ލިސްޓު މުރާޖާކޮށް އައިވީއެފް ހެދުމުގެ ފުުރުސަތު 64 މީހަކަށް
ދަރިމައިވުމުގައި ދިމާވާ ދަތިތަކަށް ހޯދާ ފަރުވާ، އިން ވިޓްރޯ ފާޓިލައިޒޭޝަން (އައިވީއެފް) އަދި އިންޓްރަޔުޓްރައިން އިންސެމިނޭޝަން (އައިޔޫއައި) ހެދުމަށް މާލީ ގޮތުން ދަތިތައް ކުރިމަތިވެފައިވާ ފަރާތްތަކުން އެހީ ހޯދުމަށް ހުޅުވާލި ފުރުސަތުގެ ދަށުން ދެވަނަ ބުރުގައި 64 މީހަކަށް އެހީ ދޭން ނިންމައިފި އެވެ.
ސަރުކާރުގެ ފުރަތަމަ 14 ހަފުތާގެ ތެރޭގައި ހާސިލު ކުރުމަށް ކަނޑައެޅި ވައުދުތަކުގެ ތެރޭގައި ހިމެނޭ އައިޔޫއައި އަދި އައިވީއެފްގެ ފަރުވާތައް އާސަންދަ ސްކީމް މެދުވެރިކޮށް ފޯރުކޮށްދިނުމަށް "އައިޔޫއައި އަދި އައިވީއެފްގެ ފަރުވާ އާސަންދަ ސްކީމް މެދުވެރިކޮށްް ފޯރުކޮށްދިނުމާ ގުޅޭ އުސޫލު" އެއް ވަނީ އެކުލަވާލާފަ އެވެ.
މި އަހަރު އައިވީއެފް ފަރުވާއަށް އެހީ ހަމަޖައްސައި ދިނުމަށް ނިންމާފައި ވަނީ 100 ދެމަފިރިންނަށެވެ. އޭގެ ތެރެއިން ފުރަތަމަ ބުރުގެ އެހީ ދީފައި ވަނީ 37 ފަރާތަކަށެވެ.
އަދި ދެވަނަ ބުރަށް ފުުރުސަތު ހުޅުވާލުމުން މިދިޔަ ޖުލައި މަހުގެ ނިޔަލަށް 216 ފަރާތަކުން ފޯމު ހުށަހެޅި އެވެ. ފޯމުތައް ރިވިއުކޮށް މިދިޔަ މަހުގެ 31 ވަނަ ދުވަހު އާންމުކުރި ވަގުތީ ލިސްޓުގައި އައިވީއެފް ހެދުމުގެ ފުުރުސަތު 63 މީހަކަށް ދީފައިވެ އެވެ.
ނަމަވެސް ޝަކުވާ ހުށަހެޅުމަށް ހުޅުވާލި ފުރުސަތާ އެކު ފޯމުތައް އަލުން ރިވިއުކޮށް، އެންސްޕާއިން މިރޭ ނެރުނު ލިސްޓުގައި 64 މީހަކަށް އައިވީއެފް ހެދުމުގެ ފުރުސަތު ވަނީ ދީފަ އެވެ.
އެންސްޕާއިން ބުނީ ދެވަނަ ބުރުގައި އެހީ ހަމަޖެހިފައިވާ ފަރާތްތަކުން މި މަހުގެ 30 ވަނަ ދުވަހުގެ ކުރިން ފަރުވާ ކުރިއަށް ގެންދާނެ ގޮތުގެ ޕްލޭން ހިއްސާ ކުރުމާ ގުޅޭގޮތުން އެ އެޖެންސީން އެ ފަރާތްތަކަށް މައުލޫމާތު ފޯރުކޮށްދޭނެ ކަމަށެވެ.
Ads by STO
