އާ ސިޔާސީ ޕާޓީއެއް އުފައްދަން ހުއްދަ ދީފި
"މޯލްޑިވްސް ކޮމިޔުނިޓީ ޕާޓީ" ގެ ނަމުގައި އައު ސިޔާސީ ޕާޓީއެއް އުފެއްދުމުގެ ހުއްދަ އިލެކްޝަންސް ކޮމިޝަން (އީސީން) މިއަދު ދީފި އެވެ.
އީސީން ބުނީ ސިޔާސީ ޕާޓީގެ ގާނޫނުގެ 12 ވަނަ މާއްދާގައިވާ ގޮތުގެ މަތިން "މޯލްޑިވްސް ކޮމިޔުނިޓީ ޕާޓީ" ގެ ނަމުގައި ސިޔާސީ ޕާޓީއެއް އުފެއްދުމަށް ކުރަންޖެހޭ މަސައްކަތްތައް ކުރުމުގެ ހުއްދަ، ގ.ކްރެބްޓްރީ، އަލީ އަހުމަދަށް ދިނުމަށް އެ ކޮމިޝަނުން ނިންމާފައިވާ ކަމަށެވެ.
ސިޔާސީ ޕާޓީއެއް އުފެއްދުމުގެ ހުއްދަ އީސީން ދިނުމުން ޕާޓީ ރަޖިސްޓްރީ ކޮށްދޭނީ މަދުވެގެން 3،000 މީހުންގެ ސޮޔާ އެކު ހުށަހެޅުމުންނެވެ. ރަޖިސްޓްރީ ކުރުމަށް ބޭނުންވާ އަދަދަށް ފޯމު ކޮމިޝަނަށް ހުށަހެޅުމަށް 3 މަސް ދުވަހުގެ މުހުލަތެއް އީސީން ވަނީ ދީފަ އެވެ.
ރާއްޖޭގައި މިވަގުތު 11 ސިޔާސީ ޕާޓީއެއް އީސީގައި ދަފްތަރު ކުރެވިފައިވެ އެވެ.
އެއީ އިދިކޮޅު މައި ޕާޓީ, ދިވެހި ރައްޔިތުންގެ ޑިމޮކްރެޓިކް ޕާޓީ (އެމްޑީޕީ), އަދާލަތު ޕާޓީ, މަޝްހޫރު ވިޔަފާރިވެރިޔާ ގާސިމް އިބްރާހިމްގެ ޖުމްހޫރީ ޕާޓީ(ޖޭޕީ), ޕްރޮގްރެސިވް ޕާޓީ އޮފް މޯލްޑިވްސް, ރައްޔިތުންގެ މަޖިލީހުގެ މީދޫ ދާއިރާގެ މެންބަރު އަދި މަޝްހޫރު ވިޔަފާރިވެރިޔާ އަހުމަދު ސިޔާމް މުހައްމަދު (ސަން ސިޔާމް) ގެ މޯލްޑިވްސް ޑިވެލޮޕްމެންޓް އެލަޔަންސް (އެމްޑީއޭ) ކުރީގެ ނައިބް ރައީސް އަހުމަދު އަދީބު އިސްވެ ހުންނަވާ އުފެއްދެވި މޯލްޑިވްސް ތާޑްވޭ ޑިމޮކްރެޓްސް (އެމްޓީޑީ)، ސަރުކާރު ހިންގާ ޕީޕަލްސް ނޭޝަނަލް ކޮންގްރެސް(ޕީއެންސީ)، ކުރީގެ ރައީސް މައުމޫން އަބްދުލްގައްޔޫމް އުފެއްދެވި މޯލްޑިވްސް ރިޕޯމް މޫވްމަންޓް (އެމްއާރްއެމް) މާފަންނު އުތުރު ދާއިރާގެ މެންބަރު މުހައްމަދު ނާޒިމް (ކާނަލް ނާޒިމް) ގެ މޯލްޑިވްސް ނޭޝަނަލް ޕާޓީ (އެމްއެންޕީ) އަދި ކުރީގެ ރައީސް މުހައްމަދު ނަޝީދު އިސްވެ ހުންނަވާ އުފެއްދެވި ދަ ޑިމޮކްރެޓްސްގެ އިތުރުން ކުރީގެ ރައީސް އަބްދުﷲ ޔާމީން އިސްވެ ހުންނަވާ އުފެއްދެވި ޕީޕީަލް ނެޝަނަލް ފްރޮންޓް (ޕީއެންއެފް) އެވެ.
އެ ޕާޓީތަކުގެ ތެރެއިން 50,851 މެމްބަރުންނާއެކު އެންމެ ގިނަ މެންބަރުން ތިބީ އެމްޑީޕީގަ އެވެ. ޕީޕީއެމްގެ ދަފްތަރުގައި ތިބީ 34،698 މެމްބަރުންނެވެ. ތިންވަނައަށް އެންމެ ގިނަ މެމްބަރުން ތިބީ ޕީއެންސީގަ އެވެ. އެއީ 28,983 މެމްބަރުންނެވެ.
