ޕީސީބީ ގާނޫނު އުވާލާ އެސްއޯއީތައް ފައިނޭންސްގެ ދަށަށް ގެންނަނީ
ސަރުކާރުގެ ކުންފުނިތަކުގެ ކަންކަން ބަލަހައްޓާ ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ( ގެ ގާނޫނު އުވާލުމަށްފަހު ދައުލަތުގެ ކުންފުނިތަކާ ގުޅޭ އާ ގާނޫނެއް އެކުލަވާލައި، ސަރުކާރު ހިއްސާވާ ކުންފުނިތައް ފިނޭންސް މިނިސްޓްރީގެ ދަށަށް ގެންނަން ނިންމައިފި އެވެ.
އަންނަ އަހަރަށް ލަފާކުރާ ބަޖެޓް ޕޮޒިޝަން ރިޕޯޓުގައި ބުނެފައިވާ ގޮތުން، ސަރުކާރުން ނިންމާފައިވަނީ އަންނަ އަހަރު ރައްޔިތުންގެ މަޖިލީހުގެ ފުރަތަމަ ދައުރުގައި ސަރުކާރު ހިއްސާވާ ކުންފުނިތަކާ ގުޅޭ އާ ގާނޫނެއްގެ ބިލް މަޖިލީހަށް ފޮނުވުމަށެވެ.
އެ ގާނޫނު ވެގެންދާނީ ބައިނަލްއަގްވާމީ މާލީ އިދާރާތަކުގެ ލަފައާއި އެއްގޮތަށް، ކުންފުނިތައް ހިންގުމަށް އެންމެ ބެސްޓް ޕްރެކްޓިސްތައް ހިމަނައިގެން އެކުލަވާލާ ގާނޫނެއް ކަމަށް އެ ރިޕޯޓުގައި ފިނޭންސް މިނިސްޓްރީން ފާހަގަކޮށްފައިވެ އެވެ.
އެ ގާނޫނުގެ ތެރެއިން ކުންފުނިތަކުގެ ހިންގުން ހަރުދަނާކުރުމަށް ސާފު ގަވާނެންސް އޮނިގަނޑެއް ގާއިމްކުރެވިގެންދާނެ އެވެ. އަދި އެ ކުންފުނިތަކުގެ މުލްކުވެރިކަމުގެ ސިޔާސަތުތައް ކަނޑައަޅައި، ކުންފުނިތައް ހިންގުމާ ބެލެހެއްޓުމުގެ މިންގަނޑުތައް ކަނޑައެޅިގެންދާނެ އެވެ.
އެ ބަދަލާއެކު، ޕީސީބީ ގާނޫނު އުވާލެވި، އެ ގާނޫނުގައި ހުރި މުހިންމު ނުކުތާތައް ވެސް ކުންފުނިތަކާ ގުޅޭ ގާނޫނަށް އިތުރުކުރެވިގެންދާނެ ކަމަށް ބަޖެޓް ރިޕޯޓްގައި ވެއެވެ. އަދި ޕީސީބީ އުވާލެވުމުން، ކުންފުނިތަކާއި ގުޅުންހުރި ކަންކަން ބަލަހައްޓަމުންދާނީ ފިނޭންސް މިނިސްޓްރީންނެވެ.
އަދި ކުންފުނިތަކާ ގުޅޭ ގާނޫނުގެ ތެރެއިން، ކުންފުނިތަކަށް ބޭނުންވާ މިންވަރަށްވުރެ އިތުރަށް މުވައްޒަފުން ނެގުމާއި، ޕްރޮކިއުމެންޓް ނިޒާމުގައި ހުރި އުނިކަންކަން މަދުވެގެންދާނެ ކަމަށް އެ ރިޕޯޓްގައި ބުނެ އެވެ.
ސަރުކާރު ހިއްސާވާ ކުންފުނިތަކުގެ ފިސްކަލް ހިރާސްތައް ކުޑަކުރުމުގެ ގޮތުން ބައެއް ކުންފުނިތައް އެއްކޮށްލުމަށާއި، ބައެއް ކުންފުނިތައް އުވާލުމަށް ވެސް ސަރުކާރުން ވަނީ ނިންމާފަ އެވެ. އެގޮތުން:
- އެސްޓީއޯއިން ފެނަކައިގެ 100 އިންސައްތަ ހިއްސާ ގަނެ އެސްޓީއޯގެ ސަބްސިޑިއަރީ ކުންފުންޏަކަށް ބަދަލުކުރަން ނިންމުން
- މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އާއި ރީޖަނަލް އެއާޕޯޓްސް ކޮމްޕެނީ ލިމިޓެޑް (އާރްސީއެލް) އާއި އެއްކޮށްލުން
- ހައުސިންގް ޑިވެލޮޕްމެންޓް ކޯޕަރޭޝަން (އެޗްޑީސީ) ގެ 100 އިންސައްތަ ހިއްސާވާ ސަބްސިޑިއަރީ ކުންފުންޏަކަށް ފަހި ދިރިއުޅުން ކޯޕަރޭޝަން (އެފްޑީސީ) ބަދަލުކުރުން
- އެގްރޯ ނޭޝަނަލް ކޯޕަރޭޝަން ލިމިޓެޑް އުވާލުން
- މޯލްޑިވްސް ސްޕޯޓްސް ކޯޕަރޭޝަން އުވާލުން
ބަޖެޓް ރިޕޯޓުގައި ބުނެފައިވާ ގޮތުން ކުންފުނިތަކަށް މި ގެނެވޭ ބަދަލާއެކު، ކުންފުނިތަކަށް ހޭދަވާ ރުފިޔާ ބަޖެޓުން ސަލާމަތްކުރެވި އާމްދަނީ އިތުރުކުރެވި، އިސްވެސްޓްމެންޓްތައް އިތުރު ކުރެވިގެންދާނެ އެވެ.
