ކެބިނެޓަށް ބަދަލު ގެންނަނީ ދިރާސާކޮށް، ވެރިކަން ހަރުދަނާކުރަން: އަބްދުއްރަހީމް
މި ސަރުކާރުގައި ކެބިނެޓުގެ މަގާމުތަަކަށް ބަދަލު ގެެނެސްފައި ވަނީ ދިރާސާތައް ކުރުމަށްފަހު ވެރިކަން ހަރުދަނާ ކުރުމުގެ ގޮތުން ކަަމަށް ރައްޔިތުންގެ މަޖިލިހުގެ ރައީސް އަބްދުއްރަހީމް އަބްދުﷲ މިރޭ ވިދާޅުވެއްޖެ އެވެ.
އަބްދުއްރަހީމް އެެހެން ވިދާޅުވީ ދައުލަތުގެ މީޑިއާއިން ގެނެސްދިން "ރާއްޖެ މިއަދު" ޕްރޮގްރާމުގައި ސަރުކާރުގެ ފުރަތަމަ އަހަރު ދުވަހުގެ ތެރޭގައި އެކި މަގާމުތަކަށާއި މިނިސްޓްރީތަކަށް ގެނައި ބަދަލުތަކާ ގުޅިގެން ސަރުކާރު "އަންސްޓޭބަލް" ކަމަށް ބުނެ އިދިކޮޅު ފަރާތްތަކުން ދައްކަމުން އަންނަ ވާހަކަތަކާ ގުޅޭގޮތުން ކުރެއްވި ސުވާލުގެ ޖަވާބުގަ އެވެ.
އަބްދުއްރަހީމް ވިދާޅުވީ ވެރިކަމަށް އަންނަނީ ވެރިކަމުގެ ދަށުގައި ތިބޭ ރައްޔިތުންނަށް ހިދުމަތް ކުރަން ކަމަށެވެ. އެހެންކަމުން ރައްޔިތުންނަށް އެންމެ ފަސޭހައިން ހިދުމަތް ލިބޭނެ މަގަށް ކަންކަން އިންތިޒާމު ކުރުމަކީ ވެރިމީހާގެ މައްޗަށް އޮންނަ ޒިންމާއެއް ކަަމަށެވެ.
މިނިސްޓަރުންގެ މަގާމަށް ބަދަލު ގެންނަން ފެނިވަޑައިގަތުމުން އެ ބަދަލެއް ރައީސް ޑރ. މުހައްމަދު މުއިއްޒު ގެންނަވަމުން ގެންދަވަނީ އެ މަނިކުފާނަށް ގާނޫނު އަސާސީގައި ލިބިދީފައިވާ އިހުތިޔާރުގެ ދަށުން ކަމުގައި ފާހަގަކުރެއްވި އެވެ.
"އެއްގޮތަަކަށް ވެސް ސަރުކާރެއް ސްޓޭބަލް ނުވެގެންނެއް ނޫން ވަޒީރުން ވަކިކުރަނީ. އެއީ ސަރުކާރެއް ސްޓޭބަލްކޮށް ހިންގަން ބޭނުންވާތީ. ސްޓޭބަލްކޮށް ރައްޔިތުންނަށް އެކަށީގެންވާ ގޮތުގައި ހިދުމަތް ފޯރުކޮށްދޭން ބޭނުންވާތީ، ބޭނުންވާ ގޮތަށް މަގުފަހިކުރުމަށް ޓަކައި،" އަބްދުއްރަހީމް ވިދާޅުވި އެވެ.
ވެރިކަން ކުރާ ޕާޓީ، ކޮންގްރެސް ޕާޓީގެ ޗެއާޕާސަން ވިދާޅުވި ގޮތުގައި މަގާމުތަކަށް ބަދަލު ގެނައުމަކީ އަލަށް ކުރާ ކަމެއް ނޫން ކަމުގަ އެވެ. އެ އިހުތިޔާރު ރައީސުލްޖުމްހޫރިއްޔާއަށް ލިބިދީފައި ވަނީ ދިމާވާ ހާލަތަކާ ހުރެ އެ ވަގުތަކަށް އެންމެ ރަނގަޅު މީހާ ލުމުގެ ފުރުސަތު ފަހިކޮށްދިނުމަށް ކަމުގަ އެވެ.
ސަރުކާރު ހިނގަމުންދާއިރު ބަދަލުތައް ގެންނަން ޖެހޭ ހާލަތްތައް އަންނާނެ ކަމަށާއި ބަދަލުތައް ގެންނަނީ އެގޮތުގެ މަތިން ކަމުގައި ފާހަގަކުރެއްވި އެވެ. ހާލަތާ ގުޅިގެން ބަދަލުތައް ނުގެންނަ ނަމަ، އެކަމުގެ ސަބަބުން ލިބޭނެ ގެއްލުންތައް ވެސް ހުންނާނެ ކަމުގައި ވިދާޅުވި އެވެ.
"އެއްގޮތަަކަށް ވެސް މިއީ ސްޓޭބަލްވުމާއި ނުވުމާ ގުޅުން އޮތް ކަމެއް ނޫން. އެެހެން އެ ވިދާޅުވާ ބައެއް ބޭފުޅުންގެ ވެރިކަންތަކުގައި އެބަހުއްޓޭ ތިން ހަތަރު ވަޒީރުން އެއް ވުޒާރާއެއްގެ ބަދަލުވެގެން ގޮސްފައި އެ ބޭފުޅުންގެ ދައުރުގެ ތެރޭގައި،" އަބްދުއްރަހީމް ވިދާޅުވި އެވެ.
އެމަނިކުފާނު ވިދާޅުވީ މިނިސްޓަރުންގެ މަގާމުތަކުގައި އެ ތިއްބަވާ ގޮތެއްގައި ދައުރު ނިމެންދެން ތިއްބެވި ދުވަސް ދެކިވަޑައިގެންފައިވާ ކަަމަށެެވެ. އެއީ ސަރުކާރު "ސްޓޭބަލް" ވުން މިނެކިރަން އޮންނަ މިންގަނޑު ނޫން ކަމަށެވެ. ސަރުކާރެއް "ސްޓޭބަލް" ކަމާ އެކު ހިނގަމުންދާއިރު، މުހިންމު ކަމަކީ އެ ވަގުތަކަށް ގެންނަން ޖެހޭ ބަދަލެއް ގެނައުން ކަމަށެވެ.
"މިނިސްޓްރީއެއް އެގޮތުގައި ހުރެގެން ހިނގަމުން ދިއުންތޯ އެންމެ ރަނގަޅީ، ނޫނީ އެ މިނިސްޓްރީގައި ހުރި މަސައްކަތްތައް ކަމާ ގުޅުންހުރި އެހެން މިނިސްޓްރީތަކަށް ހަދާފައި، އެ މިނިސްޓްރީ މަދުކޮށްލުންތޯ ސަރުކާރަށް އެންމެ ރަނގަޅީ. ދިރާސާތަކަށްފަހު އެކަން އެ ކުރައްވަނީ އެންމެ ރަނގަޅު ގޮތަށް ކުރައްވަން ވެގެން،" އަބްދުއްރަހީމް ވިދާޅުވި އެވެ.
އެގޮތަށް ގެންނަ ބަދަލުތަކުގެ ސަބަބުން ސަރުކާރަށް ލުއިތަކެއް ލިބިގެންދާނެ ކަމުގައި ފާހަގަކުރެއްވި އެވެ.
މި ސަރުކާރުން ކެބިނެޓަށް އެންމެ ފުރަތަމަ ބަދަލު ގެންނެވީ ފިނޭންސް މިނިސްޓަރުގެ މަގާމުގައި ހުންނެވި ޑރ. މުހައްމަދު ޝަފީގު އިސްތިއުފާ ދެއްވުމާ ގުޅިގެންނެވެ. އެކަމާ ގުޅިގެން ފިނޭންސް މިނިސްޓަރުގެ މަގާމަށް ފޮރިން މިނިސްޓަރަކަށް ހުންނެވި މޫސާ ޒަމީރު އަދި ހެލްތު މިނިސްޓަރު ޑރ. އަބްދުﷲ ހަލީލު، ފޮރިން މިނިސްޓްރީއަށް ބަދަލުކުރެއްވި އެވެ. އަދި ހެލްތު މިނިސްޓަރަކަށް އައްޔަންކުރެއްވީ ރައީސް އޮފީހުގެ މިނިސްޓަރަކަށް ހުންނެވި އަބްދުﷲ ނާޒިމެވެ.
ދެ ވަނަ ފަހަރަށް ކެބިނެޓަށް ބަދަލު ގެންނެވީ ހުސްވި މަހުގެ 26 ވަނަ ދުވަހު އެވެ. ހައުސިން، ލޭންޑް އެންޑް އާބަން ޑިވެލޮޕްމަންޓް މިނިސްޓްރީ އުވާލައްވައި، އެ މިނިސްޓްރީގެ މަސައްކަތްތައް ފިނޭންސް މިނިސްޓްރީއަށާއި ކޮންސްޓްރަކްޝަން މިނިސްޓްރީގެ ދަށަށް ބަދަލު ކުރެެއްވި އެވެ.
އެ ބަދަލާ އެކު ފިނޭންސް މިނިސްޓްރީގެ މެންޑޭޓުގެ ތެރެއަށް ޕްލޭނިންގެ ކަންކަން ވަނީ އިތުރުވެފަ އެވެ. މިނިސްޓްރީގެ ހިންގުން ހަވާލުކުރެއްވީ މަގާމުގައި ހުންނެވި މޫސާ ޒަމީރު އާ އެވެ.
ހައުސިން މިނިސްޓްރީ އާއި ކޮންސްޓްރަކްޝަން މިނިސްޓްރީ އެއްކޮށްލައި ކޮންސްޓްރަކްޝަން، ހައުސިން އެންޑް އިންފްރާސްޓްރަކްޗާ މިނިސްޓަރަކަށް ޑރ. އަބްދުﷲ މުއްތޮލިބް އައްޔަންކުރެއްވި އެވެ. ހައުސިން މިނިސްޓަރަކަށް ހުންނެވި ޑރ. އަލީ ހައިދަރު އަހްމަދު ހަޔާ އެޑިއުކޭޝަން މިނިސްޓްރީއަށް ބަދަލުކުރެއްވި އެވެ.
އެ މިނިސްޓްރީ ހިންގެވުމާ ހަވާލުވެ ހުންނެވި ޑރ. މަރްޔަމް މާރިޔާ އެގްރިކަލްޗަ އެންޑް އެނިމަލް ވެލްފެއަ މިނިސްޓަރަކަށް އައްޔަންކުރެއްވި އެވެ. އެކަމަނާ އޭރު ގެންދެވީ އެގްރިކަލްޗަ މިނިސްޓަރަށް އައްޔަންކުރެއްވި ޑރ. އައިޝަތު ރަމީލާ އިސްތިއުފާ ދެއްވުމާ ގުޅިގެން މިނިސްޓްރީ ވަގުތީ ގޮތުން ހިންގަވަމުންނެވެ.
