މަސްވެރިންގެ އެވޯޑު ފަރުމާކޮށްދޭނެ ފަރާތެއް ހޯދަނީ، ހޮވޭ ޑިޒައިނަށް 15،000 ދޭނެ
މި އަހަރުގެ މަސްވެރިންގެ ދުވަހުގެ މުނާސަބަތުގައި ބާއްވާ ރަސްމީ ޖަލްސާގައި ދެވޭ އެވޯޑު ފަރުމާކޮށް، ހުށަހެޅުމުގެ ފުރުސަތު ފިޝަރީޒް އެންޑް އޯޝަން ރިސޯސަސް މިނިސްޓްރީން ހުޅުވާލައިފި އެވެ.
މަސްވެރިން ދުވަހުގެ މުނާސަބަތުގައި ކޮންމެ އަހަރަކު ވެސް ބާއްވަމުން އަންނަ ރަސްމީ ޖަލްސާގައި މަސްވެރިކަމުގެ ދާއިރާއަށް އެކި ގޮތްގޮތުން ހިދުމަތް ކޮށްދެއްވާފައިވާ ފަރާތްތަކުގެ އަގުވަޒަންކޮށް، އެވޯޑުދެ އެވެ.
ފިޝަރީޒް މިނިސްޓްރީން ބުނީ ހުށަހަޅާ ޑިޒައިނަކީ މަސްވެރިންގެ ދުވަހުގެ ޝިއާރު، މަސްވެރިކަމުގެ ސިނާއަތު ސިންދަފާތުކުރުމުގައި ޒުވާނުންގެ ބައިވެރިވުން އަދި މަސްވެރިކަމުގެ ސިނާއަތް އެކަށީގެންވާ ގޮތެއްގައި ރަމްޒުކޮށްދޭ ޑިޒައިނަކަށް ވާން ޖެހޭނެ ކަމަށެވެ. އެގޮތުން ޑިޒައިން އިހުތިޔާރު ކުރުމުގައި ޒަމާނުއްސުރެ ދެމެހެއްޓެނިވި ގޮތުއްގައި ދިވެހިން ކުރަމުން އައިސްފައިވާ ދޮށީގެ މަސްވެރިކަމާއި މަސްވެރިކަމުގެ ސިނާއަތް ސިންދަފާތު ކުރުމުގެ މުހިންމުކަން ދައްކުވައިދޭ ޒަމާނީ އަދި އިޖާދީ ހުށަހެޅުންތަކަށް އިސްކަންދޭނެ ކަމަށެވެ.
މިނިސްޓްރީން މިދިޔަ ބުދަ ދުވަހު ގެޒެޓުކުރި އިއުލާނުގައި ބުނީ އިއުލާނާ އެއްއުރަކުރެވިފައިވާ ކަރުދާހުގައި ޑިޒައިން ހުށަހަޅަން ޖެހޭ ގޮތުގެ ތަފުސީލާ އަދި ޑިޒައިންގައި ހިމަނަން ޖެހޭ ބައިތަކުގެ އިތުރު މައުލޫމާތު ހިމަނާފައިވާނެ ކަަމަށެވެ. ކޮންމެ ފަރާތަކަށް ވެސް ހުށަހެޅޭނީ 1 ޕްރޮޕޯސަލް ކަމަށާއި އެއްފަރާތަށް ވުރެ ގިނަ ފަރާތްތަކުން ގުޅިގެން އެއް ޕްރޮޕޯސަލެއް ހުށަހެޅިދާނެ ކަަމަށެވެ.
އަދި ހުށަހަޅާ ހުށަހެޅުންތަކުގައި ޑިޒައިންކޮށްފައިވާ އެވޯޑުގެ ދިގުމިނުގައި މަދުވެގެން 1 ފޫޓު ހުންނަންވާނެ ކަަމަށެވެ. އޭގެ އިތުރުން ޑިޒައިނަކީ ޑިޒައިން ހުށަހަޅާ ފަރާތުގެ އަމިއްލަ މަސައްކަތަކަށް ވާންވާނެ ކަމަށާއި ޕްރޮޕޯސަލް އާއެކު ޑިޒައިންގެ ވެކްޓަ ފައިލް ނުވަތަ 3ޑީ ރެންޑަ ފައިލް ހުށަހެޅިދާނެ ކަމަށެވެ.
ޑިޒައިން ހުށަހަޅަން ބޭނުންވާ ފަރާތްތަކުން މައުލޫމާތު ކަރުދާހުގައިވާ މިންގަނޑުތަކާ އެއްގޮތަށް އެވޯޑު ފަރުމާކޮށް ހުށަހަޅަން ހުޅުވާލާފައި ސުންގަޑި ހަމަވާނީ އަންނަ ބުދަ ދުވަހުގެ މެންދުރު 12:00 އަށެވެ. ޕްރޮޕޯސަލް އެ މިނިސްޓްރީއަށް އީމެއިލް ކުރަން ޖެހޭއިރު، އިތުރު މައުލޫމާތު ހޯދުމަށް މެއިލް ކުރުމަށް ނުވަތަ 3339224 ނޫނީ 3339229 އާ ގުޅުމަށް ފިޝަރީޒް މިނިސްޓްރީން އެދެ އެވެ.
އެ މިނިސްޓްރީން އިތުރަށް ބުނި ގޮތުގައި ޕްރޮޕޯސަލްތަކަށް އިންސާފުކުރާނީ އެކަމަށް އައްޔަންކުރާ ޕެނަލަކުން ކަމުގަ އެވެ. އަދި އެންމެ މަތިން މާކްސް ލިބިގެން މަސްވެރިންގެ ދުވަހުގެ ރަސްމީ ޖަލްސާގައި ދޭ އެވޯޑުގެ ގޮތުގައި ބޭނުން ކުރުމަށް ހޮވޭ ޑިޒައިން ފަރުމާކުރި ފަރާތަށް 15,000 ރުފިޔާގެ ފައިސާގެ އިނާމެއް ދޭނެ ކަމުގަ އެވެ.
Ads by STO
