ވަގަށް ބިން ވިއްކި މައްސަލަ ބެލުން ލަސްކަމަށް ބުނެ އެމްޑީޕީގެ ފާޑުކިއުން މިނިސްޓްރީއަށް
ހައުސިން ޑިވޮލޮޕްމެންޓް ކޯޕަރޭޝަން (އެޗްޑީސީ) އިން ހުޅުމާލެއިން އޮޅުވާލައިގެން ގޯތިތަކެއް ވިއްކި މައްސަލަ ބެލުން ލަސްވި ސަބަބާ މެދު ސުވާލު އުފައްދައި ޒިންމާވާން ޖެހޭ ފަރާތްތަކާ މެދު ފިޔަވަޅު އަޅަން އިދިކޮޅު މައި ޕާޓީ، މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ގޮވާލައިފި އެވެ.
މާލޭ ރަށްވެހިންނަށް ގޯތި ދިނުމަށް ހިންގި "ބިންވެރިޔާ" ސްކީމުގެ ދަށުން ގޯތި ނުލިބޭ ބަޔަކަށް، ގަވާއިދާ ހިލާފަށް އެޗްޑީސީން ހުޅުމާލެއިން ގޯތިތަކެއް ދިން މައްސަލަ ފެންމަތިވެ، އެ މައްސަލައިގެ ޖިނާއީ ތަހުގީގެއް ފުލުހުން ވަނީ ފަށާފަ އެވެ. ފުލުހުން ބަލަނީ ޑޮކިއުމެންޓުތަކެއް ފޯޖުކުރި މައްސަލަ އެވެ.
މައްސަލަ އާ ގުޅިގެން ޗެއާމަން ފިޔަވައި އެ ކުންފުނީގެ ޑިރެކްޓަރުންގެ ބޯޑުގެ ހުރިހާ މެންބަރުން ވަނީ ސަސްޕެންޑްކޮށްފަ އެވެ. އަދި އެމްޑަބްލިޔުއެސްސީން ވަނީ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދު ވެސް ސަސްޕެންޑްކޮށްފަ އެވެ. އެކަމުގެ ފުރިހަމަ ތަހުގީގެއް ހިންގަން ޕްރޮސެކިއުޓާ ޖެނެރަލް ވެސް ވަނީ އަމުރުކުރައްވާފަ އެވެ.
އެމްޑީޕީގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ހައުސިން މިނިސްޓްރީގެ ކުރީގެ ސްޓޭޓް މިނިސްޓަރު އަކްރަމް ކަމާލުއްދީން ވިދާޅުވީ ހައުސިން މިނިސްޓްރީއަށް އެނގުނު ހިސާބުން މައްސަލަ އާ މެދު ފިޔަވަޅު ނޭޅި ދިގުދެމިގެން އައި އައުމަކީ ސުވާލު އުފެދޭ ކަމެއް ކަމަށެވެ. މައްސަލަ އާ ގުޅިގެން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު ޒިންމާ ކުރުވައި، ސަސްޕެންޑް ކުރުމުން ހާމަވަނީ އަޅާ ފިޔަވަޅުތަކުގައި ހުރި ދޯދިޔާކަން ކަމަށެވެ.
"ހައުސިން މިނިސްޓްރީން މިކަން ހިންގެވިއިރު، ހައުސިން މިނިސްޓްރީއަށް ސީދާ އެނގިވަޑައިގަންނަވާނެ، ހުރިހާ ތަފުސީލެއް. އެ ނޭނގޭނެ އެޗްޑީސީއަކަށް. ޕްލޮޓްތަކުގެ ނަމްބަރުތަކާ އެއްޗިއްސެއް، ހުސްކޮށް ހުރި ޕްލޮޓްތަކުގެ. އެ މައުލޫމާތު ހައުސިން މިނިސްޓްރީން ޝެއާ ނުކުރަންޏަކާ އެޗްޑީސީއަކަށް މައުލޫމާތެއް ނޭނގޭނެ،" އަކްރަމް ވިދާޅުވި އެވެ.
މައްސަލަ އާ ގުޅިގެން ހައުސިން މިނިސްޓަރު ޑރ. އަލީ ހައިދަރު އަހްމަދު އިސްތިއުފާ ދެއްވަން ޖެހޭނެ ކަމަށާ އަދި މައްސަލަ ނިމެންދެން މަގާމުން ސަސްޕެންޑްކުރަން ޖެހޭނެ ކަމަށް ވެސް އެމްޑީޕީ ހައުސިން ކޮމިޓީގެ މުގައްރިރު ވިދާޅުވި އެވެ.
ބައްދަލުވުމުގައި ހައުސިން މިނިސްޓްރީގެ ކުރީގެ ސީނިއާ އެގްޒެކެޓިވް އޮފިސަރު މުހައްމަދު އާރިފް ވިދާޅުވި ގޮތުގައި އެމްޑީޕީ ސަރުކާރުން ބިންވެރިޔާގެ ސްކީމުގެ މަސައްކަތްތައް ކުރަމުން އައީ އާންމުންނަށް ކަމާ ގުޅުންހުރި މައުލޫމާތު އެނގޭނެހެން ހާމަކަން ބޮޑު ގޮތެއްގައި ކަމުގަ އެވެ.
އެމްޑީޕީގެ ސަރުކާރުގައި ގާކޮށި ފްލެޓްތަކަކާ ގުޅިގެން ފެންމަތި އެފަދަ މައްސަލައެއް ފުލުހުންނަށް ހުށަހެޅި ކަމުގަ އެވެ. އޭރު ބިންވެރިޔާ ސްކީމާ ގުޅިގެން ހައުސިން މިނިސްޓްރީން އެޗްޑީސީ އާއެކު މުއާމަލާތް ކުރަމުންދިޔަ ގޮތުގެ ކުރު ތަފުސީލެއް ދެއްވި އެވެ.
"އެގޮތަށް ދިޔަ ޕްރޮސެސްއެއްގެ ތެރެއިން ހައުސިން މިނިސްޓްރީން ލިސްޓު ނުފޮނުވާ އިން ދެ ފަރާތަކަށް ހުއްދަ ދީފައި، އިންފާރު ރާޅާފައިހުރި ކަން މި އެނގުނީ. އެންމެ ފުރަތަމަ މީގެ ތެރޭގައި ގޯހެއް އުޅޭކަން ހަމަ ޔަގީންވާ ހިސާބެއް މިއީ ވެސް،" އާރިފް ވިދާޅުވި އެެވެ.
އެމްޑީޕީގެ ހައުސިން ކޮމިޓީގެ މެމްބަރު ވިދާޅުވީ އެއީ އެޗްޑީސީން މީގެކުރިން އަމަލުކުރަމުން އައި ގޮތެއް ނޫން ކަމަށެވެ. ރޭގައި ފެނުނީ އިންފާރު ވަކިކުރަން އެދުނު 2 ގޯއްޗެއްގެ އިންފާރު ވަކިކުރަން ހުއްދަ ދީފައި ވަނިކޮށް، އެ ގޯތީގެ އިންފާރު އެހެން ފަރާތަކުން ވަކިކޮށްދޭން އެދުމުން "ފްލެގް އައުޓް" ވީ ތަން ކަން ކަމަށެވެ. އަދި އެގޮތަށް އެކަން ނުވާ ގޯތިތަކެއް އިތުރަށް ހުރުމަކީ އެކަށީގެންވާ ކަމެއް ކަމަށެވެ.
މި މައްސަލަ އާ ގުޅިގެން ދެން ފާހަގަކުރެވުނީ ބިންވެރިޔާ ޕޯޓަލްއަށް ލޮގިން ނުވެވޭނެ މީހަކު ލޮގިން ވެފައިވާކަން ކަމުގައި އާރިފް ފާހަގަކުރެއްވި އެވެ. ރަށްފުށުގެ ރަޖިސްޓްރީއެއްގައި އޮންނަ މީހަކަށް އެ ޕޯޓަލްއަށް "ލޮގިން" ނުވެވޭއިރު، އޭނާއަށް ބިމެއް ލިބި އިން ވަކިކުރުމުގެ ހުއްދަ އެޗްޑީސީން ދީފައިވާތަން ކަމަށެވެ.
ގަލޮޅު ދެކުނު ދާއިރާގައި މަޖިލިސް މެމްބަރު މީކާއިލު އަހްމަދު ނަސީމް ވިދާޅުވި ގޮތުގައި މިފަދަ މައްސަލަތައް ފެންމަތިވުމުން ބަލަން ހުންނަ މުއައްސަސާތައް ހިންގަމުން އަންނަ ގޮތަށް މި ސަރުކާރުން ބަދަލުތައް ގެންނަމުންދާ ކަމުގަ އެވެ. އެގޮތުން ފާހަގަކުރެއްވީ ކޮމިޝަންތަކަށް މެމްބަރުން އައްޔަންކުރުމުގައި އަމަލު ކުރަމުން އައި އުސޫލަށް މިފަހުން ގެންނެވި ބަދަލެވެ. އެކަމާ ގުޅުވާ ވިދާޅުވީ މުއައްސަސާތަކަށް މިނިވަން ތަހުގީގެއް ކުރެވޭނެ ކަމަށް ނުފެންނަ ކަމަށެވެ.
މި މައްސަލަ ބަލައިދިނުމަށް އެ ޕާޓީގެ ފަރާތުން މިހާރު ރައްޔިތުންގެ މަޖިލިހަށް ހުށަހަޅާފައިވާކަން އޭނާ ފާހަގަކުރެއްވި އެވެ. އޭގެ އިތުރުން ވެސް ކަމާ ގުޅިގެން ހުރި ކަންބޮޑުވުންތައް ހިއްސާކުރެއްވި އެވެ.
"ހިނގައިގެން މިއުޅެނީ އާއިލީ މަސްލަހަތު އެކުލެވޭ ހިޔާނާތެއް، ވައްކަމެއް. އެހެންވީމާ އާއިލީ މަސްލަހަތު މިހާ ބޮޑަށް ހިމެނޭ ވައްކަމެއްގައި ސޯޝަލް ހައުސިންނާ ގުޅޭ ފްލެޓްތައް ވިލަރެސްކުރާ ކޮމިޓީގައި ރައީސުލްޖުމްހޫރިއްޔާ އައްޔަންކުރައްވާފައި އަނެއްކާވެސް މި އިންނަވަނީ މި ވައްކަމުގެ ތުހުމަތު ކުރެއްވިގެން އުޅުއްވާ ދެ ބޭފުޅުން.. އެއްބަނޑުއެއްބަފާ ބޭފުޅެއް ކަަމަށްވާ ފިޒާނާ ރަޝީދު،" މީކާއިލު ވިދާޅުވި އެވެ.
އެކަން ފާހަގަކުރައްވާ އާންމުންގެ އިތުބާރު ތަހުގީގަށް ހޯދުމަށް ކަމާ ގުޅުންހުރި ހުރިހާ ފަރާތްތަކުން މިވަގުތު އަދާކުރައްވަމުން ގެންދަވާ މަގާމުތަކުން އެކަހެރި ކުރުމަށް ގޮވާލެއްވި އެވެ.
މައްސަލަ އެނގުނު ހިސާބުން ފިޔަވަޅު އެޅެން ޖެހޭނެކަން ފާހަގަކުރައްވާ ޕާޓީގެ ތަރުޖަމާނު އަނަސް އަބްދުއްސައްތާރު ވެސް ވަނީ ފިޔަވަޅު ނޭޅި ދިގުދެމިގެންދިޔައީތީ ކަމުގެ ޒިންމާ ޕީސީބީގެ އިތުރުން ރައީސް ޑރ. މުހައްމަދު މުއިއްޒު ވެސް ނަންގަވަން ޖެހޭނެ ކަމަށް ވިދާޅުވެފަ އެވެ.
