ޑޮލަރުގެ މައްސަލައަށް ހައްލު ހޯދޭނީ ކަޅު ބާޒާރު ނައްތާލާ ބޭންކުތަކަށް ޑޮލަރު ވައްދައިގެން: ގަވަރުނަރު
ރާއްޖޭގައި އޮތީ ޑޮލަރުގެ ކަޅު ބާޒާރެއް އުފެދިފައި ކަމަށާއި އެ ބާޒާރު ނައްތާލައި މުޅި މައްސަލައަށް ހައްލު ހޯދޭނީ ބޭންކުތަކަށް ޑޮލަރު ވައްދައިގެން ކަަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ގަވަރުނަރު އަހްމަދު މުނައްވަރު ވިދާޅުވެއްޖެ އެވެ.
އެމްއެމްއޭގައި މިއަދު ބޭއްވި ނޫސްވެރިންގެ ބައްދަލުވުމުގައި މުނައްވަރު ވިދާޅުވީ މިހާރަށް ދިމާވެފައިވާ އެންމެ ބޮޑު ގޮންޖެހުމަކީ ކުރިއަށް އޮތް 2 އަަހަރު ދުވަހުގެ ތެރޭގައި އަދާކުރަން ޖެހިފައިވާ ދަރަނިތައް ކަމަށެވެ. އެކަން ކުރަން ބަލާއިރު ރިޒާވްގައި ފައިސާ ނެތިއްޖެ ނަމަ އެކަމުގެ ސަބަބުން ގައުމު ޑިފޯލްޓްވާ ހާލަތަކަށް ވެސް ގޮސްދާނެ ކަމަށެވެ. ރިޒާވް އިތުރުކުރުމަކީ އެމްއެމްއޭއަށް ގާނޫނީ ގޮތުން އޮތް ޒިންމާއެއް ކަމުގައި ފާހަގަކުރެއްވި އެވެ.
"އަޅުގަނޑުމެންގެ ރިޒާވް އޮތީ ވަރަށް ބޮޑަށް ޕެސިވްކޮށް ސަރުކާރަށް އެކަނި. އޭގެ ބަދަލުގައި މިހާރު އަޅުގަނޑުމެން މަސައްކަތް ކުރަނީ އެކްޓިވްލީކޮށް އަޅުގަނޑުމެންގެ ރިޒާވް އިތުރުކުރުމަށް ޓަކައި އިންޑަސްޓްރީ އާ ގުޅިގެން،" މުނައްވަރު ވިދާޅުވި އެވެ.
ދާއިރާގައި ހަރަކާތްތެރިވާ ފަރާތްތަކާ މަޝްވަރާކޮށް ދެވެން އޮތް ލުއިތައް ދޭނެ ކަމުގައި ވިދާޅުވި އެވެ. އާ ކެޓަގަރީއެއް އިތުރުވުން ފިޔަވައި ގަވާއިދުގައިވާ އެއްވެސް ކަމަކަށް ލުއި ދީފައި ނުވާނެ ކަމަށެވެ.
ގަވަރުނަރު ވިދާޅުވި ގޮތުގައި މިހާރު ރުފިޔާ ހުރީ އެންމެ ބޭންކެއްގައި ކަމަށާއި އޯޕަން މާކެޓް އޮޕަރޭޝަންތައް ފަށަން ޖެހޭ ކަމުގަ އެވެ. އެއީ ވަރަށް ތަފާތު އޮޕަރޭޝަނެއް ކަމުން ކުރިން ކުރަމުން އައި ގޮތަށް އެކަން ނުކުރެވޭނެ ކަމުގަ އެވެ. އަދި އެ މަސައްކަތް ބޯޑާއި އައިއެމްއެފްގެ ލަފަޔާ އެކު ކުރިއަށް ގެންދާކަން ފާހަގަކުރެއްވި އެވެ. މި އަހަރުގެ ތެރޭގައި އެކަމަށް މަސައްކަތް ފެށޭނެކަން ވިދާޅުވި އެވެ.
"މިހާރު އޮތީ ބޭންކް ނޫން އިންފޯމަލް މާކެޓެއް ތަރައްގީވެފައި. އަޅުގަނޑުމެން މިކުރާ މަސައްކަތަކީ އިންފޯމަލް މާކެޓުން ފޯމަލް މާކެޓަށް ގެނައުމަށް ޓަކައި ކުރަމުންދާ މަސައްކަތްތަކެއް،" މުނައްވަރު ވިދާޅުވި އެވެ.
ފަތުރުވެރިކަމުގެ ސިނާއަތުގައި ހަރަކާތްތެރިވާ ފަރާތްތަކަށް ދިމާވާ ދަތިތަކާ ގުޅޭގޮތުން ބޭންކުތަކާ އެކު މަޝްވަރާކުރަން އެމްއެމްއޭއިން ތައްޔާރަށް އޮތް ކަމުގަ އެވެ.
ކުރީގެ ފިނޭންސް މިނިސްޓަރު ވިދާޅުވީ ބޭންކިން ނިޒާމުގައި ހުރި ގިނަ މައްސަލަތަކަށް ހައްލު ހޯދުމަށް ބޭންކިން ގާނޫނަށް އިސްލާހުތައް ގެންނަން ޖެހޭ ކަމަށެވެ. ރާއްޖޭގައި 170 ރިސޯޓު ހެދުނުއިރު، ބޭންކުގެ ޑިޕޮސިޓުތަކުގައި އެ އަދަދު ފެންނަން ނެތް ކަމަށެވެ. އެ ނެތުމުން ފައިނޭންޝަލް ސެކްޓާ ހީނަރުވެފައިވާ ކަމަށެވެ. ބޭންކުތައް ތަރައްގީ ކުރެވޭނީ ޑޮލަރު ވަދެގެންކަން ފާހަގަކުރެއްވި އެވެ.
"ރާއްޖޭގައި މިހާހިސާބަށް އައިއިރު، ޓޫރިޒަމް އިންޑަސްޓްރީއަކީ ވަކި އިކޮނޮމީއެއްގެ ގޮތުގައި، ބައެއް ބޭފުޅުން ވިދާޅުވެދާނެ މިއަށް ހާއްސަ ޒޯނެއްގެ ގޮތުގައި. އޭގެ ނަތީޖާއަކީ ހަގީގަތުގައި ރިއަލް ސެކްޓާއޭ ކިޔާ މި ދޭތި ނެތް މާޖްކުރެވިފައެއް،" މުނައްވަރު ވިދާޅުވި އެވެ.
އެކަން ހައްލުކުރެވެން އޮތީ ފޮރިން އެކްސްޖޭންޖް ކުރެވިގެން ކަމަށެވެ. އުންމީދަކީ ދިވެހިންނަށް އިތުރަށް ޑޮލަރަށް ނުޖެހި ތިޔާގިކަމާ އެކު ޑޮލަރު ލިބޭނެ ގޮތަކަށް ބޭންކުތަކަށް އެ ފައިސާ ވަނުން ކަމުގައި ވިދާޅުވި އެވެ. އިންފޯމަލް މާކެޓުތަކުގެ ބަދަލުގައި ފޯމަލް މާކެޓުތަކަށް ޑޮލަރު ވަންނަން ފެށުމުން އެމްއެމްއޭއަށް ވެސް ޑޮލަރު ލިބޭނެ ކަމަށެވެ. އެ އޮތޯރިޓީއަށް ލިބޭ 60 އިންސައްތަ ފައިސާ އަނބުރާ ގައުމީ ބޭންކް، ބޭންކް އޮފް މޯލްޑިވްސް (ބީއެމްއެލް) ނުވަތަ އެހެން ބޭންކުތަކަށް ދީގެން ވިޔަފާރިވެރިންނަށާއި އާންމުންނަށް އިތުރަށް ޑޮލަރު ލިބޭނެ ގޮތްތައް ފަހިކުރަން ކަމުގައި ގަވަރުނަރު ފާހަގަކުރެއްވި އެވެ.
