2 ގަޑިއިރު ނުވަނީސް ގާނޫނު އަސާސީ އިސްލާހުކުރާ ބިލުގެ ބަހުސް ނިންމާ، ކޮމިޓީއަށް

ގާނޫނު އަސާސީއަށް އިސްލާހު ގެނައުމަށް ހުށަހެޅި ބިލު ރައްޔިތުންގެ މަޖިލީހުން ބަލައިގަނެ، މުޅި މަޖިލިސް ކޮމިޓީއަށް ފޮނުވައިފި އެވެ.

Ads by STELCO

ސަރުކާރުގެ ފަރާތުން ހުޅުދޫ ދާއިރާގެ ކޮންގްރެސް ޕާޓީގެ މެމްބަރު މުހައްމަދު ޝާހިދު ހުށަހަޅުއްވާފައިވާ އެ ބިލަކީ، ރާއްޖޭގެ ކަނޑުގެ ސަރަހައްދުތަކަށް ބަދަލު ގެނައުމުގައި މަޖިލިހުގެ އަގުލަބިއްޔަތު ހޯދަން ޖެހޭ ގޮތަށާއި މަޖިލިސް މެމްބަރުން އިންތިހާބުވި ހައިސިއްޔަތު ބަދަލުވުމުން ގޮނޑި ގެއްލޭ ގޮތަށް ގާނޫނު އިސްލާހު ކުރުމަށް ހުށަހެޅި ބިލެކެވެ.

އޭގެ އިތުރުން ގައުމީ ތަރައްގީގެ ޕްލޭން އެކުލަވާލުމުގެ ބާރު ރައީސުލްޖުމްހޫރިއްޔާ ލިބިވަޑައިގަންނަވާ ގޮތަށާއި ރާއްޖޭގެ ސަރަހައްދު އަސްކަރީ ބޭނުމަކަށް ބޭނުން ކުރުމަށް ބޭރުގެ ސިފައިންނަށް ހުއްދަ ދެވޭނީ ރައްޔިތުންގެ މަޖިލީހުން ފާސްކޮށްގެން ކަމަށާ އަދި ރައްޔިތުންގެ ހިޔާލު ހޯދުމުގެ މާއްދާ އިސްލާހު ކުރެވޭނީ ރައްޔިތުންގެ ހިޔާލުން ކަމުގައި ބުނާ މާއްދާއަށް އިސްލާހު ގެނައުން ވެސް ބިލުގައި ހިމެނެ އެވެ.

ބިލު މުޅި މަޖިލިސް ކޮމިޓީއަކަށް ފޮނުވަން ހުށަހެޅުއްވީ މަޖިލިހުގެ ނައިބު ރައީސް އަދި ދިއްގަރު ދާއިރާގެ ކޮންގްރެސް ޕާޓީގެ މެމްބަރު އަހުމަދު ނާޒިމެވެ. އެ ހުށަހެޅުއްވުމަށް ކޮންގްރެސް ޕާޓީގެ ޕީޖީ ލީޑަރު އަދި އިނގުރައިދޫ ދާއިރާގެ މެމްބަރު އިބްރާހިމް ފަލާހު ތާއީދު ކުރެއްވުމުން ނެގި ވޯޓުން ކޮމިޓީއަށް ފޮނުވަން ފާސްވީ 71 މެމްބަރުންގެ ތާއީދާ އެކުގަ އެވެ. ކޮމިޓީއަށް ފޮނުވަން ނުފެންނަ ކަމަށް 12 މެމްބަރަކު ވޯޓު ދެއްވި އެވެ.

އެ ބިލުގެ ބަހުސް 2 ގަޑިއިރު ނުވަނީސް ނިންމާލާފައިވާއިރު، ބަހުސްގައި ބައިވެރިވެ ވަޑައިގެންނެވީ 13 މެންބަރުންނެވެ. އިދިކޮޅު އެމްޑީޕީއަށް ދިން ވަގުތު ހަމަވިއިރު، އެ ޕާޓީން ބަހުސްގައި ބައިވެރިވެ ވަޑައިގެންނެވީ 7 މެންބަރެކެވެ. ދެން ބައިވެރިވެ ވަޑައިގެންނެވީ ކޮންގްރެސް ޕާޓީގެ 5 މެންބަރުންނާ އަދި އަމިއްލަ މެންބަރެކެވެ.