ދައުލަތުގެ ދަރަންޏާ ބެހޭ ބިލާއި ފިސްކަލް ޒިންމާގެ ބިލް މަޖިލީހުން ފާސްކޮށްފި
ދައުލަތުގެ ދަރަންޏާ ބެހޭ ބިލާއި ފިސްކަލް ޒިންމާގެ ބިލު ރައްޔިތުންގެ މަޖިލީހުން މިއަދު ފާސްކޮށްފި އެވެ.
އެ ދެ ބިލް ފާސްކޮށްފައިވަނީ މަޖިލީހުގެ މާލިއްޔަތު ކޮމިޓީން ދިރާސާކުރުމަށްފަހު އެވެ.
ދައުލަތުގެ ދަރަންޏާބެހޭ ބިލު މަޖިލީހަށް ހުށަހެޅުއްވީ ފުނަދޫ ދާއިރާގެ ޕީއެންސީ މެންބަރު މުހައްމަދު މަމްދޫހެވެ.
އެ ބިލުގައި ބުނާ ގޮތުން ބިލު ގާނޫނަކަށް ބަދަލުވާތާ 6 މަސް ދުވަހުގެ ތެރޭގައި ރާއްޖޭގައި ދަރަނި މެނޭޖުކުރުމަށް ހާއްސަ އޮފީހެއް ގާއިމްކުރަން ޖެހެ އެވެ. އެއާއެކު ފިނޭންސް މިނިސްޓްރީގެ ދަރަނި މެނޭޖްކުރާ ޑިޕާޓްމަންޓްގެ ހުރިހާ މަސައްކަތެއް އެ އޮފީހުގެ ދަށަށް ބަދަލުވެގެންދާނެ ކަމަށް ބިލުގައި ބުނެ އެވެ.
ދަރަންޏާ ބެހޭ މައުލޫމާތު ހާމަކުރުމާއި ރިޕޯޓްކުރުމާއި ކައުންސިލްތަކާއި ސަރުކާރުގެ ކުންފުނިތަކުން ނަގާ ދަރަންޏަށް ސޮވެރިން ގެރެންޓީ ދިނުމާބެހޭ އުސޫލުތައްވެސް ބިލުގައި ބަޔާންކޮށްފައިވެ އެވެ.
އޭގެ އިތުރުން ކޮންމެ ކުއާޓާއެއް ނިމޭތާ 45 ދުވަސް ތެރޭގައި ޑެޓް ބުލެޓިންއެއް ޝާއިރުކުރަން ޖެހޭނެ ކަމަށާއި އޭގައި ދަރަނީގެ ބާކީ ހުރި މިންވަރާއި ފައިސާގެ ބާވަތާއި ދަރަނީގެ ޕޯޓްފޯލިއޯއަށް އޮތް ގޮންޖެހުންތައް ހިމަނަންވާނެ ކަމަށް ބިލުގައި ބުންޏެވެ.
އެ ބިލުގަ ބުނެފައިވަނީ ދަރަނި މެނޭޓްކުރުމާ ގުޅޭ އަހަރީ ރިޕޯޓް އެކުލަވާލާ, އެ ރިޕޯޓު ޖެހިގެން އަންނަ އަހަރުގެ ފުރަތަމަ ކުއާޓާ ނިމޭތާ 30 ދުވަހުގެ ތެރޭގައި މަޖިލީހަށް ހުށަހަޅައިގެން މިނިސްޓްރީން އާންމުކޮށް ޝާއިއުކުރަން ޖެހޭނެ ކަމަށެވެ.
އެ ބިލު ފާސްކޮށްފައިވަނީ 80 މެންބަރުންގެ އިއްތިފާގުންނެވެ.
ފިސްކަލް ޒިންމާގެ ބިލް މަޖިލީހަށް ހުށަހެޅުއްވީ ސަރުކާރުގެ ފަރާތުން ތުލުސްދޫ ދާއިރާގެ ޕީއެންސީ މެންބަރު އިބްރާހީމް ނަސީމެވެ.
އެ ބިލު ހުށަހެޅުމުގެ ބޭނުމެއްގެ ގޮތުގައި ބުނެފައިވަނީ ދައުލަތުގެ ހަރަދަށް ޒިންމާވުމުގެ ގާނޫނުގެ ބަދަލުގައި އެކަށީގެންވާ ގޮތެއްގައި ތަންފީޒުކުރެވޭނެ ފިސްކަލް ހަމަތަކާގުޅޭ އައު ނިޒާމެއް ތައާރަފުކޮށް ދައުލަތުގެ ފިސްކަލް އެންމެހާ ކަންކަން ހިންގަނީ ދެމެހެއްޓެނިވި، ދެފުށް ފެންނަ އަދި ޒިންމާދާރު ގޮތެއްގައިކަން ކަށަވަރުކުރުން ކަމަށެވެ.
އެ ބިލްގައި ބުނާ ގޮތުން ފިނޭންސް މިނިސްޓްރީން ފިސްކަލް ޕޮލިސީ އެކުލަވާލަންޖެހޭއިރު ކޮންމެ ރިޔާސީ ދައުރެއް ފެށޭތާ 6 މަސްދުވަހުގެ ތެރޭގައި އެ ސަރުކާރެއްގެ ފަސް އަހަރުގެ ފިސްކަލް ޒިންމާގެ ޗާޓަރު އެކުލަވާލައި ގެޒެޓުގައި ޝާއިއުކުރަންވާނެ އެވެ.
އެ ބިލް ފާސްކޮށްފައިވަނީ 81 މެންބަރުންގެ އިއްތިފާގުންނެވެ.
