އޭސީސީ އާއި އީސީގެ ރައީސް އަދި ނައިބު ރައީސް އައްޔަނުކުރުމުގެ ބާރު ރައީސަށް ލިބޭ ބިލު ތަސްދީގުކޮށްފި
ރައީސުލްޖުމްހޫރިއްޔާ އަށް, އެންޓި ކޮރަޕްޝަން ކޮމިޝަން (އޭސީސީ) އަދި އިލެކްޝަންސް ކޮމިޝަން (އީސީ) ގެ ރައީސް އާއި ނައިބު ރައީސް އައްޔަނުކުރެވޭ ގޮތަށް ދެ ގާނޫނަކަށް އިސްލާހު ގެނައުމުގެ ބިލު ރައީސް ޑރ މުހައްމަދު މުއިއްޒު މިއަދު ތަސްދީގު ކުރައްވައިފި އެވެ.
ސަރުކާރުގެ ފަރާތުން ފެލިދޫ ދާއިރާގެ މެންބަރު އާދަމް ޒާހިރު ހުށަހެޅުއްވި އެ ބިލު ފާސްކޮށްފައިވަނީ އިއްޔެ ބޭއްވި ރައްޔިތުން މަޖިލީހުގެ 53 ވަނަ ޖަލްސާގަ އެވެ. އެ ދެ ބިލު ފާސްކޮށްފައިވަނީ 69 މެންބަރުންގެ ވޯޓުންނެވެ. އެ ދެ ބިލާ ދެކޮޅަށް ވޯޓު ދެއްވީ 10 މެންބަރެކެވެ.
އެ ބިލަކީ މުސްތަގިއްލު ކޮމިޝަންތަކުގެ ހިންގުން ހަރުދަނާކޮށް ކޮމިޝަންތަކަށް އައްޔަނުކުރާ މެމްބަރުންގެ ތެރެއިން އެ ކޮމިޝަންތަކުގެ ރައީސް އާއި ނައިބު ރައީސްގެ މަގާމަށް މެމްބަރުން އައްޔަނުކުރުމުގައި އަމަލުކުރަމުން އަންނަ އުސޫލު އެއްހަމަ ކުރުމަަށްޓަކައި ގެންނަ އިސްލާހުތަކެއް ކަމަށް އެ ދެ ބިލުގައި ބުނެފައިވެ އެވެ.
އެ އިސްލާހުގެ ދަށުން އޭސީސީ އާއި އީސީގެ ރައީސާއި ނައިބު ރައީސް އައްޔަންކުރާ އުސޫލަށް ބަދަލު ގެނެވިފައިވެ އެވެ. އެ އިސްލާހުގައިވާ ގޮތުން ކޮމިޝަނުގެ މެންބަރުންގެ ތެރެއިން ކޮމިޝަނުގެ ރައީސަކާއި ނައިބު ރައީސެއް އައްޔަނުކުރައްވާނީ ރައީސް އެވެ.
އެ ދެ ކޮމިޝަނުގެ ރައީސް ނުވަތަ ނައިބު ރައީސް އިސްތިއުފާ ދިނުމުގެ އިޖުރާއަތްތަކަށް ވެސް ވަނީ ބަދަލު ގެނެސްފައިވެ އެވެ.
ކޮމިޝަނުގެ ރައީސް އަދި ކޮމިޝަނުގެ ނައިބު ރައީސް މަގާމުން އިސްތިއުފާ ދޭން ބޭނުންވެއްޖެ ނަމަ، އިސްތިއުފާގެ ސިޓީ ހުށަހަޅަން ޖެހެނީ ރައީސުލްޖުމްހޫރިއްޔާއަށެވެ.
މިހާރު ގާނޫނުގައިވާ ގޮތުން ދެ ކޮމިޝަންގެ ރައީސް އާއި ނައިބު ރައީސް ހޮވަނީ ކޮމިޝަންގެ މެމްބަރުންގެ މެދުގައި ނަގާ ވޯޓަކުންނެވެ.
Ads by STO
