ގޮނޑި ގެއްލޭ އިސްލާހު ބާތިލުކުރަން އަންގައި، މުޅި ރާއްޖޭގައި އިހުތިޖާޖުކުރަން އެމްޑީޕީން ފާސްކޮށްފި
ރައްޔިތުންގެ މަޖިލީހަށް އިންތިހާބުވާ ޕާޓީން ވަކިކުރުމުން މެމްބަރުކަމުގެ ގޮނޑި ގެއްލޭ ގޮތަށް ގާނޫނު އަސާސީއަށް ގެނައި އިސްލާހުތައް ބާތިލުކުރަން ސަރުކާރަށް ގޮވާލައި، ބާތިލުކުރަންދެން މުޅި ރާއްޖޭގައި އިހުތިޖާޖުކުރަން އިދިކޮޅު މައި ޕާޓީ، މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ގައުމީ މަޖިލިހުން މިރޭ ފާސްކޮށްފި އެވެ.
ކާނިވާ ސަރަހައްދުގައި ކުރިއަށް ދިޔަ އެ ޕާޓީގެ ގައުމީ މަޖިލިހުގެ ބައްދަލުވުމަށް ޕެޓިޝަނަކާއި ގަރާރެއް ހުށަހެޅުނެވެ. ޕެޓިޝަން ހުށަހެޅުއްވީ ކުރީގެ ޑިފެންސް މިނިސްޓަރު، އެމްޑީޕީގެ ގަލޮޅު އުތުރު ދާއިރާގެ ރައީސް މާރިޔާ އަހުމަދު ދީދީ އެވެ. އަދި ގަރާރު ހުށަހެޅުއްވީ އެމްޑީޕީގެ ކޮލަމާފުށި ދާއިރާގެ ރައީސް މަހުފޫޒް ސައީދެވެ.
ޕެޓިޝަން ހުށަހަޅުއްވަމުން ގާނޫނީ ވަކީލުކަން ވެސް ކުރައްވާ މާރިޔާ ވިދާޅުވީ ގާނޫނު އަސާސީ އިސްލާހުކޮށްފައި ވަނީ ގާނޫނު އަސާސީގެ 90 ވަނަ މާއްދާ އާ ހިލާފަށް ކަމަށެވެ. ގާނޫނު އަސާސީގެ 90 ވަނަ މާއްދާގައި ބުނަނީ ރައްޔިތުންގެ މަޖިލިހުގެ ޖަލްސާއެއްގައި، ނުވަތަ އެ މަޖިލިހުގެ ކޮމިޓީއެއްގައި މަޖިލިހުގެ މެމްބަރަކު ނުވަތަ އެނޫންވެސް މީހަކު އިސްލާމްދީނުގެ އަސްލަކާ ހިލާފުނުވާ ގޮތުގެ މަތީން ދެއްކި ވާހަކައެއް ނުވަތަ ހުށަހެޅި ހުށަހެޅުމެއްގެ ސަބަބުން ނުވަތަ ވޯޓު ދިނުމުގައި އަމަލުކުރި ގޮތެއްގެ ސަބަބުން، ކޯޓަކަށް އެމީހަކު ހާޒިރުކޮށް ނުވަތަ އެމީހަކާ މެދު އެއްވެސް ތަހުގީގެއް ހިންގައި ނުވަތަ ހައްޔަރުކޮށް ނުވަތަ ބަންދެއްކޮށް ނުވަތަ އެމީހަކާ މެދު ދައުވާއެއްކޮށް ހަދައިގެނެއް ނުވާނެ ކަމަށެވެ.
އެމްޑީޕީން ކާނިވާ ސަރަހައްދުގައި ބޭއްވި ގައުމީ މަޖިލިހުގެ ބައްދަލުވުމުގައި މާރިޔާ ޕެޓިޝަން ހުށަހަޅުއްވަނީ / ފޮޓޯ:އެމްޑީޕީ
އެހެންވެ މާރިޔާ ހުށަހެޅުއްވީ އެ ގާނޫނާ ހިލާފަށް މެމްބަރުން ވަކިކުރެވޭ ގޮތަށް ގެނައި ބަދަލު ބާތިލު ކުުރުމަށް އަދި ރައްޔިތުންގެ ބާރުވެރިކަން ގެއްލޭ ގޮތަށް އެކަން ނުކުރުމަށް ރައީސުލްޖުމްހޫރިއްޔާއަށް އެންގުމަށެވެ.
ގަރާރު ހުށަހަޅުއްވަމުން މަހުފޫޒް ވިދާޅުވީ މެމްބަރުކަން ގެއްލޭ ފަދަ ހާލަތެއް 'އުފަން' ކޮށްފައި ވަނީ ގާނޫނު އަސާސީ އާ ހިލާފަށް ކަމަށެވެ.
އެހެންވެ މަހުފޫޒް ހުށަހެޅުއްވީ ގާނޫނު އަސާސީއަށް ގެނައި ބަދަލު، އިއާދަކުރަން ރައްޔިތުންގެ މަޖިލިހަށް އެންގުމަށެވެ. އަދި ގެނައި އިސްލާހު ބާތިލުކުރަން ދެން ރާއްޖޭގެ އެކި ސަރަހައްދުތަކުގައި އެކަމާ ދެކޮޅަށް އިހުތިޖާޖުކޮށް، ޖަމިއްޔާތަކާއި ފަންނީ މީހުންނާ އެކު މަސައްކަތް ކުރުމަށެވެ.
މާރިޔާ ހުށަހެޅުއްވި ޕެޓިޝަނާއި މަހުފޫޒުގެ ގަރާރު ފާސްކޮށްފައި ވަނީ ގައުމީ މަޖިލިހުގެ ބައްދަލުވުމުގައި ބައިވެރިވެވަޑައިގެންނެވި 89 މެމްބަރުންގެ އިއްތިފާގުންނެވެ.
