ޕޮލިސް ކާރު އެކްސިޑެންޓް: އޮފިސަރުގެ އިހުމާލެއް އޮތްތޯ ބަލަނީ
ރޭ ހުޅުމާލެ ދެ ވަނަ ފިޔަވަހީގައި ސައިކަލަކާއި ފުލުހުންގެ ކާރެއް ޖެހި ހިނގި ނުރައްކާތެރި އެކްސިޑެންޓުގައި ފުލުސް ކާރު ދުއްވަންއިން އޮފިސަރުގެ އިހުމާލެއްވޭތޯ ތަހުގީގު ކުރަން ފަށައިފި އެވެ.
ފުލުހުން މިއަދު ނެރުނު ނޫސް ބަޔާނެއްގައި ބުނީ ރޭ ދަންވަރު 1:50 އެހާކަންހާއިރު، ހުޅުމާލެ ދެ ވަނަ ފިޔަވަހީގައި، ގުލްއަލާމަގުން އިރުން ހުޅަނގަށް ނިރޮޅު މަގު ހުރަސްކުރަމުންދިޔަ ފުލުހުންގެ އުޅަނދެއްގައި، ނިރޮޅު މަގުން އުތުރުން ދެކުނަށް ބާރު ދުވެލީގައި ދުއްވާފައި އައި ސައިކަލެއް ޖެހި އެކްސިޑެންޓެއް ހިނގާފައިވާ ކަމަށެވެ.
ފުލުހުން ބުނި ގޮތުގައި އެ އެކްސިޑެންޓުގައި ހިމެނޭ ސައިކަލު ދުއްވި މީހާއަށް ބޮޑެތި އަނިޔާތަކެއްވެފައިވާ ކަމުގަ އެވެ. އެކްސިޑެންޓުގައި އަނިޔާވެފައި ވަނީ އުމުރުން 18 އަހަރުގެ ފިރެހެން ކުއްޖަކަށެވެ.
އަނިޔާވި މީހާއަށް ހުޅުމާލެ ހޮސްޕިޓަލުގައި ފަރުވާ ދިނުމަށްފަހު، ހާލަތު ސީރިއަސްވުމާ ގުޅިގެން މިހާރު ފަރުވާ ދެމުންދަނީ އައިޖީއެމްއެޗްގައި ކަމަށް ފުލުހުން ބުންޏެވެ. މިވަގުތު އޭނާއަށް ވެންޓިލޭޓަރުގެ އެހީގައި ފަރުވާދެމުންދާ ކަމަށް އެ ހޮސްޕިޓަލުން ފުލުހުންނަށް މައުލޫމާތު ދީފައިވާ ކަމަށް ބަޔާނުގައިވެ އެވެ.
"މި އެކްސިޑެންޓް ހިނގުމުގައި ފުލުހުންގެ އުޅަނދު ދުއްވި އޮފިސަރުގެ އެއްވެސް އިހުމާލެއް ވޭތޯ ތަހުގީގުގެ ތެރެއިން މި ގެންދަނީ ބަލަމުންނެވެ،"
ފުލުހުން ބުނި ގޮތުގައި ނުރައްކާތެރި އެކްސިޑެންޓްތައް ހިނގުމަކީ އެ ހިދުމަތުން ކަންބޮޑުވާ އަދި ހިތާމަކުރާ ކަމެއް ކަމުގަ އެވެ. އެފަދަ އެކްސިޑެންޓްތައް ހުއްޓުވުމަށާއި މަގުމަތީގެ ރައްކާތެރިކަން ކަށަވަރު ކުރުމަށް، ގިނަ ވަސީލަތްތަކެއް ބޭނުންކޮށްގެން ގިނަގުނަ މަސައްކަތްތަކެއް ކުރަމުން އަންނަކަން ވެސް ފާހަގަކޮށްފައިވެ އެވެ.
