Tuesday, 17 November 2026
Advertisement
HDC — Share-Below (leaderboard)
ސިޔާސީ

ކުރީ ސަރުކާރުން ދޫކުރި ލިޔުމެކޭ ބުނަނީ ހަގީގަތް އޮޅުވާލަން: އަކްރަމް

ކުރީ ސަރުކާރުން ދޫކުރި ލިޔުމެކޭ ބުނަނީ ހަގީގަތް އޮޅުވާލަން: އަކްރަމް
ބިންވެރިޔާ ސްކީމުގެ ދަށުން ގޯތި ނުލިބޭ މީހަކަށް ގޯތި ދިން ކަމުގެ ލިޔުން ދީފައިވަނީ ކުރީ ސަރުކާރުން ކަމަށް ބުނެ ދެއްކި ވާހަކަތައް ހައުސިން މިނިސްޓްރީގެ ކުރީގެ ސްޓޭޓް މިނިސްޓަރު އަކްރަމް ކަމާލުއްދީން ދޮގުކުރައްވައިފި އެވެ. ގޯތި ނުލިބޭ ބަޔަކަށް ގޯތި ދިން މައްސަލަ ފެންމަތިވެ، އެ މައްސަލައިގެ ޖިނާއީ ތަހުގީގެއް ފުލުހުން ދަނީ ކުރަމުންނެވެ. އެކަމާ ގުޅޭގޮތުން މައުލޫމާތު ދިނުމަށް ރޭ ބޭއްވި ނޫސްވެރިންގެ ބައްދަލުވުމުގައި ފުލުހުން ބުނީ ޝަރުތު ހަމަނުވާ ބަޔަކަށް ގޯތި ލިބުނު ކަމަށް ބުނެ ލިޔުންތަކެއް ހުށަހެޅި ފަރާތްތަކާ ސުވާލުކޮށްފައިވާ ކަމަށެވެ. އެ މީހުންނާ ސުވާލުކުރުމުން އެއީ ކުރީ ސަރުކާރުން ދިން ލިޔުމެއް ކަމަށް ބުނެފައިވާ ކަމަށެވެ. އެ ލިޔުން ލިބުނީ ގޯތި ނުލިބޭ ކަމުގެ ޝަކުވާ ހުށަހެޅުމުން ކުރީގެ ހައުސިން މިނިސްޓްރީގެ އިސްވެރިން ބައްދަލުކޮށް، ޝަކުވާތައް ބެލުމަށް ފަހުގައި ކަމަށް މައުލޫމާތު ދީފައިވާ ކަމުގައި ފުލުހުން ވަނީ ބުނެފަ އެވެ. ރޭ ފުލުހުން ދެއްކި ވާހަކަތަކާ ގުޅިގެން "އެކްސް" ގައި މިއަދު ކުރެއްވި ޕޯސްޓެއްގައި އަކްރަމް ވިދާޅުވީ އެގްރިމަންޓެއް ކަމަށް ދެއްކުމަށް ޓަކައި ތައްޔާރުކޮށްފައިވާ ޑޮކިއުމަންޓަކާ މެދު ސުވާލު އުފެދުމުން، އެ ޑޮކިއުމަންޓުގެ ސައްހަކަން ކަށަވަރު ކުރުމަށް ފޮރެންސިކް ތަހުލީލެއް ވެސް ނުހަދައި، ކުރީ ސަރުކާރުން ދޫކުރި ލިޔުމެއްގެ ގޮތުގައި އެ ވާހަކަ ދެއްކީ ރައްޔިތުންނަށް ހަގީގަތް އޮޅުވާލުމަށް ކަމަށް ދެކެވަޑައިގަންނަވާ ކަމަށެވެ. ސައްހަ ނޫން ލިޔުން ހުށަހެޅި ކަމަށް ތުހުމަތު ކުރެވޭ މީހުންގެ ތެރޭގައި އެޗްޑީސީގެ މެނޭޖިން ޑިރެކްޓަރުގެ ބޭބެ މުހައްމަދު ފަޒީލް ރަޝީދު ވެސް ހިމެެނިވަޑައިގަންނަވާއިރު، އޭނާ އާ ދުވަހަކު ވެސް ފަޒީލް އާ ބައްދަލުވެފައިނުވާ ކަމަށް އަކްރަމް ވިދާޅުވި އެވެ. އަދި އޭނާ އާއެކު އެއްވެސް މުއާމަލާތެއް ކޮށްފައި ނުވާނެ ކަމަށާއި އެއްވެސް ކަމެއްގައި ބައްދަލުކުރަން ފަޒީލް ވެސް އެދިފައި ނެތް ކަމަށެވެ.
"ބިންވެރިޔާ އަދި ގެދޮރުވެރިޔާ ސްކީމްގެ ދަށުން އެއްވެސް ލިޔުމެއް އުސޫލުން ބޭރުން ނުވަތަ ގަވާއިދާ ހިލާފަށް ނުވަތަ ނުރަސްމީކޮށް އެއްވެސް ފަރާތަކަށް ކުރީގެ ހައުސިން މިނިސްޓްރީން ދޫކޮށްފައި ނުވާނެކަމުގެ ޔަގީންކަން އަރުވަމެވެ،" އަކްރަމް ވިދާޅުވި އެވެ.
އިތުރަށް ވިދާޅުވީ ސަރުކާރުގައި އޭނާ އަދާކުރެއްވި މަގާމުގެ ހައިސިއްޔަތުން ކޮށްފައިވާ މަސައްކަތްތަކާ ގުޅޭގޮތުން ޖަވާބުދާރީ ނުވެވޭނެ އެއްވެސް ކަމެއް ނޯންނާނެ ކަމަށެވެ. އެ މައްސަލައިގައި މާދަމާ ނޫސްވެރިންނާ ބައްދަލުކުރަން ނިންމަވާފައިވާ ކަމަށް ވެސް އަކްރަމް ވަނީ ފާހަގަކުރައްވާފަ އެވެ.

ރިއެކްޝަން

Advertisement
Allied — Dhen Online (box)

ކޮމެންޓް

މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.