މަނީ ޗޭންޖިން ވިޔަފާރި ކުުރަން އެދި ހުށަހެޅުމުގެ މުއްދަތު ހަމަވެއްޖެ
މަނީ ޗޭންޖިން ވިޔަފާރި ކުުރުމަށް ލައިސަންސަށް އެދި ހުށަހެޅުމުގެ މުއްދަތު ހަމަވެފައިވާ ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބުނެފި އެވެ.
"މަނީ ޗޭންޖިން ވިޔަފާރިއާ ބެހޭ ގަވާއިދު" ގައިވާ ގޮތުގެ މަތިން ރާއްޖޭގައި މަނީ ޗޭންޖިން ވިޔަފާރި ކުރުމަށް ލައިސަންސް ހޯދުމަށް އެދި އެޕްލިކޭޝަން ހުށަހެޅުމަށް އެމްއެމްއޭއިން މިދިޔަ އޮކްޓޫބަރު މަހުގެ 2 ވަނަ ދުވަހު ހުޅުވާލި މުއްދަތު މިދިޔަ ހޮނިހިރު ދުވަހުގެ ނިޔަލަށް ވަނީ ހަމަވެފަ އެވެ.
އެމްއެމްއޭއިން މިއަދު ކުރި އިއުލާނުގައި ބުނީ ލައިސަންސް ހޯދުމަށް އެދި ހުށަހެޅުމުގެ މުއްދަތު ހަމަވުމާ އެކު، އެ އޮތޯރިޓީން ދޫކޮށްފައިވާ ލައިސަންސެއް ލިބިގެން ރާއްޖޭގައި މަނީ ޗޭންޖިން ވިޔަފާރި ކުރަމުން ދިޔަ ފަރާތްތަކުގެ ތެރެއިން އާ ގަވާއިދުގެ ދަށުން ޓިއަ 1 މަނީ ޗޭންޖިން ލައިސަންސް އަދި ޓިއަ 2 މަނީ ޗޭންޖިން ލައިސަންސަށް އެދި ހުށަހަޅާފައި ނުވާ ފަރާތްތަކުގެ ލައިސަންސް ބާތިލުވާނެ ކަމަށެވެ.
އެ އޮތޯރިޓީން ދޫކޮށްފައިވާ ލައިސަންސެއް ލިބިގެން ރާއްޖޭގައި މަނީ ޗޭންޖިން ވިޔަފާރި ކުރަމުންދާ ފަރާތްތަކުގެ ތެރެއިން އާ ގަވާއިދުގެ ދަށުން ލައިސަންސަށް އެދި އެޕްލިކޭޝަން ހުށަހެޅުމަށް ހުޅުވާލި މުއްދަތުގެ ތެރޭގައި ޓިއަ 1 މަނީ ޗޭންޖިން ލައިސަންސް އަދި ޓިއަ 2 މަނީ ޗޭންޖިން ލައިސަންސަށް އެދި ހުށަހެޅި ފަރާތްތަކަށް ލައިސަންސް ދިނުމާ މެދު ވަކި ގޮތެއް ނިންމާ އަންގަންދެން، އެ ފަރާތްތަކަށް ދޫކޮށްފައިވާ ލައިސަންސްގެ ދަށުން ބޭރު ފައިސާ ގަނެ ވިއްކުމުގެ ވިޔަފާރި ކުރިއަށް ގެންދެވޭނެ ކަމަށް އެމްއެމްއޭއިން ބުންޏެވެ. އެގޮތުން ހުއްދަ ދީފައިވާ މަނީޗޭންޖަރުންގެ ލިސްޓު އެ އޮތޯރިޓީގެ ވެބްސައިޓުގައި ވަނީ ޝާއިއުކޮށްފަ އެވެ.
ކަމާ ގުޅޭގޮތުން އިތުރު މައުލޫމާތު އެ އޮތޯރިޓީގެ 3012122 އިން އަދި [email protected] އަށް މެއިލް ކުރުމުން ލިބޭނެ ކަމަށް އެމްއެމްއޭގެ އިއުލާނުގައިވެ އެވެ.
