ކުރާ ތުހުމަތުތައް ތަހުގީގުކޮށްދޭން އެންސްޕާއިން އޭސީސީގައި އެދިއްޖެ
އެ އެޖެންސީއަށް ތުހުމަތުކޮށް ފަތުރަމުންދާ ވާހަަކަތަކާ ގުޅޭ މިނިވަން ތަހުގީގެއް ހިންގައި، އެ ކަންކަމުގެ ތަފުސީލު ރައްޔިތުންނަށް ހާމަކޮށްދިނުމަށް ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އިން އެންޓި ކޮރަޕްޝަން ކޮމިޝަން (އޭސީސީ) ގައި އެދިއްޖެ އެވެ.
ސޯޝަލް މީޑިއާގައި ދައުރުވަމުން އަންނަ ލިޔެކިޔުންތަކާ ހަވާލާދީ ބައެއް ނޫސްތަކުގައި ރިޕޯޓުކޮށްފައިވާ ގޮތުގައި މިފަހުން ލޯންޗްކުރި "އެމްއެމް" ޓީވީ ހިންގާ ކުންފުނި، މޯލްޑިވްސް މީޑިއާ ހައުސް އާއެކު އެންސްޕާއިން 34.8 މިލިއަން ރުފިޔާގެ އެއްބަސްވުމެއް ވަނީ ހަދާފަ އެވެ. އެއީ އެންސްޕާ ހިންގަން މއ. ސީރާޒީގެއިން 2 ފަންގިފިލައެއް 5 އަހަރު ދުވަހަށް ކުއްޔަށް ހިފުމާ ގުޅޭ އެއްބަސްވުމެކެވެ.
ފިނޭންސް މިނިސްޓްރީން ހިންގާ ޓެންޑާ ބޯޑު މެދުވެރިކޮށް ހަދާފައިވާ އެއްބަސްވުމުގެ ދަށުން މީޑިއާ ހައުސްއިން 4 ފަންގިފިލައެއް ކުއްޔަށް ހިފާފައިވާއިރު، އޭގެ ތެރެއިން 2 ފަންގިފިލާ ދޫކޮށްފައި ވަނީ އެންސްޕާއަށެވެ. އަނެއް 2 ފަންގިފިލާ ބޭނުންކުރަމުންދަނީ "އެމްއެމް" ޓީވީގެ ބޭނުމަށެެވެ. އެހެންނަމަވެސް 4 ފަންގިފިލާއަށް މަހަކު ދައްކަން ޖެހޭ 580،000 ރުފިޔާ ހަމަޖައްސަނީ އެންސްޕާ މެދުވެރިކޮށް ކަމަށް ބުނެފައިވެ އެވެ.
އެންސްޕާ އާ ބެހޭގޮތުން ނޫސްތަކުގައި ފަތުރަމުންދާ ވާހަކަތަކާ ގުޅިގެން އެ އެޖެންސީން މިރޭ ނެރުނު ނޫސް ބަޔާނެއްގައި ބުނީ އެ ވާހަކަތަކަކީ ހަގީގަތާ ހިލާފު ދޮގު ވާހަކަތަކެއް ކަމަށެވެ.
"މި އެޖެންސީ ހިންގަން އިމާރާތެއް ހޯދުމުގެ މުއާމަލާތަކީ މާލީ ވުޒާރާ އާއި މި އެޖެންސީ އާ ދެމެދު އެކަން ކުރުމަށް ކަނޑައެޅިފައިވާ ގަވާއިދާ އުސޫލުތަކުގެ ތެރެއިން ކުރެވިފައިވާ މުއާމަލާތެކެވެ. އެއީ މި އެޖެންސީ އާއި އެހެން އެެއްވެސް ފަރާތަކާ ދެމެދު ކުރެވިފައިވާ މުއާމަލާތެއް ނޫނެވެ،"
އެއީ އާންމު މައުލޫމާތުގެ ގޮތުގައި ހާމަކަން ބޮޑު ގޮތެއްގައި ފިނޭންސް މިނިސްޓްރީގެ މަންސަތަކުގައި ފެންނަން ހުރި މައުލޫމާތުތަކެއް ކަމަށް އެންސްޕާއިން ބުންޏެެވެ.
ބަޔާނުގައި ބުނީ އެންސްޕާ ހިންގުމަށް ބޭނުންވާ މުވައްޒަފުން ހޯދުމާއި އެ މުވައްޒަފުންގެ ޒިންމާތައް ހަވާލުކުރުމަކީ އެކަމަށް ކަނޑައެޅިފައިވާ އުސޫލުތަކުގެ ތެރެއިން ކުރެވެމުންދާ ކަންކަން ކަމަށެވެ.
ރައްޔިތުންގެ އިޖުތިމާއީ ރައްކާތެރިކަމާ ގުޅުންހުރި މުއައްސަސާތަކާ ގުޅޭގޮތުންނާއި މުއައްސަސާގެ މުވައްޒަފުންގެ ނަޒާހަތްތެރިކަމާ މެދު ރައްޔިތުންގެ މެދުގައި ކަންބޮޑުވުމާއި ޝައްކު އުފެދޭ ގޮތަށް މައުލޫމާތު ފަތުރަމުންދާ ދިއުން އެންސްޕާއިން ވަނީ ކުށްވެރިކޮށްފަ އެވެ. އަދި އެފަދަ ދޮގު މައުލޫމާތު ފަތުރަމުންދާ ފަރާތްތަކާ މެދު ފިޔަވަޅު އެޅުމަށް ކަމާ ބެހޭ މުއައްސަސާތަކަށް ހުށަހަޅާނެކަން ފާހަގަކުރި އެވެ.
"މި މުއައްސަސާ އާއި މުއައްސަސާގެ މުވައްޒަފުންގެ ނަޒާހަތްތެރިކަމާ މެދު ސުވާލު އުފެދޭ ގޮތަށް ދައްކަމުންދާ ވާހަކަތަކާ ގުޅޭ ފުރިހަމަ، މިނިވަން ތަހުގީގެއް ހިންގަވައިދެއްވާ އެ ކަންކަމުގެ ތަފުސީލު ރައްޔިތުންނަށް ހާމަކޮށްދެއްވުމަށް މި އެޖެންސީންގެ ފަރާތުން އެންޓި ކޮރަޕްޝަން ކޮމިޝަންގައި އެދެމެވެ،"
