މޫސުމީ ބަދަލުތަކަށް އެޅި ފިޔަވަޅުތަކާ ގުޅިފައިވާ ދަރަނިތައް މާފުކޮށްދޭން ގޮވާލައިފި
ދަރަނި އަނބުރާ ދެއްކުމަށް ބޮޑު ހޭދައެއް ކުރަން ޖެހިފައިވުމުން މޫސުމީ ބަދަލުތަކާއި ގުޅިގެން ފިޔަވަޅުތައް ނޭޅޭ ކަމަށާއި، އެހެންކަމުން މޫސުމީ ބަދަލުތަކުން ރައްކާތެރިވުމަށް ކޮށްފައިވާ މަސައްކަތްތަކާއި ގުޅުންހުރި ދަރަނިތައް މާފުކޮށްދިނުމަށް ރައީސް ޑރ. މުހައްމަދު މުއިއްޒު ގޮވާލައްވައިފި އެވެ.
ރައީސް އެކަމަށް ގޮވާލެއްވީ، މޫސުމަށް އަންނަ ބަދަލުތަކާ ބެހޭ ލީޑަރުންގެ ސަމިޓް އޮފް ސްމޯލް އައިލެންޑް ޑިވެލޮޕްމަންޓް ސްޓޭޓްސް (އެސްއައިޑީއެސް) ގެ ކޮޕް29 ބައްދަލުވުމުގައި ބައިވެރިވެ ތަގްރީރު ދެއްވަމުންނެވެ.
"މާލީ ނިޒާމުގައި ހުރި ހިރާސްތަކަށް މިހާރަށްވުރެ ފުރިހަމަ ހައްލުތަކެއް ހޯދަން އެބަޖެހޭ. މޫސުމީ ބަދަލުތަކުން ރައްކާތެރިވުމަށް ފިޔަވަޅުތައް އެޅުމަށްވުރެ ބޮޑު ހޭދައެއް ދަރަނި އަދާކުރުމަށް އަޅުގަނޑުމެން އެބަ ކުރަންޖެހޭ. އެހެންވީމަ، މޫސުމީ ބަދަލުތަކާއި ގުޅުންހުރި ދަރަނިތައް މާފުކޮށްދިނުމަށް ގޮވާލަން،" ރައީސް ވިދާޅުވި އެވެ.
ދަރަނި މާފުކޮށްދެއްވުމުގެ އިތުރުން ދެ ކަމަކަށް ރައީސްގެ ތަގުރީގުގައި ގޮވާލެއްވި އެވެ. އެގޮތުން، އދ އާއި މަލްޓިލެޓަރަލް ޑިވެލޮޕްމަންޓް ބޭންކް (އެމްޑީބީ) ތަކާއި އިންޓަނޭޝަނަލް ފައިނޭންޝަލް އިންސްޓިޓިއުޝަން (އައިއެފްއައި) ތަކުން އަދި އަމިއްލަ ސެކްޓާ އެއްބައިވެ, ސިޑްސްއަށް އެހީތެރިވާން ޖެހޭ ކަމަށް ގޮވާލެއްވި އެވެ.
އޭގެ އިތުރުން، ހަގީގީ ބޭނުންތައް ދައްކުވައިދޭ ކްލައިމެޓް ފައިނޭންސްއާ ބެހޭ ހަރުދަނާ ނިއު ކަލެކްޓިވް ކުއަންޓިފައިޑް އަމާޒެއް އެކުލަވާލުމަށް ގޮވާލެއްވި އެވެ.
ރައީސް ވިދާޅުވީ، ޕެރިސް އެއްބަސްވުމުގެ 6.4 ވަނަ މާއްދާގެ ދަށުން އާ އޮޕަރޭޝަނަލް ސްޓޭންޑަޑްސް މިހާރު ތަސްދީގުކޮށްފައިވާއިރު، ކިޔޯޓޯގެ ފިލާވަޅުތަކުން ދަސްވެ، ތިމާވެށީގެ ނަޒާހަތްތެރިކަން ދެމެހެއްޓޭ ބައިނަލްއަގްވާމީ ކާބަން މާކެޓް މެކޭނިޒަމްގެ މަޝްވަރާތައް ނިންމަންޖެހޭ ކަމަށެވެ. އެ ކާބަން މާކެޓުތަކަކީ، ހަމައެކަނި ވިޔަފާރީގެ މާކެޓުތަކަކަށްވުރެ ފުޅާވެ، ދެމެހެއްޓެނިވި ގޮތެއްގައި އެސްއައިޑީސްތަކަށް ތަރައްގީއަށް ވާސިލްވުމަށް އޮތް މަގަކަށް ވާން ޖެހޭ ކަމަށް ވިދާޅުވި އެވެ.
މޫސުމަށް އަންނަ ބަދަލަކީ، އަހަރުތަކެއް ވަންދެން ހޯދި ތަރައްގީގެ ކުރިއެރުންތައް ނެތިކޮށްލާ, މިނެޓުތަކެއްގެ ތެރޭގައި އަނބުރާ ފެށުމާ ހިސާބަށް ގެންދާ ފަދަ ބާރެއް ކަމަށެވެ. އަދި މިހާރު އޮތް މާލީ ނިޒާމުގެ ތެރެއިން އެސްއައިޑީއެސްގެ އަވަސް ބޭނުންތައް ފުއްދައިނުދެވޭ ކަމަށެވެ.
ރައީސް މުއިއްޒު ވިދާޅުވީ، އިގްތިސޯދު ސިންދަފާތު ކުރުމުގެ ފުރުސަތުތައް ރާއްޖޭގައި އެބަހުރި ކަމަށެވެ. އެގޮތުން، ޕޯޓްގެ ހިދުމަތާއި، ރާއްޖޭގެ ހާއްސަ އިގްތިސޯދީ ސަރަހައްދުތައް ފުޅާކުރުމާއެކު ރާއްޖޭގެ ފުރަތަމަ ޑިވަލޮޕްމެންޓް ބޭންކްގެ މަސައްކަތް ފެށިފައިވާ ކަމަށް ވިދާޅުވި އެވެ.
އޭގެއިތުރުން އާބަން ޑިވަލޮޕްމެންޓަށްޓަކައި އިކޯ ސިޓީގެ ގޮތުގައި ތަރައްގީކުރާ "ރަސްމާލެ" މަޝްރޫއު އެމަނިކުފާނު ފާހަގަކުރެއްވި އެވެ.
"އެ މަޝްރޫއާއެކު ބޯހިޔަވަހިކަމަށް ހައްލު ލިބި, އިގްތިސޯދީ ފުދުންތެރިކަމުގެ މަރުކަޒަކަށް އެތަން ވެގެންދާނެ މަޝްރޫއުއެއް. ރަސްމާލެ ބިނާކުރާނީ ތިމާވެށީގެ ރައްކާތެރިކަމާއި ތިމާވެއްޓާ ރައްޓެހި އިގްތިސޯދަކާއެކު،" ރައީސް ވިދާޅުވި އެވެ.
އިއާދަކުރަނިވި ހަކަތަ އުފެއްދުމަށް ކުރަމުންދާ މަސައްކަތްތަކުގެ ތެރެއިން 1.5 ބިލިއަން ޑޮލަރަށްވުރެ ގިނަ އިންވެސްޓްމަންޓަކުން، ކާބަން މަދު އިގްތިސޯދަކަށް ބަދަލުވުމަށް މަސައްކަތް ކުރަމުންދާކަން ވެސް ފާހަގަކުރެއްވި އެވެ.
އެންޓިގުއާ އަދި ބާބިއުޑާ އެޖެންޑާ ފޯ ސިޑްސް، ނުވަތަ އޭބީއޭއެސް ބަލައިގެން ކުރިއަށް އޮތް 10 އަހަރުގެ ޕްލޭނަށް އިޝާރާތް ކުރައްވަމުން ރައީސް ވިދާޅުވީ ފައިނޭންސް ނެތި އުންމީދުތަކަކީ ހަމައެކަނި އާދޭހެއް ކަމަށެވެ.
