ހައިބްރިޑް ހަނގުރާމައިގެ ހުނަރުތައް ދަސްކުރަން ނައިބު ރައީސް ޒުވާނުންނަށް ގޮވާލައްވައިފި
މިއަދު ހަނގުރާމަތައްކޮށް ގައުމުތައް ސުންނާފަތި ކުރުމުގައި ބޭނުން ހިފަނީ ހައިބްރިޑް ހަތިޔާރާއި އޭގެ އުކުޅުތައް ނުވަތަ ކައްޗަރީ ވިސްނުމާއި އޭގެ ހުނަރުތައް ކަމަށް ވާތީ، އެންމެ ބޮޑަށް ސަމާލުކަން ދޭން ޖެހިފައި ވަނީ މިފަދަ ނުރައްކާތަކުން ދަފަރާވުމުގެ މައްޗަށް ކަމަށާއި، މި ހަނގުރާމަ އާ ކުރިމަތިލާން ބޭނުންވާ ފަންނިއްޔާތުގެ ހުނަރުތައް ދަސްކުރުމަށް އަދުގެ ޒުވާނުންނަށް، ރައީސުލްޖުމްހޫރިއްޔާގެ ނައިބު ހުސައިން މުހައްމަދު ލަތީފު ގޮވާލައްވައިފި އެވެ.
މި އަހަރުގެ ހުރަވީ ދުވަހުގެ މުނާސަބަތުގައި އިސްލާމީ މަރުކަޒުގެ ޖަލްސާ ކުރާ މާލަމުގައި ރޭ އޮތް ރަސްމިއްޔާތު ޝަރަފުވެރިކޮށްދެއްވާ ވާހަކަފުޅު ދައްކަވަމުން ނައިބު ރައީސް ވިދާޅުވީ މި ޒަމާނަށް ހޭލަންވާނީ ވަރުގަދަ އަޒުމަކާއި ހިތްވަރާ އެކު، ކަމުގެ އިލްމާއި ހުނަރާއި ފަންނުތައް ދަސްކޮށް، އެ ކަންކަމަށް ހޭލުންތެރިވެގެން ކަމަށެވެ. ވުމާ އެކު 21 ވަނަ ގަރުނުގެ ތަހުޒީބާއި ތަމައްދުންގެ އުކުޅުތަކާއި ގޮތްތައް ދަސްކުރުމަށް އަދުގެ ކޮންމެ މީހަކަށް ވެސް އިލްތިމާސްކުރައްވާ ކަމަށެވެ.
ކައްޗަރީ ހަނގުރާމައިގެ ނުފޫޒުތައް ފެތުރުން ވަނީ ގައުމެއްގެ އިޖުތިމާއީ ބިނާރަށް ތާއަބަދަށް ދެވޭ ގެއްލުމަކަށް ކަމުގައި ނައިބު ރައީސް ސިފަކުރެއްވި އެވެ. އެކަމުގެ ނަތީޖާއެއްގެ ގޮތުން، އިޖުތިމާއީ އެއްބައިވަންތަކަމާއި އިގުތިސޯދީ ހަމަޖެހުމަށް ގެއްލުންވެ، އެތައް ޒަމާނަކަށް ދޮގު މައުލޫމާތު ފެތުރިގެންދާ ކަމަށެވެ. އަދި މިފަދަ ތޫނު ހަންޖަރުތަކުން ދެވޭ ޒަހަމްތަކަކީ ގައުމު ބައިބައިވެ، ގައުމީވަންތަކަން ބަލިކަށިވެ، ރައްޔިތުންގެ މެދުގައި ގައުމީ މަސްލަހަތާ މެދު އޮންނަ އިތުބާރު ފުނޑުފުނޑުވެ، ދާއިމަށް ދެމިގެން ހިނގައިދާނެ ފަދަ ބިރުވެރި ކަމެއް ކަމުގައި ވެސް އެމަނިކުފާނު ވިދާޅުވި އެވެ.
ނައިބު ރައީސް ވިދާޅުވި ގޮތުގައި އަދުގެ ޒުވާން ޖީލަކީ މާދަމާއަށް ނަމޫނާ ޖީލަކަށް ވާން ޖެހޭ ބައެއް ކަމަށާއި، އެ ނަމޫނާ ދެއްކޭނީ ދޮންބަންޑާރައިން ފަދަ މާޒީގެ ބަތަލުންނަށް އަދާކުރަން ޖެހޭ ޝުކުރު، ހަގީގީ މާނައިގައި އަދާކޮށްގެން ކަމުގަ އެވެ. ޒުވާނުންނަކީ ފަންނީ ގޮތުން ހުނަރުވެރި ބަޔަކަށް ހެދުމަށް ސަރުކާރުން ކުރާ މުހިންމު މަސައްކަތްތަކުގައި އަމަލާއި ބަހުން ޝާމިލްވެ، ގައުމީ ތަރައްގީއަށް ބޭނުންވާ ލަނޑުދަނޑިތައް ހާސިލު ކުރުމަށް އެމަނިކުފާނު ގޮވާލެއްވި އެވެ.
ގައުމުގެ އެންމެ މަތީ މަސްލަހަތުން ފެށިގެން އާންމު މަސްލަހަތުތައް ހިމާޔަތް ކުރުމަށް ސަރުކާރުން ގިނަގުނަ މަސައްކަތްތަކެއްކުރާ ކަމަށް ވިދާޅުވި އެވެ. ފަންނިއްޔާތުގެ ދާއިރާއަށް އަންނަމުންދާ ހަލުވި ތަރައްގީ އާއި މަސްނޫއީ ވިސްނުން ފުޅާވާމުން އަންނަ އައުމާ އެކު ސައިބަ ސަލާމަތީ ފިޔަވަޅުތައް ވެސް ކަމާ ބެހޭ ފަރާތްތަކުގެ ފަންނީ އެހީ އާއެކު ހަރުދަނާ ކުރަމުން ގެންދާކަން ފާހަގަކުރެއްވި އެވެ.
ނައިބު ރައީސްގެ ވާހަކަފުޅުގައި ވަނީ ހައިބްރިޑް ހަނގުރާމައިން ދަފަރާވާން ކުރަން ޖެހިފައިވާ ވަރަށް ގިނަ ކަންކަން އެބަހުރި ކަމަށް ވިދާޅުވެފަ އެވެ. އެގޮތުން ސައިބަ ރައްކާތެރިކަމުގެ ތަމްރީނުތައްދީ، ނުރައްކާތައް ދެނެގަތުމުގެ އުކުޅުތައް ދަސްކޮށް، އެކި ގޮތްގޮތުން ފެތުރޭ ދޮގު މައުލޫމާތާ ދެކޮޅަށް މަސައްކަތް ކުރުމަށް މަޖުބޫރުވެފައިވާކަން ފާހަގަކުރެއްވި އެވެ.
ރައީސް ޑރ. މުހައްމަދު މުއިއްޒުގެ ދުރު ވިސްނުންފުޅާ އެކު، ގައުމީ މަސްލަހަތަށް ކަމާ ބެހޭ އެންމެހާ ފަރާތްތަކާއި ގައުމީ މަސްލަހަތުވެރީންނާއި އެކުވެރި ގުޅުންތަކާ އެކު އުހުއްވަތްތެރިކަމުގެ ވިޔުގައެއް ގާއިމުކުރެވެމުންދާ ކަމަށް ނައިބު ރައީސް ވިދާޅުވި އެވެ. ދިވެހި އަސްކަރީ ބާރުވެރިކަމާއި ރައްޔިތުންނަށް ދެމުންދާ ސަލާމަތީ ހިދުމަތުގެ ދަންމަރު އެމަނިކުފާނު ގެންދަވަނީ ދުވަހެއް ދުވަހަކަށް ވަރުގަދަ ކުރައްވަމުންކަން ވެސް ވިދާޅުވި އެވެ.
ރާއްޖޭގެ ތަރައްގީ އާއި ތަހުޒީބު އަދި އިޖުތިމާއީ ރައްކާތެރިކަމާއި މުޖުތަމައުގެ ދުޅަހެޔޮ ކަމަށް ރައީސް ގެންދަވަނީ ގިނަގުނަ މަސައްކަތްޕުޅުތައް ކުރައްވަމުންކަން ފާހަގަކުރައްވާ ނައިބު ރައީސް ވަނީ، ގައުމު އާރާސްތުކުރައްވައި، ގައުމުގެ ހައިބަތާއި އިއްޒަތް ދުނިޔެއަށް ހާމަކުރެއްވުމުގައި އެމަނިކުފާނު ކުރައްވަމުން ގެންދަވާ އަގުހުރި، ހިކުމަތްތެރި މަސައްކަތްޕުޅުތަކަށް ޝުކުރު ދަންނަވާފަ އެވެ.
Ads by STO
