މި ޓީޗަރުގެ ކައިވެނި ޕާޓީ: އިންސާނިއްޔަތުގެ ފުރިހަމަ ނަމޫނާއެއް!
ގިނަ މީހުންނަށް އެނގޭނެ ފަދައިން އަދި ޓީވީ އިން ދައްކަމުން އަންނަ ހިންދީ ޑުރާމާ ސިލްސިލާ ތަކުގައިވެސް ފެންނާނެ ފަދައިން، އިންޑިއާގެ ކައިވެނި ތަކަކީ އާދަޔާއި ޚިލާފަށް ފޯރިނަގާ އަދި ބޮޑެތި ކެއުން ތަކުން ޖަރީ ވެފައިވާ ޕާޓީތަކެކެވެ. އެހެން ނަމަވެސް އިންޑިއާގެ ޓީޗަރެއް ކަމަށްވާ ނޫރަޖަހާން ޚަތުން ނަމަކަށް ކިޔާ މީހަކު މިވަނީ އޭނާގެ ތަފާތުކޮށް ނަމޫނާ އެއް ދައްކާފައެވެ.
ކައިވެނި ޕާޓީތަކުން ގިނަ މީހުން ބޭނުން ވަނީ މޮޅެތި އަގުބޮޑު ހަދިޔާތަކެވެ.އެހެން ނަމަވެސް ނޫރަޖަހާން ގެ މި ކައިވެނިޕާޓީ ވެގެން ދިޔައީ އާދަޔާއި ޚިލާފު ޕާޓީއަކަށެވެ. “ރިޓާން ގިފްޓްސް” ގޮތުގައި މީނާ ހަދިޔާކުރީ ކިޔަވާ ފޮތްތަކެވެ. އަދި އެއީ އެއަށް އެންމެ ބޭނުން ޖެހިފައިވާ ކުދިންނަށެވެ.
މީގެ އިތުރުން މީނާ ވަނީ ކައިވެނީގެ އުފަލުގައި ލޭ ހަދިޔާ ކުރުމުގެ ކޭމްޕެއް ވެސް ބާއްވާފައެވެ. މިއީ އިންސާނިއްޔަތުގެ ލާމަސީލު މިސާލެކެވެ. އެހެންމީހުންގެ ޙަޔާތުގެ މި ބޮޑު ދުވަހަކީ އުފާވެރި އަދި ހަނދާނުން ފޮހެނުލެވޭ ފަދަ ދުވަހަކަށް ހެދޭތޯ މަސައްކަތް ކުރާއިރު، ނޫރަޖަހާން ވިސްނީ އިޖުތިމާޢީ ގޮތުން ކޮންމެވެސް ފައިދާއެއް ވާ ފަދަ ހަރަކާތެއް ކުރިއަށް ގެންދިއުމަށެވެ.
ލޭ ބޭނުންވެފައި ތިބި ކިތައް ފަރާތަށް ލޭ ފޯރުކޮށްދެވޭނެ ހެއްޔެވެ؟ ކިތައް މީހުންގެ ހެޔޮދުޢާ އޭނާއަށް ލިބޭނެ ހެއްޔެވެ؟
ނޫރަޖަހާން މިހެން ކަންތައް ކުރީ ކިޔަވަން ބޭނުންވެފައި ނަމަވެސް ކިޔަވާނެ ތަނަވަސް ކަމެއް ނެތް ފަރާތްތަކަށް ތަޢުލީމް ހާސިލު ކުރުމުގެ ފުރުސަތު ހޯދުމަށް އެހީވެދިނުމުގެ ގޮތުންނާއި، މިދުވަސްވަރަކީ ކޮވިޑު-19 އާއި ގުޅިގެން ބްލަޑް ބޭންކު ތަކުން ލޭ މަދުވެފައިވާ ދުވަސް ވަރަކަށް ވާތީ އެކަމަށް އޭނާގެ ފަރާތުން އެހީތެރިކަމެއް ވެދިނުމަށް ކަމަށް އޭނާ ބުނެފައިވެއެވެ.
ލޭ ހަދިޔާ ކުރުމާއި ފޮތް ހަދިޔާ ކުރުމުގެ އިތުރުން ނޫރަޖަހާން އާއި އޭނަގެ ބައްޕަ ވަނީ ޕާޓީއަށް ދިޔަ ކޮންމެ މީހަކަށް ގަހެއް ހަދިޔާ ކޮށްފައެވެ. މިހުރިހާ ކަންކަމަކާއެކު ނޫރަޖަހާންގެ މި ކައިވެނި ޙަފްލާއާއި ދޭތެރޭ އޭނަގެ ބައްޕައާއި ތިމާގެ މީހުންގެ އިތުރުން އަވަށްޓެރިން ވެސް ތިބީ ވަރަށް ބޮޑަށް ހިތްހަމަ ޖެހިފައިއެވެ.
