ސާކް ސްކޮލާޝިފުން ޑޮކްޓަރުކަން ކިޔެވުމުގެ 7 ފުރުސަތަށް ހުޅުވާލައިފި
ސާކް ސްކޮލާޝިފުން ބަންގްލަދޭޝްގައި ޑޮކްޓަރުކަން ކިޔެވުމަށް ލިބިފައިވާ 7 ޖާގައަށް ކުރިމަތިލުމުގެ ފުރުސަތު ހަޔާ އެޑިޔުކޭޝަން، ލޭބަ އެންޑް ސްކިލްސް ޑިވެލޮޕްމަންޓް މިނިސްޓްރީން ހުޅުވާލައިފި އެވެ.
ހަޔާ އެޑިއުކޭޝަން މިނިސްޓްރީން އަންގާރަ ދުވަހު ކުރި އިއުލާނުގައި ހުޅުވާލާފައިވަަނީ ބެޗްލާ އޮފް މެޑިކަލް, ބެޗްލާ އޮފް ސާޖަރީ (އެމްބީބީއެސް) ކިޔެވުމުގެ 6 ފުރުސަތާ އަދި ބެޗްލާ އޮފް ޑެންޓަލް ސާޖަރީ (ބީޑީއެސް) ކިޔެވުމުގެ އެއް ފުރުސަތެވެ.
ކޯހުގެ ޝަރުތުތައް:
- ޖީސީއީ އޯލެވެލް/ އައިޖީސީއެސްސީ/ އެސްއެސްސީ އިމްތިހާނުގެ 5 މާއްދާއިން 'ސީ' އިން ފެށިގެން މަތީ ގްރޭޑެއް 2021 ގައި ނުވަތަ އޭގެފަހުން ހާސިލުކޮށްފައިވުން (އޭގެ ތެރޭގައި ކެމިސްޓްރީ, ބައިލޮޖީ އަދި ފިޒިކްސް ހިމެނުން)
- ޖީސީއީ އޭ ލެވެލް 3 މާއްދާއިން 'ސީ' ގްރޭޑެއް, 2023/2024 ގައި ހާސިލުކޮށްފައިވުން (ކެމިސްޓްރީ, ބައިލޮޖީ އަދި ފިޒިކްސް ހިމެނުން)
- އިނގިރޭސި ފާހެއް ހިމެނުން
- މޯލްޑިވްސް މެޑިކަލް އެންޑް ޑެންޓަލް ކައުންސިލުން ކަނޑައަޅާފައިވާ ޝަރުތުތައް ފުރިހަމަވުން
އިއުލާނުގައި ވަނީ އެދޭ ކޯހުގެ ޝަރުތުތަކުގެ އިތުރުން ތިން ޝަރުތެއް ފުރިހަމަވާން ޖެހޭނެކަން ފާހަގަކޮށްފަ އެވެ. އެއީ:
- މިނިސްޓްރީން ނުވަތަ ކުރިން ޑިޕާޓްމަންޓް އޮފް ހަޔަ އެޑިޔުކޭޝަން މެދުވެރިވެގެން ކިޔެވުމަށް ލޯނެއް ނަގާފައިވާ ނަމަ ޑީފޯލްޓެއް ނެތި އެ ލޯނެއް ގަވާއިދުން ދައްކަމުންދާ ފަރާތެއް ކަމުގައިވުން
- އެދޭ ކޯހަކީ މިހާރު ފުރިހަމަކޮށްފައިވާ ކޯހަކަށް ވުރެ މަތީ ފެންވަރުގެ ކޯހަކަށްވުން
- އެދޭ ކޯހާ އެއް ފެންވަރެއްގެ ކޯހެއް ދައުލަތުގެ ހަރަދުގައި މިހާރު ފުރިހަމަ ކުރަމުންދާ ދަރިވަރެއް ކަމުގައި ނުވުން
އެ އިއުލާނުގައި ބުނެފައިވަނީ ޝަރުތު ހަމަވާ ހުރިހާ ކެންޑިޑޭޓުން މިނިސްޓްރީން ނޮމިނޭޓްކުރާނެ ކަމަށާއި ދަރިވަރުން ހޮވާނީ ބަންގްލަދޭޝް ހެލްތް ޕްރޮޓެކްޝަން އިންސްޓިޓިއުޓް (ބީއެޗްޕީއައި) ގެ ފަރާތުން ކަމަށެވެ.
ހަޔާ އެޑިއުކޭޝަން މިނިސްޓްރީން ބުނީ "މައިއެޑިޔު" ޕޯޓަލް މެދުވެރިކޮށް މި މަހުގެ 14 ވަނަ ދުވަހުގެ 12:00 ގެ ކުރިން އެޕްލިކޭޝަން ހުށަހެޅޭނެ ކަމަށެވެ.
