ނުކުޅެދުންތެރިކަން ހުންނަ 13،656 މީހަކު މާލީ އެހީއަށް އެންސްޕާގައި އެދިއްޖެ

ނުކުޅެދުންތެެރިކަން ހުންނަ ފަރާތްތަކަށް ދެވޭ މާލީ އެހީގެ ރަޖިސްޓްރީގައި މިދިޔަ ނޮވެމްބަރު މަހުގެ ނިޔަލަށް 13،656 ފަރާތެއް ރަޖިސްޓްރީކޮށްފައިވާ ކަމަށް ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އިން ބުނެފި އެވެ.

Ads by Hajj Corporation

ނުކުޅެންތެރިކަން ހުންނަ ފަރާތްތަކަށް އެންސްޕާއިން އަންނަނީ 5 ހިދުމަތެއް ދެމުންނެވެ. ނުކުޅެދުންތެރިކަން ހުންނަ ފަރާތެއްކަން އަންގައިދޭ ކާޑު ދޫކުރުމުގެ އިތުރުން އެފަދަ ފަރާތްތަކުގެ ތެރެއިން އެސިސްޓިވް ޑިވައިސް ބޭނުންވާ ފަރާތްތަކަށް އެފަދަ ތަކެތި ހޯދުމަށް އެ އެޖެންސީން އެހީތެރިވެދެ އެވެ. އަދި އެފަދަ ފަރާތްތަކަށް ދެމުން އަންނަ މާލީ އެހީ އާއި ބޭނުންވާ ތެރަޕިއުޓިކް ފަރުވާއަށް ހަރަދު ހަމަޖައްސައިދިނުމުގެ އިތުރުން ބޭހާއި ސައިކޮލޮޖިކަލް އެސެސްމަންޓް ހެދުމަށް އެހީތެރިކަން ފޯރުކޮށްދެ އެވެ.

އެންސްޕާއިން މިއަދު "އެކްސް" ގައި ކުރި ޕޯސްޓެއްގައި ވަނީ ނިމުނު މަހުގެ ނިޔަލަށް ނުކުޅެދުންތެރިކަން ހުންނަ މީހުންގެ ގައުމީ ދަފުތަރުގައި ރަޖިސްޓްރީވެފައިވާ ފަރާތްތަކުގެ ގިންތިތަކާއި ޖިންސު އާންމުކޮށްފަ އެވެ.

ރަޖިސްޓްރީވެފައިވާ ފަރާތްތަކުގެ ތެރޭގައި އެންމެ ގިނައީ ޖިސްމާނީ ގޮތުން ނުކުޅެދުންތެރިކަން ހުންނަ ފަރާތްތަކެވެ. އެ ގިންތީގައި 3،912 މީހަކު ރަޖިސްޓްރީކޮށްފައިވާއިރު، 1،723 މީހުންނަކީ އަންހެނުންނެވެ. އަދި 2،189 މީހުންނަކީ ފިރެހެނުންނެވެ.

ދެން އެންމެ ގިނައީ "މަލްޓިޕަލް" ނުކުޅެދުންތެރިކަން ހުންނަ ފަރާތްތަކެވެ. އެ ގިންތީގައި 1،045 އަންހެނުން އަދި 1،916 ފިރެހެނުން ރަޖިސްޓްރީކޮށްފައިވެ އެވެ.

ރަޖިސްޓްރީވެފައިވާ ގިންތި އަދި ޖިންސު:

• ވިސްނުމުގެ / ސިކުނޑީގެ - 852 އަންހެނުން އަދި 1،102 ފިރެހެނުން
• އަޑުއިވުމާއި ވާހަކަދެއްކުމުގެ - 907 އަންހެނުން އަދި 813 ފިރެހެނުން
• ނަފްސާނީ - 603 އަންހެނުން އަދި 896 ފިރެހެނުން
• ފެނުމުގެ - 460 އަންހެނުން އަދި 514 ފިރެހެނުން

އެންސްޕާގެ ތަފާސް ހިސާބުތައް ދައްކާ ގޮތުން އޯޓިޒަމް ހުންނަ 584 ފަރާތެއް އެ އެޖެންސީގައި ރަޖިސްޓްރީކޮށްފައިވެ އެވެ. އެ ގިންތީގައި 122 އަންހެނުން އަދި 462 ފިރެހެނުން ހިމެނެ އެވެ. އުނގެނުމުގެ ދަތިކަން ހުންނަ ފަރާތްތަކުގެ ގިންތީގައި 18 އަންހެނުން ވަނީ ރަޖިސްޓްރީކޮށްފަ އެވެ. އެ ގިންތީގައި ދެން ހިމެނެނީ 34 ފިރެހެނުންނެވެ.

ނުކުޅެދުންތެރިކަން ހުންނަ މީހުންގެ ހައްގުތައް ރައްކާތެރި ކުރުމާއި މާލީ އެހީތެރިކަން ފޯރުކޮށްދިނުމުގެ ގަވާއިދުގެ ދަށުން ދަފުތަރުގައި ރަޖިސްޓްރީކޮށްފައިވާ ފަރާތްތަކަށް އަސާސީ އެލަވަންސްގެ ގޮތުގައި ކޮންމެ މަހަކު 2،000 ރުފިޔާގެ ފައިސާގެ އިނާޔަތެއްދެ އެވެ. އެ އެލަވަންސްގެ އިތުުރުން އާންމު އެލަވަންސްގެ ގޮތުގައި 1،000 ރުފިޔާގެ އިނާޔަތެއް އަންނަނީ ދެމުންނެވެ.

ނުކުޅެދުންތެރިކަން ހުންނަ މީހުންގެ ތެރެއިން ހުރި ނުކުޅެދުންތެރިކަމުގެ ސަބަބުން އަމިއްލައަށް ނޫޅެވޭ ނުވަތަ އެެހެން ފަރާތަކުން ހުރިހާ ވަގުތެއްގައި ބަލަހައްޓަން ޖެހޭ ފަރާތްތަކަށް އެހީތެރިވުމަށް ކޮންމެ މަހަކު 2،000 ރުފިޔާދެ އެވެ. އަދި ނުކުޅެދުންތެރިކަން ހުންނަ މީހުންގެ ތެރެއިން ހުރި ނުކުޅެދުންތެރިކަމުގެ ސަބަބުން ހާއްސަ ގޮތެއްގެ މަތިން އަސާސީ ބޭނުންތަކަށް އާދަކޮށް ބޭނުން ކުރަން ޖެހޭ ތަކެތި ހޯދުމަށް އިތުރު ހަރަދު ކުރަން ޖެހޭ ފަރާތްތަކަށް އެހީތެރިވުމަށް ކޮންމެ މަހަކު 1،000 ރުފިޔާގެ އިނާޔަތެއް ލިބޭނެ އެެވެ.

އޭގެ އިތުރުން ނުކުޅެދުންތެރިކަން ހުންނަ 3 މީހުން ނުވަތަ އެއަށް ވުރެ ގިނަ މީހުން އެއް ގޭބީސީއެއްގައި ދިރިއުޅޭ ނަމަ، ނުކުޅެދުންތެރިކަން ހުންނަ މީހުންނަށް އެހީތެރިވުމަށް 1،000 ރުފިޔާގެ އިނާޔަތެއް ވެސް ދެ އެވެ.