ވޭޕް ޝިޕްމެންޓާ ގުޅިގެން ހާމަކުރި މައުލޫމާތުން އެނގުނީ ހާމަކަން ބޮޑުކަމާއި އިންސާފުވެރިކަން: އިހްސާން
މަސްތުވާތަކެތީގެ ބާވަތެއް ކަމަށްވާ ކެނަބިސް ހުރި ކަމަށް ބުނެ މޯލްޑިވްސް ކަސްޓަމުން ހިފެހެއްޓި ވޭޕް އޮއިލް ޝިޕްމެންޓާ މެދު ފުލުހުން އަމަލުކުރި ގޮތުން ހާމަވީ ރާއްޖެ އެތެރެކުރާ ތަކެތި މަސްތުވާތަކެއްޗަށް ޝައްކުކުރެވޭ ހާލަތުގައި އަމަލުކުރާ ޕްރޮސެސްގެ ހާމަކޮށް ބޮޑުކަމާ އަދި އިންސާފުވެރިކަން ކަމުގައި ހޯމްލޭންޑް ސެކިއުރިޓީ އެންޑް ޓެކްނޯލޮޖީ މިނިސްޓަރު އަލީ އިހްސާން ވިދާޅުވެއްޖެ އެވެ.
ވޭޕް އޮއިލް ނަމުގައި ރާއްޖެ އެތެރެކުރި މަސްތުވާތަކެތީގެ ބާވަތެއް ކަމަށްވާ ކެނަބިސް އަޅާފައިވާ ޝިޕްމަންޓެއް ކަސްޓަމުން ހިފެހެއްޓީ އޮކްޓޫބަރު މަހުގެ 14 ވަނަ ދުވަހު އެވެ. އެ ވާހަކަ ހިއްސާކުރެއްވީ "އެކްސް" މެދުވެރިކޮށް މިނިސްޓަރު އިހްސާނެވެ.
ފުލުހުން އިއްޔެ ބުނެފައި ވަނީ ވޭޕް އޮއިލްގެ ނަމުގައި ރާއްޖެ އެތެރެކުރި ކެނަބިސް ޝިޕްމެންޓްއެއް ކަމަށް ބުނާ ޝިޕްމެންޓުގައި ހުރި ތަކެތި ޓެސްޓް ކޮށްފައިވާ ކަމަށާއި އެ ތަކެތި ޑްރަގްއަށް ނެގެޓިވްވެފައިވާ ކަމަށެވެ.
އެކަމާ ގުޅިގެން "އެކްސް" ގައި ރޭ ކުރެއްވި ޕޯސްޓެއްގައި އިހްސާން ވަނީ މަސްތުވާތަކެއްޗަށް ޝައްކުކުރެވޭ ތަކެތި ޓެސްޓު ކުރުމުގެ މަރުހަލާ ކުރިއަށްގެންދާ ގޮތް އޮޅުންފިލުވައި ދެއްވާފަ އެވެ. ވިދާޅުވީ އެއާޕޯޓުގައި ކަސްޓަމަށް ޝައްކު ކުރެވޭ ޕެކޭޖުތަކާއި ތަކެތީގެ ރެޕިޑް ޓެސްޓު ކުރާ ކަމަށެވެ. އެގޮތުން ކުރެވޭ ޓެސްޓަކުން ޕޮޒިޓިވްވެއްޖެ ނަމަ އެފަދަ ތަކެތި ހިފަހައްޓައި ތަހުގީގަށް ހަވާލުކުރެވޭ ކަމަށެވެ.
ވޭޕް ޝިޕްމެންޓުގެ ޓެސްޓުގެ ފޮޓޯއަކާ އެކު ކުރެއްވި ޕޯސްޓުގައި މިނިސްޓަރު ވިދާޅުވި ގޮތުގައި ހެދި ޓެސްޓުން ކެނަބިސްއަށް ޕޮޒިޓިވްވެފައިވާ ކަމުގަ އެވެ.
"ނަމަވެސް އާންމު އުސޫލުން މި ތަކެތި ތަހުގީގަށް ފުލުހުންނާ ހަވާލުކުރެވި، ލެބޯރެޓަރީ ޓެސްޓް ހަދާ. އަދި އެ ޓެސްޓަށް އާންމުކޮށް 2 ދުވަހާއި 7 ދުވަހާ ދެމެދުގެ މުއްދަތެއް ނަގާފާނެ. މި ޓެސްޓާއި ރެފިޑް ޓެސްޓް ނަތީޖާ ދިމާނުވެއްޖެ ނަމަ، އިތުރަށް ކޮންފާމެޓްރީ ޓެސްޓުތައް ހަދާނެ،" އިހްސާން ވިދާޅުވި އެވެ.
ތަހުގީގަށް ނަތީޖާ ބޭނުންކުރާނީ ކޮންފާމެޓްރީ ޓެސްޓް ހެދުމަށްފަހު ޝައްކެއް ނެތް މިންވަރަށް ޔަގީން ވުމުން ކަމުގަ އެވެ. އެކި މީޑިއާތަކުން ޝިޕްމެންޓުގެ ވެރިފަރާތުގެ މައުލޫމާތު ހޯދަން އެދުމުން އެ މައުލޫމާތު އާންމުނުކުރީ ލެބޯރެޓަރީ ކޮންފަމޭޝަން ނުލިބޭތީކަން ފާހަގަކުރެއްވި އެވެ.
އިހްސާން އިތުރަށް ވިދާޅުވީ އެ ޝިޕްމެންޓް ހިފެހެއްޓި ވާހަކަ ހިއްސާ ކުރުމަށް ނިންމީ މި އަހަރު މިފަދަ އެތައް ކޭސްތަކެއް އަދި މިދިޔަ އަހަރު ވެސް މިފަދަ ވޭޕް އޮއިލް ޝިޕްމެންޓުތަކުގައި ކެނަބިސް ހުރި ކަމަށް ޔަގީން ކުރެވިފައިވާތީ މުޖުތަމައުގެ ކަންބޮޑުވުން އޮތް މައްސަލައަކަށް ވާތީ ކަމަށެވެ.
"ފުލުހުން މިއަދު ހާމަކުރި މައުލޫމާތުން އެނގިގެން ދަނީ މި ޕްރޮސެސްގެ ހާމަކަން ބޮޑުކަން އަދި އިންސާފުވެރިކަން،" އިހްސާން ވިދާޅުވި އެވެ.
ރައްޔިތުންގެ ސަލާމަތާއި ރައްކާތެރިކަމަކީ އެންމެ އިސްކަންދޭނެކަން ކަމަށާއި ކުރިއަށް އޮތް ތަނުގައި ވެސް މިފަދަ ކަންކަމުގައި އަމަލުކުރެވޭނީ އެގޮތަށް ކަމުގައި ހޯމްލޭންޑް މިނިސްޓަރު ފާހަަގަކުރެއްވި އެވެ.
