ނިލަންދޫ ނަރުދަމާގެ މަސައްކަތް އެމްޑަބްލިއުއެސްސީއަށް
ފ. ނިލަންދޫގެ ނަރުދަމާ ނިޒާމު ޑިޒައިންކުރުމާއި އަމަލީ މަސައްކަތް ކުރިއަށް ގެންދިއުމުގެ އެއްބަސްވުމުގައި މާލެ ވޯޓާ އެންޑް ސެވެރެޖް ކޮމްޕެނީ، އެމްޑަބްލިއުއެސްސީ އާއެކު ސޮއިކޮށްފި އެވެ.
އެ މަސައްކަތް ކުރިން ހަވާލު ކޮށްފައިވަނީ ފެނަކައާ އެވެ. އެ މަޝްރޫއު ފެނަކައާއި ހަވާލު ކޮށްފައިވަނީ މިދިޔަ އަހަރުގެ ޖެނުއަރީ 25 ވަނަ ދުވަހު އެވެ. އޭރު އެ މަޝްރޫއު ފެނަކައާއި ހަވާލު ކޮށްފައިވަނީ 180 ދުވަހުގެ މުއްދަތުގެ ތެރޭގައި މަސައްކަތް ނިންމާ ގޮތަށެވެ.
ކޮންސްޓްރަކްޝަން މިނިސްޓްރީގައި މިއަދު ކުރިއަށްދިޔަ ރަސްމިއްޔާތުގައި، އެ އެއްބަސްވުމުގައި ސޮއިކުރެއްވީ މިނިސްޓްރީގެ ފަރާތުން ސްޓޭޓް މިނިސްޓަރު އިބްރާހިމް ތާއާމް މުހައްމަދެވެ. އަދި އެމްޑަބްލިއުއެސްސީގެ ފަރާތުން އެއްބަސްވުމުގައި ސޮއި ކުރެއްވީ އެ ކުންފުނީގެ މެނޭޖިން ޑިރެކްޓަރު އަބްދުލް މަތީން މުހައްމަދެވެ.
އެ ރަސްމިއްޔާތުގައި ނިލަންދޫ ދާއިރާގެ މެންބަރު ފާތިމަތު ސައުދާ ވެސް ބައިވެރިވެ ވަޑައިގެންނެވި އެވެ.
މިނިސްޓްރީން ބުނީ، އެ މަޝްރޫއުގެ ދަށުން މިހާރު ބޭނުންކުރަމުންދާ ވެކިއުމް ނިޒާމުގެ ސަބަބުން ރައްޔިތުންނަށް ދިމާވަމުންދާ ދަތިތައް ހައްލުކުރުމަށްޓަކައި، މިހާރު ހުރި ނަރުދަމާ ނިޒާމު ގްރެވިޓީ ނިޒާމަކަށް ބަދަލުކުރެވޭނެ ކަމަށެވެ.
މަޝްރޫއު ނިމުމުން ނަރުދަމާ ނިޒާމު ބޭނުންކުރަން ފަސޭހަވުމުގެ އިތުރުން، ރަށުގެ ތިމާވެށި ރައްކާތެރިކުރުމަށާއި ރައްޔިތުންގެ ދިރިއުޅުމުގެ ފެންވަރު ރަނގަޅުވެގެންދާނެ ކަމަށް މިނިސްޓްރީން ބުންޏެވެ.
