ބީއެމްއެލް ކާޑުން މަހަކަށް ރާއްޖޭން ބޭރުގައި 750 ޑޮލަރު، ރާއްޖޭގައި 250 ޑޮލަރު
ބީއެމްއެލް ޑެބިޓް ކާޑާ ކްރެޑިޓް ކާޑުން ރާއްޖޭން ބޭރުގެ މުއާމަލާތްކުރެވޭނެ އައު އަދަދުތަކެއް ކަނޑައަޅައިފިއެވެ.
ބީއެމްއެލް އިން ނެރެފައިވާ ބަޔާނުގައި ވަނީ ދުނިޔޭގައި ހަލުވިކަމާއެކު ފެތުރެމުންދާ ނުރައްކާތެރި ކޮވިޑު-19 ގެ ސަބަބުން ރާއްޖޭގެ އިޤްތިޞާދަށް ވަރަށް ބޮޑު ހީނަރުކަމެއް ކުރިމަތިވެފައިވާ ކަމަށާއި، މީގެ ސަބަބުން ރާއްޖޭގެ ފަތުރުވެރިކަމުގެ ސިނާއަތުގެ ހަރަކާތްތަކަށް ހުރަސްއެޅި، ބޭރު ފައިސާ ލިބޭ މިންވަރު ވަރަށް ބޮޑަށް ދަށްވުމުގެ ސަބަބުން ޑޮލަރުގެ ލިކިއުޑިޓީ އަށް އެކަމުގެ އަސަރު ވަރަށް ބޮޑަށް ކޮށްފައިވާ ކަމަށެވެ.
މީގެއިތުރުން އެމްއެމްއޭ އިން، ދާދި ފަހަކުން , ބޭންކްތަކަށް އެކަނި ޑޮލަރު ދޫކުރުމަށް ނިންމި ނިންމުމާއި މެދު ކޮންމެ ވެސްވަރެއްގެ ހިތްހަމަޖެހުމެއް ލިބިގެން ދިޔަ ކަމަށާއި، އެހެން ނަމަވެސް ޑޮލަރުގެ ލިކިއުޑިޓީ ދެމެހެއްޓުމަށް ޓަކައި މި ފިޔަވަޅު އަޅަން ޖެހިފައިވާ ކަމަށް ވެސް ބީއެމްއެލްގެ މި ބަޔާނުގައި ވެއެވެ.
ރާއްޖޭން ބޭރަށްދާ ޑޮލަރުގެ އަދަދު ހިފެހެއްޓުމަށާއި، ރާއްޖޭގެ ޒަރޫރީ ބޭނުންތަކަށް މުދާ އެތެރެ ކުރުމުގެ އިތުރުން ރާއްޖޭން ބޭރުގެ ސިއްހީ ހިދުމަތްތަކާއި ތައުލީމް ހޯދުމަށް ދައްކަން ޖެހޭ ފައިސާއަށް އިސްކަން ދިނުމުގެ ގޮތުން ބީއެމްއެލް އަށް މަޖުބޫރު، އެހެނަސް ކޮންމެހެން އަޅަން ޖެހޭ ފިޔަވަޅުތައް އަޅަން ޖެހިފައިވާ ކަމަށްވެސް މި ބަޔާނުގައި ވެއެވެ.
އެހެންކަމުން މިއަދުން ފެށިގެން ބީއެމްއެލް އިން ދޫކޮށްފައިވާ ހުރިހާ ޑެބިޓް އަދި ކްރެޑިޓް ކާޑުތަކުގެ ތެރެއިން ކޮންމެ ކާޑަކުން ވެސް ރާއްޖޭން ބޭރު މުއާމަލާތް ކުރެވޭނެ އަދަދެއްގެ ގޮތުގައި 250 ޑޮލަރު ކަނޑައެޅިފައިވާއިރު، ރާއްޖޭން ބޭރުގެ ދިވެހިންނަށް ބީއެމްއެލް ގެ ފަރާތުން އެހީތެރި ވުމުގެ ގޮތުން މިވަނީ މަހެއްގެ މައްޗަށް 750 ޑޮލަރު ބޭނުން ކުރެވޭނެ ގޮތް ހަމަޖައްސައިދީފައެވެ. މިމުއާމަލާތްތައް ކަނޑައެޅިފައި މިވަނީ ހަމައެކަނި ދިވެހި ރުފިޔާ މެދުވެރިކޮށް ރާއްޖޭން ބޭރުން ކުރާ މުއާމަލާތް ތަކަށެވެ.
ހަމަމިއާއެކު ރާއްޖޭން ބޭރުން ކުރާ ވިޔަފާރިތަކަށް ބޭނުންކުރެވޭ މިންވަރު ކުޑަކުރެވުނު ނަމަވެސް ބޭސް ފަރުވާ އަދި ތައުލީމާއި ގުޅުން ހުރި ކަންކަމަށް ފައިސާ ދެއްކުމަށްޓަކައި ވަގުތީ ލިމިޓެއް ބީއެމްއެލް އިން ކަސްޓަމަރުންނަށް ވަނީ ހަމަޖައްސައިދީފައެވެ. މިގޮތަށް ބޭނުންވާ ކަސްޓަމަރުން ބީއެމްއެލްގެ އިންޓަރނެޓު ބޭންކިންގް މެދުވެރިކޮށް ލިޔެކިޔުންތައް ފޮނުވުމަށް ބީއެމްއެލް އިން ވަނީ އެދިފައެވެ.
ބޭންކް އޮފް މޯލްޑިވްސް އިން ކާޑު ބޭނުންކުރާ ފަރާތްތަކަށް ރާއްޖޭން ބޭރުން ޚަރަދު ކުރުމުގެ މިންގަނޑު ދަށްކުރުމާއި ގުޅިގެން ގިނަބައެއްގެ ފާޑުކިޔުންތައް އަމާޒުވެފައިވާއިރު، ބީއެމްއެލް ގެ މި ބަޔާނުގައި ބުނެފައިވަނީ މި ބަދަލުގެ ސަބަބުން 95 އިންސައްތަ ކަސްޓަަމަރުންނަށް އެކަމުގެ އަސަރު ނުކުރާނެ ކަމަށެވެ. އަދި މިއީ ވަގުތުގެ ހާލަތަށް ބަލައި ނެރެވުނު ވަގުތީ ބަދަލެއް ކަން ވެސް މި ބަޔާނުގައި ފާހަގަ ކޮށްފައިވެއެވެ.
މީގެ އިތުރުން ކޮވިޑު-19 ގެ މި ދަނޑިވަޅުގައި، ދުނިޔެ ވަނީ އިޤްތިޞާދީ އަދި އިޖުތިމާއީ ގޮންޖެހުންތަކާއި ކުރިމަތިލާން ޖެހިފައި ކަމަށާއި، ޑޮލަރުގެ ލިކިއުޑިޓީ އަކީ ދިމާވެފައިވާ ބޮޑުގޮންޖެހުމެއް ކަމުން، ބައިނަލްއަގުވާމީ އިދާރާ ތަކާއި ގުޅިގެން ފަންޑިންގް ހޯދުމަށް ބީއެމްއެލް އިން މަސައްކަތް ކުރަމުން ދާނެކަމަށް އެ ބަޔާނުގައި ފާހަގަ ކޮށްފައިވެއެވެ. އަދި ގައުމީ ބޭންކެއްގެ ހައިސިއްޔަތުން މި ދަަނޑިވަޅުގައިވެސް ދިވެހި ރައްޔިތުންނަށް އެހީތެރި ވެދިނުމުގައި ދެމިއޮންނާނެ ކަމުގެ ޔަގީންކަން ވެސް ބީއެމްއެލް އިން ވަނީ ދީފައެވެ.
