ހަށިގަނޑު ތެރޭ ފޮރުވައިގެން ކިލޯއަކަށް ވުރެ ގިނަ ޑްރަގު އެތެރެކުރަން އުޅެނިކޮށް ހުއްޓުވައިފި
ހަށިގަނޑު ތެރޭގައި ފޮރުވައިގެން ރާއްޖެއަށް ކިލޯއަކަށް ވުރެ ގިނަ މަސްތުވާތަކެތި އެތެރެކުރަން އުޅެނިކޮށް ހުއްޓުވައިފި އެވެ.
ފުލުހުން ބުނީ މި މައްސަލަ އާ ގުޅިގެން ބޭރު މީހަކާއި ދިވެއްސެއް ހައްޔަރުކޮށްފައިވާ ކަމަށެވެ. އެ ދެ މީހުން ހައްޔަރުކުރީ މަސްތުވާތަކެތި ރާއްޖެއަށް އެތެރެކޮށް، ބޭނުންކުރުމާއި ގެންގުޅެ ވިޔަފާރި ކުރުމުގެ މައްސަލައިގަ އެވެ.
ކްރިމިނަލް ކޯޓުން އިއްޔެ ނެރުނު ބަންދު އަމުރުން އެނގޭ ގޮތުގައި މައްސަލައިގައި ހިމެނޭ ބްރެޒިލްއަށް ނިސްބަތްވާ މީހާ ހައްޔަރުކޮށްފައި ވަނީ ހަށިގަނޑުގެ ތެރޭގައި މަސްތުވާތަކެތި ރައްކާކޮށްގެން ރާއްޖެއަށް އެތެރެކުރި ކަމަށް ތުހުމަތުކުރެވޭ މައްސަލައެއްގަ އެވެ. މި މައްސަލައިގައި މަސްތުވާތަކެތި ކަމަށް ޝައްކު ކުރެވޭ 107 ބުލެޓް ފެނިފައިވާ ކަމަށާއި އެތަކެތީގެ ވަގުތީ ބަރުދަނުގައި އެއް ކިލޯއަށް ވުރެ ގިނައިން ހުރި ކަމަށް ފުލުހުން ބުނެފައިވާ ކަމަށް އަމުރުގައިވެ އެވެ.
އުމުރުން 44 އަހަރުގެ އެ ފިރިހެން މީހާ ބަންދުގައި ބަހައްޓަން ކޯޓުން އަމުރުކުރީ އޭނާގެ މައްޗަށް ތުހުމަތުކުރެވޭ މިންވަރަށް ހެކި ހުށަހަޅާފައިވާތީ އެވެ. އެގޮތުން މޯލްޑިވްސް ކަސްޓަމްސް ސާވިސްގެ މައްސަލަ ހަވާލުކުރާ ފޯމާއި ސިޓީ ސްކޭން ރިޕޯޓާއި ސީނަށް ދިޔަ ފުލުހެއްގެ ބަޔާނުގެ އިތުރުން މަސްތުވާތަކެތީގެ މަންޒަރު ފެންނަ ފޮޓޯ ރިޕޯޓާއި އިތުރު ހެކި ހުށަހަޅާފައިވާ ކަމަށް ބުނެފައިވެ އެވެ.
ދިވެހި މީހާ ހައްޔަރުކުރީ މި މައްސަލައިގައި ފުލުހުން ހިންގި ކޮންޓްރޯލް ޑެލިވަރީ އޮޕަރޭޝަނެއްގައި އެ ތަކެއްޗާ ހަވާލުވާން ދިޔަ ކަމުގެ ތުހުމަތުގަ އެވެ.
ކޯޓުން އިއްޔެ ނެރުނު ބަންދު އަމުރުގައިވާ ގޮތުން އުމުރުން 39 އަހަރުގެ އެ މީހާގެ ކުޑަކަމުދާތަކެތީގެ ވަގުތީ ނަތީޖާއިން މަސްތުވާތަކެތީގެ ބާވަތެއް ކަމަށްވާ އޭއެމްޕީއަށް ޕޮޒިޓިވްވެފައިވާ ކަމަށް އައިއޯ ބުނެފައިވެ އެވެ. އޭނާގެ މައްޗަށް ހެކި ސާބިތު ކުރުމަށް ސީނަށް ދިޔަ ފުލުހެއްގެ ބަޔާނާއި އިތުރު ހެކި ހުށަހަޅާފައިވެ އެވެ.
މައްސަލައިގައި ވަކީލަކާ އެކު ކުރިއަށްދާން ބޭނުންވާކަން ފާހަގަކޮށްފައިވާތީ، ކްރިމިނަލް ކޯޓުން ވަނީ މި ދެ މީހުން 5 ދުވަހުގެ މުއްދަތަށް ބަންދު ކުރުމަށް އަމުރުކޮށްފަ އެވެ.
