަކުގައި ރައީސް ބައިވެރިވެވަޑައިގަންނަވަން ހަމަޖެހިފައިވާއިރު، ރައީސް އަކީ ސްމޯލް އައިލެންޑް ޑިވެލޮޕިން ސްޓޭޓްސް (ސިޑްސް) އަށް ދިމާވާ ތަފާތު ގޮންޖެހުންތަކަށް ވަރަށް ބޮޑަށް ވަކާލާތު ކުރައްވާ ބޭފުޅެކެވެ.
އެ ދަތުރުފުޅުގައި ރައީސްގެ އަރިހުގައި ސަރުކާރުގެ މަތީ ފަންތީގެ ވަފުދެއް ބައިވެރިވެ ވަޑައިގަންނަވަ އެވެ.
އަޒަރުބައިޖާނަށް ރައީސް ފުރާވަޑައިގަތީ، ދެ ހަރަމްފުޅުގެ ހާދިމް އަދި ސައޫދި އަރަބިއްޔާގެ ރަސްގެފާނު ސަލްމާން ބިން އަބްދުލްއަޒީޒްގެ ދައުވަތަކަށް، ޖޮއިންޓް އަރަބް-އިސްލާމިކް ސަމިޓުގައި ބައިވެރިވެވަޑައިގަތުމަށް ސައޫދި- އަރަބިއްޔާއަށް ކުރެއްވި ރަސްމީ ދަތުރުފުޅު ނިންމަވާލެއްވުމަށް ފަހުގަ އެވެ.
މިދިޔަ އަހަރު ޔޫއޭއީގެ ދުބާއީގައި ބޭއްވި ކޮޕް-28ގެ ބައްދަލުވުމުގައި ރައީސް ވަނީ ބައިވެރިވެވަޑައިގެންފަ އެވެ.
