ސޯލާ ޕަވާޑް ގެސްޓް ހައުސްތައް ތަރައްގީކުރަން މާލީ އެހީ ދެނީ
ލޯކަލް ޓޫރިޒަމް ފުޅާކުރާއިރު، އިއާދަކުރަނިވި ހަކަތަ ބޭނުންކޮށްގެން އެ ދާއިރާ ފުޅާކުރަން މަސައްކަތް ކުރާނަމަ، ސަރުކާރުން މާލީ އެހީތެރިކަން ފޯރުކޮށްދެއްވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
މިހާރު ވެސް 30 އަކަށް ގެސްޓްހައުސް ހިންގަމުންދާ އއ. ރަސްދޫގެ ރައްޔިތުންނާ ބައްދަލު ކުރައްވާ ވާހަކަފުޅު ދައްކަވަމުން ރައީސް ވިދާޅުވީ، ބޭނުންވަނީ އެ ރަށުގެ ލޯކަލް ޓޫރިޒަމާއި މަސްވެރިކަން ކުރިއަރުވަން ކަމަށެވެ.
ލޯކަލް ޓޫރިޒަމް ދާއިރާ ފުޅާކުރުމުގެ ގޮތުން ގެސްޓް ހައުސްތައް އިތުރު ކުރުމަށް ހިތްވަރު ދެއްވަމުން ރައީސް ވިދާޅުވީ، ގެސްޓްހައުސްތައް ތަރައްގީކުރާ ފަރާތްތަކުން އިއާދަކުރަނިވި ހަކަތަ ބޭނުންކޮށްގެން އެ ތަންތަން ތަރައްގީ ކުރުމަކީ އެދިވަޑައިގަންނަވާ ގޮތް ކަމަށެވެ. އަދި އެފަދަ ވިސްނުމެއް ހުރި ނަމަ، ސަރުކާރުން އެ ފަރާތްތަކަށް ލޯނު ފެސިލިޓީތަކަށް މަގުފަހިކޮށްދެއްވާނެ ކަމަށް ވިދާޅުވި އެވެ.
"އިއާދަކުރަނިވި ހަކަތަ، ސޯލާ ޕަވާއަށް އިންވެސްޓް ކުރުމަށް ގެސްޓް ހައުސް ހިންގާ ފަރާތްތަކަށް އަޅުގަނޑު ހިތްވަރުދެން. ސަރުކާރުން ލޯނު ފެސިލިޓީތަކަށް މަގުފަހިކޮށްދޭނެ،" ރައީސް ވިދާޅުވި އެވެ.
ސަރުކާރުން އެދެނީ ލޯކަލް ޓޫރިޒަމް ފުޅާކުރަން ސޯލާ ޕަވާޑް ގެސްޓް ހައުސްތަކެއްގެ ގޮތުގައި ހިންގުމަށެވެ. އެހެންވެ، އެ ކަންކުރުމަށް ބޭނުންވާ އެހީތެރިކަން ސަރުކާރުން ފޯރުކޮށްދޭނެ އެވެ.
މިއަދު އއ. ތޮއްޑޫއަށް ޒިޔާރަތް ކުރައްވާ އެ ރަށުގެ ރައްޔިތުންނާ ވާހަކަފުޅު ދައްވަމުން ވެސް ރައީސް ވިދާޅުވީ، އިއާދަކުރަނިވި ހަކަތައަށް އިންވެސްޓް ކުރަން ބޭނުންވާ ނަމަ، އެކަމަށް އެހީތެރިކަން ފޯރުކޮށްދެއްވުމަކީ އެމަނިކުފާނު ޝައުގުވެރިވެވަޑައިގަންނަވާ ކަމެއް ކަމަށެވެ.
"ސަރުކާރުގެ ތެރެއިން ފައިނޭންޝަލް ޕެކޭޖްތައް ފޯރުކޮށްދިނުމަކީ އަޅުގަނޑު ޝައުގުވެރިވާ ކަމެއް. ލޯކަލް އޮތޯރިޓީ ކޮމްޕެނީ ވިޔަސް، ނޫނީ ގެސްޓް ހައުސް ހިންގާ އަމިއްލަ ފަރާތްތަކުން ސޯލާ ޕަވާއަށް ދާން ބޭނުން ވިޔަސް، އަޅުގަނޑު ބަލާނަން އެ ކަންކަމަށް ސަރުކާރުގެ ނިޒާމުގެ ތެރެއިން މަގުތައް ފަހިކޮށްދޭން،" ރައީސް ވިދާޅުވި އެވެ.
އިތުރަށް އެމަނިކުފާނު ވިދާޅުވީ، "ރައްޔިތުންގެ ޖީބަށް މުއްސަނދިކަން ލިބިގެންދާނެ މަގު މަގަށް އަޅުގަނޑު އިރާދަކުރެއްވިއްޔާ ފުރުސަތު ހޯދަދޭނަން،" ކަމަށެވެ.
ސަރުކާރުގެ އަމާޒަކީ، ކުރިއަށް އޮތް 4 އަހަރުގެ ތެރޭގައި ރާއްޖެއިން ތެލަށް ބަރޯސާވެފައިވާ މިންވަރު ކުޑަކޮށް، ތެލަށް ކުރާ ހަރަދުގެ ތިންބައިކޮށްފައި އެއްބަޔަކީ އިއާދަކުރަނިވި ހަކަތައަށް ހެދުމަށެވެ. ތެލަށް ކުރާ ހަރަދު ކުޑަކުރުމުގެ ގޮތުން އައްޑޫ ސިޓީގައި ކުނިން ހަކަތަ އުފައްދާ ނިޒާމެއް ވެސް ވަނީ ގާއިމުކޮށްފަ އެވެ.
ސަރުކާރުން ހިންގަމުންދާ އެންމެ ބޮޑު މަޝްރޫއު، ރަސްމާލެ ވެސް ތަރައްގީ ކުރުމަށް އަމާޒު ހިފާފައި ވަނީ ތިމާވެށްޓާ ރައްޓެހި، އިއާދަކުރަނިވި ހަކަތަ ބޭނުންކުރާ ސިޓީއެއްގެ ގޮތުގަ އެވެ. އަދި އިއާދަކުރަނިވި ހަކަތައަށް ބަދަލު ކުރުމަށް ކުރާ މަސައްކަތްތަކަށް ބޭނުންވާ މާލީ އެހީ ފަސޭހައިން ލިބޭނެ މަގުފަހިކޮށްދިނުމަށް ރައީސް ވަނީ ބައިނަލްއަގުވާމީ މައިދާނަށް ގޮވާލައްވާފަ އެވެ.
