އަލިފާނުގެ ހާދިސާގެ ތަހުގީގަށް އައި އިންޑިއާގެ ޓީމު ފުރައިފި

ސަރުކާރުގެ 3 މިނިސްޓްރީއެއްގައި އަލިފާން ރޯވި ހާދިސާއާ ގުޅިގެން އެ ހާދިސާ ތަހުގީގުކުރަން އިންޑިއާއިން ރާއްޖެ އައި ޓީމު ފުރައިފި އެވެ.

Ads by STELCO

މީޑިއާތަކަށް މިއަދު ފޮނުވި މެސެޖެއްގައި ފުލުހުން ބުނީ އެ ޓީމު ފުރާފައިވަނީ މި މަހުގެ 22 ވަނަ ދުވަހު ކަމަށެވެ.

ފުލުހުން ބުނީ އިންޑިއާގެ ތަޖުރިބާކާރުންގެ ޓީމުން ހާދިސާ ހިނގި ތަން ބަލައި، ތަހުގީގު ފުރިހަމަ ކުރުމަށް ބޭނުންވާ އެންމެހައި ކަންކަން ދިރާސާކޮށްފައިވާ ކަމަށެވެ.

އޭގެ އިތުރުން ހާދިސާއާ ގުޅޭ ފޮޓޯއާއި ވީޑިއޯ އަދި ސީސީޓީވީ ފުޓޭޖްގެ އިތުރުން ހާދިސާއާ ގުޅުންހުރި މުހިންމު މައުލޫމާތުތައް ޓީމާ ހިއްސާކުރެވިފައިވާނެ ކަމަށް ފުލުހުން ބުންޏެވެ. އަދި ފޯރުކޮށްދެވުނު މައުލޫމާތުތަކާއި ތަކެތި ދިރާސާކުރުމަށްފަހު، އެ ޓީމުގެ ހޯދުންތައް ފުލުހުންނާ ހިއްސާކުރުމަށް ހަމަޖެހިފައިވާ ކަމަށް ބުނެފައި އެވެ.

ހައުސިން، ލޭންޑް އެންޑް އާބަން ޑިވެލޮޕްމަންޓް މިނިސްޓްރީ އާއި ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓްރީ އަދި ކްލައިމެޓް ޗޭންޖް، އެންވަޔަރަންމަންޓް އެންޑް އެނާޖީ މިނިސްޓްރީ ހިންގަމުން އަންނަ ގްރީން ބިލްޑިންގައި އަލިފާން ރޯވީ މި މަހުގެ 12 ވަނަ ދުވަހުގެ ހެނދުނު އެވެ.