ގާނޫނު އަސާސީއަށް ގެނައި ބަދަލުތަކުން ރައްޔިތުންގެ ބާރުވެރިކަން ވީ އިތުރު: ރައީސް
ގާނޫނު އަސާސީއަށް ގެނައި ބަދަލުތަކުގެ ސަބަބުން ރައްޔިތުންގެ ބާރުވެރިކަން އިތުރުކުރެވިފައިވާކަން، ސިޔާސީ ތައައްސުބުތަކުން އެއްކިބާވެ ވިސްނައިފި ކޮންމެ ރައްޔިތަކަށް ފަހުމުވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ރައީސް އެހެން ވިދާޅުވީ، އއ. އަތޮޅާއި ކ. އަތޮޅުގެ ބައެއް ރަށްރަށަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން، މަތިވެރީގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގަ އެވެ.
ގާނޫނު އަސާސީގެ މަގުސަދަކީ، ދައުލަތުގެ ސިޔާދަތީ ބާރާއި އެ ބާރު ހިނގާ ސަރަހައްދު އިއުލާނުކޮށް ކަނޑައެޅުމާއި، ރައްޔިތުންގެ ބާރު ކަނޑައެޅުމާއި، ރައްޔިތުންގެ ހައްގުތަކާއި ޒިންމާތައް ކަނޑައެޅުމާއި، ދައުލަތުގެ ގާނޫނީ ވެރިކަން ހިންގުމުގެ ނިޒާމާއި ތަރުތީބާއި އިންތިޒާމުތައް ކަނޑައެޅުންކަން އެމަނިކުފާނު ފާހަގަކުރެއްވި އެވެ. ވިދާޅުވީ ގާނޫނު އަސާސީއަށް ބަދަލު ގެނެސްފައި ވަނީ ރައްޔިތުންގެ ދިފާއުގައި ކަމަށެވެ.
ރައީސްގެ ވާހަކަފުޅުގައި ވަނީ ގާނޫނު އަސާސީއަށް ގެނައި އިސްލާހުތަކުގެ މަގުސަދު، ރައްޔިތުންނާ ހިއްސާކުރައްވާފަ އެވެ. އެގޮތުން، ރާއްޖޭގެ ހާއްސަ އިގުތިސޯދީ ސަރަހައްދުގެ އެންމެ އަކަ އިންޗިއަކަށް ވެސް ބަދަލެއް ގެނެވޭނީ، ރައްޔިތުންގެ މަޖިލިހުގެ އަގުލަބިއްޔަތުގެ ހަތަރުބައިކުޅަ ތިންބައިގެ ވޯޓުގެ އިތުރުން 143،332 ރައްޔިތުންގެ ރުހުމާ އެކުގައި ކަމަށް ވިދާޅުވި އެވެ.
ގާނޫނު އަސާސީގެ 251 ވަނަ މާއްދާއަށް ގެނައި ބަދަލާ އެކު، ރާއްޖޭގައި އަސްކަރީ އެންމެ ބޫޓު ޖޯޑެއް ހަރަކާތްތެރިވުމަށް ވެސް، މަޖިލީހުގެ އަގުލަބިއްޔަތު ހޯދަން ޖެހޭނެކަން ރައީސް ފާހަގަކުރެއްވި އެވެ. އަދި އެއްބަސްވުމެއްގެ ދަށުން ބާއްވާ އަސްކަރީ ތަމްރީނުތަކުގައި ބައިވެރިވުން ފިޔަވައި، ރައްޔިތުންގެ މަޖިލިހުގެ ޖުމްލަ މެންބަރުންގެ އަގުލަބިއްޔަތުން ފާސްވެގެން މެނުވީ، އަސްކަރީ ބޭނުމަކަށް، ރާއްޖޭގެ ސަރަހައްދުގައި ބޭރުގެ ސިފައިން އެއްވެސް ސިފައެއްގައި އަމަލީގޮތުން ހަރަކާތްތެރިވުމަށް ހުއްދަ ދިނުން ވެސް ވަނީ މަނާކޮށްފަ އެވެ.
ރައީސް ވިދާޅުވި ގޮތުގައި މަޖިލިހުގެ މެމްބަރަކަށް ވުމުގެ ޝަރުތުތަކަށް ގެނައި ބަދަލުން ހިމާޔަތްކޮށްދެނީ ރައްޔިތުންގެ ހައްގުތައް ކަމުގަ އެވެ. މެމްބަރުން އިންތިހާބުގައި ވާދަކުރަނީ ވަކި ފިކުރެއް ނުވަތަ ޕާޓީއެއް ތަމްސީލުކުރާ މީހެއްގެ ގޮތުން ކަމުގަ އެވެ. އެހެންކަމުން، އިންތިހާބުވާ މެމްބަރާ ދާއިރާގެ ރައްޔިތުންނާ ދެމެދު ވަނީ އަހުދެއްކަން ފާހަގަކުރެއްވި އެވެ. އެ އަހުދުގައި މެމްބަރު އެއްބަސްވަނީ ގާނޫނު އަސާސީގައި ބުނާ މަސްއޫލިއްޔަތު އަދާކުރުމަށް ކަމުގަ އެވެ. ގާނޫނު އަސާސީއަށް ގެނައި އިސްލާހުގެ ސަބަބުން މެމްބަރުން ވީ އަހުދު ހިމާޔަތްކުރެވިގެންދާނެ ކަމަށް އެމަނިކުފާނު ވިދާޅުވި އެވެ.
ގާނޫނު އަސާސީއަށް އިސްލާހެއް ގެނައުމުގެ ކުރިން ރައްޔިތުންގެ ވޯޓުން ފާސްކުރަން ޖެހޭ ހާލަތްތަކަށް ރިއާޔަތްކުރައްވާ ރައީސް ވިދާޅުވީ ފެންނަ ނުފެންނަ ވޯޓާ މެދު ގޮތް ނިންމުމަށް، މަދު ބައެއްގެ މުށު ތެރޭގައި އޮތް ބާރު، މިފަހުން ގެނައި އިސްލާހާ އެކު ރައްޔިތުންގެ އަތްމައްޗަށް ދޫކޮށްލެވިފައިވާ ކަމަށެވެ.
އެ ބަދަލުތަކުގެ އިތުރުން، ރައީސުލްޖުމްހޫރިއްޔާގެ މަސްއޫލިއްޔަތަށް ގެނައި ބަދަލަކީ ވެސް، ދިގު ރާސްތާގެ އަދި ކުރު ރާސްތާގެ ތަރައްގީގެ ޕްލޭންތައް ހެދުމުގެ މަސްއޫލިއްޔަތު ރައީސުލްޖުމްހޫރިއްޔާއަށް މަތިކުރެވިފައި ނުވާތީ، އެކަމަށް ގެނައި އިސްލާހެއް ކަމަށް އެމަނިކުފާނު ވިދާޅުވި އެވެ.
ގާނޫނު އަސާސީއަށް 6 ވަނަ އިސްލާހު ގެނައުމުގެ ބިލު، ރައީސް ތަސްދީގުކުރެއްވީ މިދިޔަ މަހުގެ 20 ވަނަ ދުވަހު އެވެ.
Ads by STO
