ފުލުހަކަށް ހަމަލާދޭން އުޅުނު މީހާގެ ވަނަވަރު އާއްމުކޮށްފި
ހުޅުމާލެ ފޭސް އެކެއްގައި ތޫނު އެއްޗަކުން ފުލުހަކަށް ހަމަލާ ދޭން އުޅެނިކޮށް ހައްޔަރު ކުރި މީހާގެ ވަނަވަރު އާއްމުކޮށްފި އެވެ.
ފުލުހުން މިހާރު އަމަލުކުރަމުންދާ އުސޫލުގެ ދަށުން އެ މައްސަލާގައި ހައްޔަރުކުރި މީހާގެ ފޮޓޯ އާއި ވަނަވަރު މިއަދު އާއްމުކޮށްފައިވެ އެވެ.
އެ މީހަކީ އދ. ދަނގެތި، ލިލީގެ ހުސައިން ފާއިގް (33އ) އެވެ.
އިއްޔެ މީޑިއާތަަކަށް ފޮނުވި މެސެޖެއްގައި ފުލުހުން ބުނީ ތޫނު އެއްޗަކުން ހަަމަލާ ދޭން އުޅުނު ކަމުގެ ރިޕޯޓުކޮށްފައިވަނީ ރޭ 06:30 ހާއިރު ކަމަށެވެ.
އެސިސްޓެންޓް ކޮމިޝަނަރު އޮފް ޕޮލިސް އަހްމަދު ޝިފާން "އެކްސް" ގައި ކުރެއްވި ޕޯސްޓެއްގައި ވިދާޅުވީ މީހަކަށް ވަޅިން ހަމަލާދޭން އުޅުނު މީހާ ހުއްޓުވަން އުޅުނު ފުލުސް އޮފިސަރަށް ވެސް ހަމަލާދޭން އުޅެފައިވާ ކަމަށެވެ. އެނގިފައިވާ ގޮތުން އޭނާ އެންމެ ފުރަތަމަ ހަމަލާދޭން އުޅުނީ މަގުރިބު ނަމާދުކުރަން ހުރި މުދިމަކަށެވެ.
ހަމަލާދޭން އުޅުނު މީހާ ފުލުހުންގެ ބެލުމުގެ ދަށަށް ގެންދާ މަންޒަރު ފެންނަ ވިޑީއޯއެއް ސޯޝަލް މީޑިއާގައި ދަނީ ދައުރުވަމުންނެވެ. އެ ވީޑިއޯއިން ފެންނަ ގޮތުން އެމީހާއަށް ވެސް ކޮންމެވެސް ވަރެއްގެ އަނިޔާތަކެއް ލިބިފައިވެ އެވެ.
އެ މައްސަލަ އިތުރަށް ތަހުގީގު ކުރަމުންދާ ކަމަށް ފުލުހުން ބުންޏެވެ.
