ވީއައިއޭގެ ޓާމިނަލުގެ މަސައްކަތް ހަލުވިކުރަން އިތުރު 40 މިލިއަން ޑޮލަރުގެ ލޯނެއް
ވެލާނާ އިންޓަނޭޝަނަލް އެއާޕޯޓު (ވީއައިއޭ) ގެ އާ ޓާމިނަލުގެ މަސައްކަތް ހަލުވިކުރަން އަބޫދާބީ ފަންޑް ފޯ ޑިވެލޮޕްމެންޓް (އޭޑީއެފްޑީ) އިން އިތުރު 40 މިލިއަން ޑޮލަރުގެ ލޯނެއް ނަގަން އެއްބަސްވެއްޖެ އެވެ.
އާ ޓާމިނަލުގެ މަސައްކަތަކީ ކުރީގެ ރައީސް އަބްދުﷲ ޔާމީނުގެ ވެރިކަމުގައި ވީއައިއޭ ތަރައްގީ ކުރުމަށް ފެށި މަޝްރޫއުގެ ބައެއްގެ ތެރޭގައި ހިމެނިގެން ކުރިއަށް ގެންދާ މަސައްކަތެކެވެ. ޓާމިނަލުގެ މަސައްކަތް ފުރިހަމަ ކުރެވެމުން އަހަރަކު 7.5 މިލިއަން ފަސިންޖަރުންނަށް ހިދުމަތް ދެވޭނެ ކަމަށް ލަފާކުރެ އެވެ.
ސަރުކާރުން އަމާޒު ހިފާފައި ވަނީ އަންނަ އަހަރުގެ މެދު ތެރޭގައި އާ ޓާމިނަލުގެ މަސައްކަތް ނިންމައި ހިދުމަތްދޭން ފެށުމަށެވެ.
ވީއައިއޭގައި ތަރައްގީކުރާ އާ ޓާމިނަލުގެ މަސައްކަތް ހަލުވިކުރަން މީގެކުރިން ވެސް އިތުރު ދެ ލޯނެއް ވަނީ ނަގާފަ އެވެ. އެގޮތުން ސައުދީ ފަންޑް ފޯ ޑިވެލޮޕްމަންޓް (ސައުދީ ފަންޑް) އިން 180 މިލިއަން ޑޮލަރު އަދި އަބޫދާބީ ފަންޑުން 50 މިލިއަން ޑޮލަރުގެ ލޯނުތަކެއް ނެގި އެވެ.
އަބޫދާބީ ފަންޑުން އިތުރު 40 މިލިއަން ޑޮލަރުގެ ލޯނެއް ނެގުމުގެ އެއްބަސްވުމުގައި ރާއްޖޭގެ ފަރާތުން ސޮއިކުރެއްވީ ފިނޭންސް މިނިސްޓަރު މޫސާ ޒަމީރެވެ. އޭޑީއެފްޑީގެ ފަރާތުން ސޮއިކުރައްވާފައި ވަނީ އެ ފަންޑުގެ ޑިރެކްޓަ ޖެނެރަލް މުހައްމަދު ސައިފް އައްސުވައިދީ އެވެ.
އެއްބަސްވުމާ ގުޅޭގޮތުން ޒަމީރު ވިދާޅުވީ ވީއައިއޭ ތަރައްގީ ކުރުމުގެ މަޝްރޫއަކީ ރާއްޖޭގެ ގައުމީ ތަރައްގީގެ އަމާޒަށް ވާސިލުވާން މަގުފަހިވާނެ މަޝްރޫއެއް ކަމަށެވެ. އަދި މަޝްރޫއުގެ ސަބަބުން ފަތުރުވެރިކަމުގެ ސިނާއަތުން ލިބޭ އާމްދަނީ އިތުރުވާނެ ކަމަށެވެ.
ފިނޭންސް މިނިސްޓަރު ވަނީ ރާއްޖޭގެ ތަރައްގީއަށް ޔުނައިޓެޑް އަރަބް އެމިރޭޓްސް (ޔޫއޭއީ) އިން ފޯރުކޮށްދެމުން އަންނަ އެހީތެރިކަމަށް އެ ގައުމަށާ އަދި ހާއްސަކޮށް އަބޫދާބީ ފަންޑަށް ޝުކުރުއަދާކުރައްވާފަ އެވެ.
އޭޑީއެފްޑީގެ ޑިރެކްޓަ ޖެނެރަލް ވިދާޅުވި ގޮތުގައި މި އެއްބަސްވުމުން އެކުވެރި ގައުމުތަކުގެ އުމްރާނީ ތަރައްގީގައި އެ ފަންޑުން އަދާކުރާ ދައުރު އިތުރަށް ހާމަވާ ކަމުގަ އެވެ. ވީއައިއޭގެ ޓާމިނަލް ޒަމާނީ ފެންވަރަށް ތަރައްގީ ކުރެވުމަކީ ރާއްޖެއަށް ލިބޭނެ ބޮޑު ކުރިއެރުމެއްކަން ފާހަގަކުރެއްވި އެވެ. އަދި މި މަޝްރޫއާ އެކު ރާއްޖޭގެ ފަތުރުވެރިކަމުގެ ސިނާއަތަށް އޮތް ޑިމާންޑަށް ކޭޓާކުރުމުގެ ގާބިލުކަން އިތުރުވާނެ ކަމަށް ވެސް ވިދާޅުވި އެވެ.
މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް) އިން މީގެކުރިން ބުނެފައިވާ ގޮތުގައި އާ ޓާމިނަލާ އެކު ދުނިޔޭގެ އެކި މަންޒިލުތަކުން ރާއްޖެއަށް ދަތުރުކުރާ އެއާލައިންތަކުގެ އަދަދު އިތުރުވާނެ ކަމުގަ އެވެ.
