ސައްހަ ކަމާ މެދު ސުވާލު އުފައްދައި، އެމްޖޭއޭއިން ގޮވާލީ އެމްއެމްސީގެ އިންތިހާބު ފަސްކުރަން
މޯލްޑިވްސް މީޑިއާ ކައުންސިލް (އެމްއެމްސީ) ގެ އިންތިހާބަށް ވަގުތު ކުޑަތަންވެފައިވަނިކޮށް، ޔޫތް އެމްޕަވަމެންޓް، އިންފޮމޭޝަން އެންޑް އާޓްސް މިނިސްޓްރީން ދާއިމީ ވޯޓާސް ލިސްޓަށް ބަދަލުތަކެއް ގެނައުމުން، އިންތިހާބުގެ ސައްހަ ކަމާ މެދު ސުވާލު އުފެދޭ ކަމަށް ބުނެ، އިންތިހާބު ފަސްކުރަން މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) އިން ގޮވާލައިފި އެވެ.
އެމްއެމްސީގެ އިންތިހާބު ބޭއްވުމުގެ އުސޫލުގައިވާ ގޮތުން ދާއިމީ ވޯޓާސް ލިސްޓު އެކުލަވާލުމާ ގުޅޭ ސުންގަޑިތަކާއި އިޖުރާއަތްތަކެއް ކަނޑައެޅިފައިވެ އެވެ. އެކަން އެހެން އޮއްވާ، ބައެއް މީޑިއާތަކުން ވޯޓުލާން ހަމަޖައްސާފައިވާ ފަރާތްތައް ކުއްލިއަކަށް ބަދަލުކުރަން ހުށަހަޅައިގެން ކަމަށް ބުނެ، ޔޫތް މިނިސްޓްރީން ވަނީ ގެޒެޓް ކޮށްފައިވާ އެމްއެމްސީ އިންތިހާބުގެ ދާއިމީ ވޯޓާސް ލިސްޓަށް ބަދަލު ގެނެސްފަ އެވެ.
އެމްޖޭއޭއިން ރޭ ނެރުނު ނޫސް ބަޔާނެއްގައި ބުނީ، ގެޒެޓްކޮށްފައި އޮތް ދާއިމީ ވޯޓާސް ލިސްޓަށް ބަދަލުތަކެއް ގެނައުމަކީ އުސޫލުގެ ރޫހާ ހިލާފު އަދި އިންތިހާބުގައި ވާދަކުރާ ކެންޑިޑޭޓުންގެ ހައްގުތަކަށް އުނިކަން ލިބޭނެ ކަމެއް ކަމަށެވެ.
އިންތިހާބަށް ކުރިމަތިލުމަށް ދުރާލާ އިއުލާނުކޮށް، އެކަމުގެ ސުންގަޑި ހަމަވެ، ކެންޑިޑޭޓުންގެ ލިސްޓާއި އިންތިހާބުގެ ތާރީހުތައް އިއުލާނުކުރި ފަހުން އިންތިހާބަށް ކުރިމަތިލާން އަލުން ހުޅުވާލުމާ ގުޅިގެން އިންތިހާބުގެ ސަައްހަ ކަމާމެދު އެ ބަޔާނުގައި ސުވާލު އުފައްދާފައިވެ އެވެ.
އެމްޖޭއޭއިން ބުނީ މާދަމާ ބާއްވަން ހަމަޖެހިފައިވާ އެ އިންތިހާބުގެ ބައެއް ކަންކަން ޔޫތް މިނިސްޓްރީން ކުރިއަށް ގެންދާގޮތުން އިންތިހާބާ މެދު ސުވާލު އުފެދި، ސައްހަކަން ގެއްލޭނެ އެތައް ބައިވަރު ކަންތައްތަކެއް ހިނގަމުންދާ ކަމަށް ގަބޫލު ކުރެވޭ ކަމަށެވެ. އެހެންވެ، މިހާރު އިއުލާނުކޮށްފައިވާ އިންތިހާބު ކުރިއަށް ނުގެންގޮސް ފަސްކުރަން އެ ޖަމިއްޔާއިން ވަނީ ގޮވާލާފަ އެެވެ.
އެ ބަޔާނުގައި ވަނީ އިންތިހާބު އިންތިޒާމް ކުރުމަށް މީޑިއާތަކާއި މަސްލަހަތުވެރިން ޝާމިލްވާނެ ގޮތަށް އިންތިހާބު އިންތިޒާމް ކޮމިޓީއެއް ނަގައިގެން އިންތިހާބު ދެފުށް ފެންނަ ގޮތަކަށް ކުރިއަށް ގެންދިއުމަށް ވެސް އެދިފަ އެވެ. ކަންބޮޑުވުންތައް ފާހަަގަކޮށް އެމްޖޭއޭއިން ވަނީ ޔޫތް މިނިސްޓްރީއަށް އިއްޔެ ސިޓީއެއް ވެސް ފޮނުވާފަ އެވެ.
އެމްއެމްސީގެ 10 މެމްބަރުންގެ ދައުރު މި މަހުގެ 14 ވަނަ ދުވަހަށް ހަމަވާތީ، ބާއްވާ އެ އިންތިހާބުގައި މީޑިއާތަކުން ވޯޓުލާ މީހުންގެ ދާއިމީ ލިސްޓު އާއްމު ކުރީ މިދިޔަ މަހުގެ 14 ވަނަ ދުވަހު އެވެ.
ނަމަވެސް އެ ލިސްޓަށް ވެސް ބަދަލުތަކެއް ގެނައުމަށް ފަހު އިންތިހާބުގައި ވޯޓުލުމަށް ރަޖިސްޓްރީކުރި މީހުންގެ ލިސްޓު އަލުން އިއްޔެ އާންމުކުރިއިރު، ބައެއް މީޑިއާތަކުން ވޯޓުލާން ހަމަޖެހިފައިވާ ފަރާތްތައް ވަނީ ބަދަލުވެފަ އެވެ. ޔޫތް މިނިސްޓްރީން އާންމުކުރި ލިސްޓުގައި 148 ފަރާތަކަށް ވޯޓުލެވޭނެކަން ފާހަގަކޮށްފައިވާއިރު، ލިސްޓާ ގުޅިގެން ޝަކުވާ ހުށަހެޅުމުގެ ފުރުސަތު މިއަދު މެންދުރުފަހު 2:00 އާ ހަމައަށް ހަމައަށް ވަނީ ހުޅުވާލާފަ އެވެ.
