ޑެޕިއުޓީ މިނިސްޓަރުންނާއި ސީނިއާ ޕޮލިޓިކަލް ޑިރެކްޓަރުން ހިމެނޭހެން 9 މުވައްޒަފުން ސަސްޕެންޑް
ޑެޕިއުޓީ މިނިސްޓަރުންނާއި ސީނިއާ ޕޮލިޓިކަލް ޑިރެކްޓަރުން ހިމެނޭހެން ހައުސިން، ލޭންޑް އެންޑް އާބަން ޑިވެލޮޕްމަންޓް މިނިސްޓްރީގެ 9 މުވައްޒަފަކު ސަސްޕެންޑްކޮށްފި އެވެ.
މާލޭ ރަށްވެހިންނަށް ގޯތި ދިނުމަށް ހިންގި "ބިންވެރިޔާ" ސްކީމުގެ ދަށުން ގޯތި ނުލިބޭ ބަޔަކަށް، ގަވާއިދާ ހިލާފަށް ހައުސިން ޑިވޮލޮޕްމެންޓް ކޯޕަރޭޝަން (އެޗްޑީސީ) އިން ހުޅުމާލެއިން ގޯތިތަކެއް ދިން މައްސަލަ ފެންމަތިވެ، އެ މައްސަލައިގެ ޖިނާއީ ތަހުގީގެއް ފުލުހުން ދަނީ ކުރަމުންނެވެ. ފުލުހުން ބަލަނީ ޑޮކިއުމެންޓުތަކެއް ފޯޖުކުރި މައްސަލަ އެވެ.
ގޯތިތަކާ ގުޅިގެން ހައުސިން މިނިސްޓްރީ އާއި އެޗްޑީސީ އާ ދެމެދު ސިޓީތަކެއް ބަދަލުކޮށްފައިވާއިރު، ތަހުގީގަށް ބޭނުންވާ ލިޔެކިޔުންތައް ހައުސިން މިނިސްޓްރީން މިހާތަނަށް ލިބިފައިވާ ކަމަށް ފުލުހުން ވަނީ ބުނެފަ އެވެ.
އިސްކަންދަރު ބިލްޑިންގައި ރޭ ބޭއްވި ނޫސްވެރިންގެ ބައްދަލުވުމުގައި ސެންޓްރަލް އިންވެސްޓިގޭޝަން ކޮމާންޑުގެ ހެޑް، އެސިސްޓެންޓް ކޮމިޝަނާ އޮފް ޕޮލިސް އަބްދުﷲ ޝަރީފް ވަނީ "ބިންވެރިޔާ" އަދި "ގެދޮރުވެރިޔާ" ސްކީމުގެ ދަށުން އަމަލުކޮށްފައިވާ ގޮތްތަކުގެ ތަހުގީގެއް ހިންގުމަށް ޕްރޮސެކިއުޓާ ޖެނެރަލްގެ އޮފީހުން ފުލުހުންނާއި އެންޓި ކޮރަޕްޝަން ކޮމިޝަން (އޭސީސީ) ގެ މައްޗަށް އަމުރެއް ނެރެފައިވާ ކަމަށެވެ.
"...ސްކީމްތަކުގެ ދަށުން އެއްވެސް ފަރާތަކުން ގޯހެއް ހިންގާފައި އޮތްތޯ. ނޫނީ މަގާމުގެ ނުފޫޒު ބޭނުންކޮށްގެން އެއްވެސް ކަމެއް ހިންގާފައި އޮތްތޯ ބެލުމަށް ޓަކައި ދެ ފަރާތް ގުޅިގެން މަސައްކަތް ކުރުމަށް ޓަކައި އަޅުގަނޑުމެންނަށް އަމުރުކޮށްފައި އެބައޮތް. އެހެންވުމާ އެކު އަޅުގަނޑުމެން އެ މަސައްކަތް ވެސް ކުރިއަށް ގެންދާނަން،" ޝަރީފް ވިދާޅުވި އެވެ.
އޭސީޕީ ވިދާޅުވެފައިވާ ގޮތުގައި އެޕާޓްމެންޓަށް ކުރިމަތިލީ ބައެއް ފަރާތްތަކުން ވެސް ބިން ލިބުނު ކަމަށް ލިޔުން ހޯދާފައިވާ ކަމަށާއި ފާއިތުވި 24 ގަޑިއިރު ތެރޭގައި ކުރެވެނު މަސައްކަތުން އެނގެނީ އިތުރު މަސައްކަތްތަކެއް ކުރަން ޖެހޭކަން ކަމުގަ އެވެ.
ކުރަމުންދާ މަސައްކަތުގައި އެކިއެކި ފަރާތްތަކުންނާ އަދި ސަރުކާރުގެ މިނިސްޓްރީތަކުން ދެމުން އަންނަ އެއްބާރުލުން ފުލުހުންގެ ފަރާތުން ވަނީ ފާހަގަކޮށްފަ އެވެ.
"ދެން" އަށް މައުލޫމާތު ލިބިފައިވާ ގޮތުން އެ މިނިސްޓްރީގެ 9 މުވައްޒަފުން ސަސްޕެންޑްކޮށްފައި ވަނީ އިއްޔެގެ ރަސްމީ ގަޑި ނިމުނުފަހުންނެވެ. އެ މުވައްޒަފުން ސަސްޕެންޑްކުރި ސަބަބު ބަޔާންކޮށްފައެއް ނުވެ އެވެ.
ފުލުހުންގެ ތަހުގީގަށް އެއްބާރުލުން ދިނުމުގެ ގޮތުން ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ވަނީ އެޗްޑީސީގެ ޗެއާމަން އަހްމަދު ނާސިފް ފިޔަވައި ޑިރެކްޓަރުންގެ ބޯޑުގެ ހުރިހާ މެންބަރުން އިއްޔެ ސަސްޕެންޑްކޮށްފަ އެވެ.
ސޯޝަލް މީޑިއާގައި ދައުރުވާ ލިސްޓުން ދައްކާ ގޮތުން ޝަރުތު ހަމަނުވިޔަސް ގޯތި ދޫކުރި މީހުންގެ ތެރޭގައި އެޗްޑީސީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދުގެ ބޭބެ އަދި މާލެ ވޯޓަ އެންޑް ސްވަރޭޖް ކޮމްޕެނީ (އެމްޑަބްލިއުއެސްސީ) ގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދު ހިމެނެ އެވެ.
މައްސަލަ އާ ގުޅިގެން އެމްޑަބްލިއުއެސްސީން ވަނީ އިއްޔެއިން ފެށިގެން ހުރިހާ ޒިންމާތަކަކުން ފަޒީލް ވަކިކޮށް، އޮފީހަށް ނުނިކުމޭ ގޮތަށް ސަސްޕެންޑްކޮށްފަ އެވެ.
މި މައްސަލަ ބެލުން ލަސްވި ސަބަބާ މެދު ސުވާލު އުފައްދައި ޒިންމާވާން ޖެހޭ ފަރާތްތަކާ މެދު ފިޔަވަޅު އަޅަން އިދިކޮޅު މައި ޕާޓީ، މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން އިއްޔެ ވަނީ ގޮވާލާފަ އެވެ.
Ads by STO
