އުސޫލުން ބޭރުން ލިޔުމެއް ނުދެން، ފުލުހުން ވާހަކަ ދައްކަނީ އޮޅުވާލައިގެން: އަކްރަމް
ގޯތި ނުލިބޭ ބަޔަކަށް ގޯތި ދިން މައްސަލަ ފެންމަތިވެ، އެ މައްސަލައިގެ ޖިނާއީ ތަހުގީގާއި ގުޅިގެން ފުލުހުން ނޫސްވެރިންގެ ބައްދަލުވުމެއް ބާއްވާ، މައުލޫމާތު ހިއްސާކުރީ ކަމުގެ ހަގީގަތް ނުބަލާ ކަމަށް ހައުސިން މިނިސްޓްރީގެ ކުރީގެ ސްޓޭޓް މިނިސްޓަރު އަކުރަމް ކަމާލުއްދީން ވިދާޅުވެއްޖެ އެވެ.
އަކުރަމް އެހެން ވިދާޅުވީ، އެމްޑީޕީ އޮފީހުގައި މިއަދު ބޭއްވި އެ ޕާޓީގެ ނޫސްވެރިންގެ ބައްދަލުވުމުގައި ވާހަކަ ދައްކަވަމުންނެވެ.
ފުލުހުން ތަހުގީގު ކުރަމުންދާ ބިންވެރިޔާ ސްކީމާގުޅޭ ފޯޖަރީގެ މައްސަލައާ ގުޅޭގޮތުން އިސްކަންދަރު ބިލްޑިންގައި މިދިޔަ ބުރާސްފަތި ދުވަހުގެރޭ ބޭއްވި ޕްރެސް ބްރީފިންގައި އެސިސްޓެންޓް ކޮމިޝަނާ އޮފް ޕޮލިސް އަބްދުﷲ ޝަރީފް ވިދާޅުވީ އެ މައްސަލަ ފުލުހުންނަށް ހުށަހެޅުމާއެކު އެންމެ ފުރަތަމަ ކަމަކަށް ބެލީ ސޯޝަލް މިޑިއާގައި، ގޯތި ނުލިބޭ މީހަކަށް ގޯތި ލިބުނު ކަމަށް ބުނެ ދައުރުވަމުން ދިޔަ ލިޔުމުގެ ސައްހަކަން ކަށަވަރު ކުރުން ކަމަށެވެ.
އެކަން ޔަގީންކުރުމަށްޓަކައި ފުލުހުން އެޗްޑީސީއަށް ޒިޔާރަތްކުރި ކުރުމުން އެ ލިޔުމަކީ އެތަނުގައިވެސް އޮތް ލިޔުމެއްކަން ޝަރީފް ވިދާޅުވި އެވެ. އަދި އެއް ލިޔުމަކީ އެޗްޑީސީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދުގެ ބޭބެ އަދި އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލު ރަޝީދަށް އުސޫލުން ބޭރުން ދިން ބިމުގައި ވަށާ ފާރު ރޭނުމުގެ ހުއްދައަށް އެދިފައިވާ ލިޔުމެވެ.
ޝަރުތު ހަމަނުވިޔަސް، މިދިޔަ ސަރުކާރުގައި ހައުސިން މިނިސްޓްރީގައި ޝަކުވާކުރުމުން ސަރުކާރުގެ އިސްވެރިން ގޯތި ހަަމަޖައްސައިދީފައިވާ ކަމަށް ބުނެ ލިޔުން ދީފައިވާ ކަމަށް ފުލުހުންނަނަށް ބަޔާންދިން ބައެއް މީހުން ބުނެފައިވާ ކަމަށް ފުލުހުން ބުންޏެވެ.
ނިމިދިޔަ ރައީސް އިބްރާހިމް މުހައްމަދު ސޯލިހުގެ ސަރުކާރުގައި ރައްޔިތުންނަށް ބޯހިޔާވަހިކަން ފޯރުކޮށްދިނުމަށް ކުރިއަށް ގެންދިޔަ ބިންވެރިޔާ އަދި ގެދޮރުވެރިޔާ ސްކީމުގެ މަސައްކަތުގައި އިސްކޮށް ހަރަކާތްތެރިވި އަކުރަމް ވިދާޅުވީ އެ ސްކީމްތަކުގެ ދަށުން އެއްވެސް ލިޔުމެއް އުސޫލުން ބޭރުން އެއްވެސް ފަރާތަކަށް ހިއްސާ ކޮށްފައިނުވާނެ ކަމަށެވެ.
"ބިންވެރިޔާ އަދި ގެދޮރުވެރިޔާ ސްކީމްގެ ދަށުން އެއްވެސް ލިޔުމެއް އުސޫލުން ބޭރުން، ނުވަތަ ގަވާއިދާ ހިލާފަ އެއްވެސް ފަރާތަކަށް ދޫކޮށްފައެއް ނޯންނާނެ،" އަކުރަމް ވިދާޅުވި އެވެ.
އިތުރަށް އޭނާ ވިދާޅުވީ، އެ ސިސްޓަމް ތެރެއިން އުސޫލުން ބޭރުން ލިޔުން ދޫނުވެސް ކުރެވޭނެ ކަމަށެވެ.
ފުލުހުން ޕްރެސް ބްރީފިންގައި ދެއްކެވި ވާހަކަތަކަށް އިޝާރާތް ކުރައްވާ އަކުރަމް ވިދާޅުވީ، ފުލުހުން މީޑިއާތަކަށް މައުލޫމާތު ދިނީ އެކަށީގެންވާ ތަހުގީގެއް ނުހިންގާ ކަމަށެވެ. ކުރީ ސަރުކާރުން ދިން ލިޔުމެއް ކަމަށް ހަމަ މީހަކު ބުނާއިރަށް، އެ ލިޔުމުގެ ފޮރެންސިކް ތަހުގީގެއް ނުހިންގާ އެ މައުލޫމާތު ހިއްސާ ކުރީ ރައްޔިތުންނަށް އޮޅުވާލަން ކަމަށާއި، އެހެން މައުލޫމާތު ހިއްސާ ކޮށްގެން ނުވާނެ ކަމަށް ވިދާޅުވި އެވެ.
އިތުރަށް އޭނާ ވިދާޅުވީ، ފަޒީލާ ބައްދަލުކޮށްފައި ވެސް ނުވާނެ ކަމަށެވެ. ބައްދަލުކުރެއްވި ކަމަށް ބުނެ ވެސް ފުލުހުން ހެދީ ދޮގު ކަމަށް އަކުރަމް ތުހުމަތު ކުރެއްވި އެވެ.
"ބައްދަލު ކުރެއްވި ނަމަ އަޅުގަނޑުމެން އޮފީހުގައި އޮންނާނެ އޭގެ ރެކޯޑް. ޔައުމިއްޔާ ކުރެވިފައި އޮންނާނެ އަޅުގަނޑު މީހުންނާ ބައްދަލުކޮށް ދައްކާ ވާހަކަ. އެހެންވީމަ އެ ހައްދަވަނީ ދޮގެއް،" އަކުރަމް ވިދާޅުވި އެވެ.
ފުލުހުން ބޭއްވި މުޅި ޕްރެސް ބްރީފިން ސިޔާސީ ވެފައިވާ ކަމަށް އަކުރަމް ވިދާޅުވި އެވެ.
އަކުރަމް ވިދާޅުވިއަސް އަދިއެހެން ބޭފުޅަކު ވިދާޅުވިއަސް އުސޫލުން ބޭރުން ކުރާއެއްވެސް ކަމެއްގެރިކޯޑިންއެއް އޮފީހުގަ ނޮއޮންނާނެކަން އިއްޔެގަ ވިހޭކުއްޖާ އައްވެސް އެނގޭނެ. ތެދުހަދަނީ ކޮންފަރާތަކުންކަން ދެނެވޮޑިގެންވޭ ފަރާތެއްވޭ.