ކާރެއްގައި ރޯކޮށްލި މައްސަލާގައި ހައްޔަރުކުރި ދެމީހުންގެ ބަންދު އިތުރުކޮށްފި
މާލޭގައި ޕާކްކޮށްފައި އޮތް ކާރެއްގައި ރޯކޮށްލި ކަމުގެ ތުހުމަތުގައި ފުލުހުންގެ ހައްޔަރަށް ގެންދިޔަ ދެ މީހުންގެ ބަންދުގެ މުއްދަތު އިތުރުކޮށްފި އެވެ.
ފުލުހުން ބުނީ އެ މައްސަލާގައި ކޯޓު އަމުރުގެ ދަށުން ހައްޔަރުކޮށްފައިވަނީ މ. އަރާރަތްކުރި, ހާލިދު މަހްމޫދު (35އ) އަދި އދ. މާމިގިލި, ބްލޫވިންޑް، ހަސަން ނަސީމް (31އ) ކަމަށެވެ.
އެ މީހުންގެ މައްޗަށް ތުހުމަތުކުރެވެނީ ނޮވެންބަރު 25 ވަނަ ދުވަހުގެ އިރުއޮއްސި 6:25 ހާއިރު ބުރުޒުމަގު, ސިނަމާލެ 1 ގެ ޕާކިން ޒޯންގައި ޕާކުކޮށްފައި އޮތް ކާރެއްގައި އަލިފާން ރޯކޮށްލި ކަމުގެ ތުހުމަތެވެ.
28 ވަނަ ދުވަހު ނަސީމްގެ ބަންދަށް 15 ދުވަހުގެ މުއްދަތެއް ޖަހާފައިވާއިރު 29 ވަނަ ދުވަހު ހާލިދުގެ ބަންދަށް 15 ދުވަސް ޖަހާފައިވެ އެވެ.
އެ މުއްދަތު ހަމަވުމުން އެ ދެ މީހުން ބަންދާމެދު ގޮތެއް ނިންމުމަށް ކްރިމިނަލް ކޯޓަށް އިއްޔެ ހާޒިރުކުުރުމުން އިތުރު 15 ދުވަހަށް ބަންދުކުރަން އަމުރުކޮށްފައިވެ އެވެ.
ނަސީމް ބަންދުކުރަން ކްރިމިނަލް ކޯޓުން ނެރުނު އަމުރުން އެނގޭ ގޮތުގައި އޭނާ އަކީ ހައްޔަރާއި ބަންދު ލޮގް އޮތް މީހެކެވެ. އެގޮތުން 23 ފަހަރަކު އޭނާ ހައްޔަރުކޮށްފައިވާއިރު 20 ފަހަރު އޭނާ ބަންދުކޮށްފައިވެ އެވެ.
ހާލިދު ބަންދުކުރަން ކްރިމިނަލް ކޯޓުން ނެރުނު އަމުރުގައި ބުނީ އޭނާގެ ހައްޔަރު ބަންދު 51 ރެކޯޑް އޮތް ކަމަށެވެ.
ކޯޓު އަމުރުގައި ބުނެފައިވަނީ ކުށްކުރި ކަމަށް ތުހުމަތުކުރެވޭ މިންވަރަށް ހެކި ހުށަހަޅާފައިވާ ކަމަށެވެ. އެގޮތުން ކާރެއްގައި ރޯކޮށްލިކަމަށް ތުހުމަތުކުރެވޭ ކަމަށާއި އެކަން ހިނގާފައިވަނީ ދެ ބައެއްގެ ދެމެދުގައި ހިނގާދިޔަ ދެބަސްވުންތަކާ ގުޅިގެން ކުރިކަމެއް ކަމަށް ބެލެވޭ ކަމަށް ބުނެފައިވެ އެވެ.
އޭގެ އިތުރުން ދެ މީހަކު ވެގެން ކާރުގައި ރޯކޮށްލާ މަންޒަރާއި ރޯކޮށްލުމަށްފަހު ދުވެފައިދާތަން ސީސީޓީވީ ފުޓޭޖުން ފެންނަ ކަމަށް އަމުރުގައި ބުނެފައިވެ އެވެ.
