އާ ގަވާއިދުގެ ދަށުން 163 މަނީ ޗޭންޖަރުންގެ ލައިސަންސް ބާތިލުކޮށްފި
މަނީ ޗޭންޖިން ވިޔަފާރި ކުުރުމަށް ލައިސަންސަށް އެދި ހުށަހެޅުމުގެ މުއްދަތު ހަމަވިއިރު ލައިސަންސް އާނުކުރާ 163 ފަރާތަކަށް ދޫކޮށްފައިވާ ލައިސަންސް ބާތިލުކޮށްފައިވާ ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބުނެފި އެވެ.
"މަނީ ޗޭންޖިން ވިޔަފާރިއާ ބެހޭ ގަވާއިދު" ގައިވާ ގޮތުގެ މަތިން ރާއްޖޭގައި މަނީ ޗޭންޖިން ވިޔަފާރި ކުރުމަށް ލައިސަންސް ހޯދުމަށް އެދި އެޕްލިކޭޝަން ހުށަހެޅުމަށް އެމްއެމްއޭއިން މިދިޔަ އޮކްޓޫބަރު މަހުގެ 2 ވަނަ ދުވަހު ހުޅުވާލި މުއްދަތު މިދިޔަ ހޮނިހިރު ދުވަހުގެ ނިޔަލަށް ވަނީ ހަމަވެފަ އެވެ.
އެމްއެމްއޭއިން މިއަދު ބުނީ ހުޅުވާލި ފުރުސަތުގައި ޖުމްލަ 98 ފަރާތުން ލައިސަންސަށް އެދި ހުށަހަޅާފައިވާ ކަމަށެވެ. މީގެކުރިން މަނީޗޭންޖާ ލައިސަންސް 212 ފަރާތަކަށް ދޫކޮށްފައިވެ އެވެ. އެއީ 134 ކޮމާޝަލް ވިޔަފާރި އާއި 76 ޓޫރިސްޓް ރިސޯޓެވެ.
އެ ފަރާތްތަކުގެ ތެރެއިން އާ ގަވާއިދުގެ ދަށުން ލައިސަންސަށް އެދި ހުށަހަޅާފައި ނުވާ 163 ފަރާތެއްގެ ލައިސަންސް ބާތިލުކޮށްފައިވާ ކަމަށެވެ. އޭގެ ތެރޭގައި 99 ކޮމާޝަލް ވިޔަފާރި އާއި 64 ރިސޯޓު ހިމެނެ އެވެ.
ލައިސަންސްއަށް އެދުމަށް ހުޅުވާލި ފުރުސަތުގައި ހިދުމަތް ދެމުން އަންނަ ފަރާތްތަކުގެ ތެރެއިން 49 ފަރާތަކުން ވަނީ ލައިސަންސަށް އެދި ހުށަހަޅާފަ އެވެ. އެއީ ޓިއަ 1 މަނީ ޗޭންޖިން ލައިސަންސްއަށް އެދި 35 ކޮމާޝަލް ވިޔަފާރި އާއި ޓިއަ 2 މަނީ ޗޭންޖިން ލައިސަންސަށް އެދި ހުށަހެޅި 14 ރިސޯޓެކެވެ.
މީގެ އިތުރުން މުޅިން އަލަށް 49 ފަރާތަކުން ލައިސަންސަށް އެދި ހުށަހަޅާފައިވާ ކަމަށް އެ އޮތޯރިޓީން ބުންޏެވެ. އެއީ ޓިއަ 1 މަނީ ޗޭންޖިން ލައިސަންސްއަށް އެދި ހުށަހެޅި 44 ފަރާތަކާއި ޓިއަ 2 މަނީ ޗޭންޖިން ލައިސަންސަށް އެދުނު 5 ފަރާތެކެވެ.
މަނީ ޗޭންޖިން ވިޔަފާރިއާ ބެހޭ ގަވާއިދު ބުނާ ގޮތުން ޓިއަ 1 މަނީ ޗޭންޖިން ލައިސަންސްއަކީ ބޭރު ފައިސާ ގަތުމާއި ވިއްކުމުގެ ވިޔަފާރިކުރުމުގެ ލައިސަންސެވެ. ޓިއަ 1 ގެ ދަށުން ލައިސަންސް އެޕްލިކޭޝަން ފީގެ ގޮތުގައި 20،000 ރުފިޔާ ދައްކަން ޖެހެ އެވެ. އަހަރީ ފީގެ ގޮތުގައި 24،000 ރުފިޔާ ދޭން ޖެހެ އެވެ. ދުވާލެއްގެ މައްްޗަށް އެއް ކަސްޓަމަރަކަށް ނަގުދު ފައިސާއިން އެންމެ ގިނަވެގެން މުއާމަލާތް ކުރެވޭނީ 50،000 ރުފިޔާ ނުވަތަ އެއަށް ޖެހޭ ބޭރު ފައިސާގެ އަދަދަކަށެވެ.
ޓިއަ 2 މަނީ ޗޭންޖިން ލައިސަންސްއަކީ ބޭރު ފައިސާ ވިއްކުމުގެ ވިޔަފާރިކުރުމުގެ ލައިސަންސެވެ. ގަވާއިދު ބުނާގޮތުން ޓިއަ 2 ގައި ހިމެނޭނީ ޓޫރިޒަމާ ބެހޭ ގާނޫނުގެ ދަށުން ޓޫރިސްޓް ރިސޯޓު ހިންގުމުގެ ހުއްދަ ނުވަތަ ލައިސަންސް ލިބިފައިވާ ކުންފުނިތަކެވެ. ޓިއަ 2 ގެ ދަށުން އެޕްލިކޭޝަން ފީގެ ގޮތުގައި 1،300 ޑޮލަރު ދޭން ޖެހެ އެވެ. ލައިސަންސްގެ އަހަރީ ފީއަށް 1،800 ޑޮލަރު ދައްކަން ޖެހެ އެވެ.
ލައިސަންސް ލިބިފައިވާ ފަރާތްތަކުން ސެކިއުރިޓީ ޑިޕޮސިޓުގެ ގޮތުގައި 50،000 ޑޮލަރު ބަހައްޓަން ޖެހެ އެވެ. ޓިއަ 2 ގައި ހިމެނޭ ފަރާތްތަކުން ބޭރު ފައިސާގެ މުއާމަލާތް ކުރަން ޖެހޭނީ ބޭންކެެއް މެދުވެރިކޮށް ނުވަތަ ޓިއަ 1 ގައިވާ ފަރާތަކާ އެކުގަ އެވެ.
އާ ގަވާއިދުގައިވާ ގޮތުން މަނީ ޗޭންޖިން ވިޔަފާރީގައި ހަރަކާތްތެރިވެވޭނީ ދިވެހިންނަށެވެ. ކުންފުނިތަކުގެ މާލީ ހިސާބުތައް އެމްއެމްއޭ އާ ހިއްސާކުރަން ޖެހޭއިރު، ލައިސަންސްއަށް އެދޭ ފަރާތްތަކުގެ ތެރެއިން އެ ހުއްދަ ދޫކުރާނީ ގަވާއިދުގައިވާ ޝަރުތުތަކަށް ފެތޭ ކުންފުނިތަކަށެވެ.
