އެޗްޑީއެފްސީގެ ބޯޑަށް ކުރީގެ ފިނޭންސް މިނިސްޓަރު ޝަފީގު

ހައުސިން ޑިވެލޮޕްމަންޓް ފައިނޭންސް ކޯޕަރޭޝަން (އެޗްޑީއެފްސީ) ގެ ޑިރެކްޓަރުންގެ ބޯޑަށް ކުރީގެ ފިނޭންސް މިނިސްޓަރު ޑރ. މުހައްމަދު ޝަފީގު އައްޔަންކޮށްފި އެވެ.
ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) ގެ ވެބްސައިޓްގައި ޝާއިއުކޮށްފައިވާ މައުލޫމާތުން އެނގޭ ގޮތުގައި އެ މަގާމަށް ޝަފީގު އައްޔަންކޮށްފައިވަނީ މި މަހުގެ 2 ވަނަ ދުވަހު އެވެ.
މިދިޔަ އަހަރުގެ ނޮވެންބަރު މަހު 17 ވަނަ ދުވަހު ފިނޭންސް މިނިސްޓަރުގެ މަގާމަށް އައްޔަންކުރެއްވި ޝަފީގު އެ މަގާމުން އިސްތިއުފާ ދެއްވީ މިދިޔަ ސެޕްޓެމްބަރު 30 ވަނަ ދުވަހު އެވެ. އެއަށްފަހު އެ މަގާމު ފުރުއްވަމުން ގެންދަވަނީ ކުރީގެ ފޮރިން މިނިސްޓަރު މޫސާ ޒަމީރެވެ.
ބިޒްނަސް އެޑްމިނިސްޓްރޭޝަންގެ ދާއިރާއިން ކެމްބޯޑިޔާގެ އައިއައިސީ ޔުނިވާސިޓީން ޕީއެޗްޑީ ހާސިލުކުރައްވާފައިވާ ޝަފީގަކީ މާލީ ދާއިރާގެ ތަޖުރިބާކާރެކެވެ.
މީގެކުރިން އެޗްޑީއެފްސީގެ ޗީފް ފައިނޭންސަލް އޮފިސަރުގެ މަގާމު ވެސް ފުރުއްވާފައިވާ ޝަފީގު ވަނީ 2019 އިން ފެށިގެން 2023 ގެ ނޮވެންބަރު މަހުގެ 17 ވަނަ ދުވަހުގެ ނިޔަލަށް ހައްޖު ކޯޕަރޭޝަންގެ ބޯޑު މެންބަރުކަން ވެސް ކުރައްވާފަ އެވެ.