މަސް ކިރުވާތާ 48 ގަޑިއިރު ތެރޭ ފައިސާ ޖަމާވާ ގޮތަށް ހަަމަޖައްސައިފި
ވައުވެވަޑައިގެންނެވި ގޮތަށް މާދަމައިން ފެށިގެން ބޭންކް އޮފް މޯލްޑިވްސް (ބީއެމްއެލް) ގައި އެކައުންޓް ހުޅުވާފައިވާ މަސްދޯނިތަކުން މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އަށް ކިރުވާ މަހަށްވާ ފައިސާ 48 ގަޑިއިރުގެ ތެރޭގައި ދޫކުރަން ފަށާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
އީސް އެހެން ވިދާޅުވީ، އއ. އަތޮޅާއި ކ. އަތޮޅުގެ ބައެއް ރަށްރަށަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން، މިއަދު ހެނދުނު ކ. ގާފަރުގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގަ އެވެ.
ރައީސް ވިދާޅުވީ މަސްވެރިންނަށް ދޫނުކުރެވި މިހާތަނަށް ހުރި ހުރިހާ ފައިސާއެއް މިއަދު ދޫކުރެވުމާ އެކު ބެކްލޮގް އެއްކޮށް ނިމުނީ ކަމަށެވެ. މިއަދުން ފެށިގެން ބެކްލޮގްގެ މައްސަލަ ހައްލު ކުރެވުނީ ކަމަށެވެ.
ވަރަށް ގިނަ ދުވަހުގެ މަސައްކަތަށް ފަހު އާދިއްތަ ދުވަހު، ވަރަށް މުހިންމު ނިންމުމެއް ނިންމާފައިވާކަން ފާހަގަކުރެއްވި އެވެ. އެކަމަކީ ފިނޭންސް މިނިސްޓްރީ އާއި މިފްކޯ އަދި ބީއެމްއެލް އާ ދެމެދު އެއްބަސްވުމެއް އެކުލަވާލުން ކަމުގައި އެމަނިކުފާނު ވިދާޅުވި އެވެ. ވިދާޅުވީ އެއްބަސްވުމުގައި ސޮއިކޮށް، ކަމާ ގުޅޭ އިންތިޒާމުތަކެއް ހަމަޖައްސާފައިވާ ކަަމަށެވެ.
"އެ އިންތިޒާމުތަކުގެ ނަތީޖާއަކީ މާދަމައިން ފެށިގެން ބީއެމްއެލްގައި އެކައުންޓެއް އޮވެއްޖެ ނަމަ، ކޮންމެ މަސް ދޯންޏަކަށް އެ ދޯންޏަކުން މަސްކިރާތާ 48 ގަޑިއިރުގެ ތެރޭގައި ފައިސާ ޖަމާކުރުމުގެ ކަންތައް އެ އޮތީ ހަމަޖައްސައިދީފައި،" ރައީސް ވިދާޅުވި އެވެ.
ރައީސް ވިދާޅުވި ގޮތުގައި މާދަމައިން ފެށިގެން މަސްވެރިންނަށް އެމަނިކުފާނު ވެވަޑައިގެންނެވި ވައުދު ފުއްދެމުން ދާނެ ކަމުގަ އެވެ. މޯލްޑިވްސް އިސްލާމިކް ބޭންކް (އެމްއައިބީ) ގައި އެކައުންޓް ހުރި ފަރާތްތަކަށް އިތުރު ގޮތްތަކެއް ހޯދުމުގެ މަސައްކަތް ކުރައްވާނެ ކަމަށް ވެސް ފާހަގަކުރެއްވި އެވެ.
ރައީސްގެ ވާހަކަފުޅުގައި ވަނީ ވައުދު ފުއްދުމުގައި ބީއެމްއެލްގެ ފަރާތުން ދިން އެއްބާރުލުން ފާހަގަކުރައްވާ ޝުކުރުއަދާކުރައްވާފަ އެވެ.
އެކަމާ ގުޅިގެން މިފްކޯއިން ބުނީ 48 ގަޑިއިރުގެ ތެރޭގައި މަސްވެރިންނަށް ފައިސާ ދޫކުރުމާ ގުޅޭގޮތުން ރައީސް އިއުލާނުކުރެއްވި ގޮތަށް އެމަނިކުފާނުގެ ސިޔާސަތާ އެއްގޮތަށް އެކަން ތަންފީޒު ކުރުމުގައި އެ ކުންފުނިން ދެމިއޮންނާނެ ކަމުގެ ޔަގީންކަންދޭ ކަމަށެވެ.
