މާލޭގައި ފެންބޮޑުވެގެން ގެތަކަށް ދެ މިލިއަނަށް ވުރެ ގިނަ ރުފިޔާގެ ގެއްލުންވި: އެންޑީއެމްއޭ
މިފަހުން ކުރި ވިއްސާރައިގައި ވެރި ރަށް، މާލެ ސިޓީގައި ފެންބޮޑުވުމާ ގުޅިގެން ގެތަކަށް ދެ މިލިއަން ރުފިޔާއަށް ވުރެ ބޮޑު ގެއްލުމެއް ލިބިފައިވާ ކަމަށް ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން މިއަދު ބުނެފި އެވެ.
މިދިޔަ ހުކުރު ދުވަހު ހުއްޓާނުލައި ވެހުނު ވާރޭގައި މާލޭގެ އެކި ސަރަހައްދުތަކުގައި ވަރަށް ބޮޑަށް ފެންބޮޑުވެ، ގޭގެއަށާއި ފިހާރަތަކާ އަދި މަސައްކަތްކުރާ ތަންތަނަށް ފެންވަދެ ބޮޑެތި ގެއްލުންތަކެއް ވަނީ ވެފަ އެވެ. ހަ ސަރަހައްދެއްގައި 17 ޕަމްޕް ބޭނުންކޮށްގެން ފެންހިންދުމުގެ މަސައްކަތް އެމްއެންޑީއެފުން ކުރިއިރު އަމިއްލަ ފަރާތްތަކުންނާއި އާންމު ފަރުދުން ވެސް ހަރަކާތްތެރިވެފައިވެ އެވެ.
ގައުމީ މޫސުމާ ބެހޭ އިދާރާ، މެޓް އޮފީހުން ބުނެފައިވާ ގޮތުން ހުކުރު ދުވަހުގެ ރޭ 11 ޖެހުމާ ހަމައަށް މާލެއަށް 162 މިލިމީޓަރުގެ ވާރޭ ވެހިފައިވެ އެވެ. މާލޭ މަގުތަކުން ފެން ހިންދުމަށް އެ ދުވަހުގެ ހެނދުނު 11:37 ހާއިރުން ފެށިގެން ކުރަމުން ދިޔަ މަސައްކަތުން ހޮނިހިރު ދުވަހުގެ ހެނދުނު 08:30 އަށް މަގުތައް އާންމު ހާލަތަށް ގެނެވިފައިވާ ކަމަށް އެމްއެންޑީއެފުން ބުނެފައިވެ އެވެ. އެ އޮޕަރޭޝަނުގައި 30،569 ޓަނުގެ ފެން ބޭރުކޮށްފައިވާ ކަމަށް ބުންޏެވެ.
ފެންބޮޑުވެ، ގެއްލުން ލިބެމުންދާތީ މާލެ ސިޓީ ކައުންސިލާއި ފުލުހުންނާއި ސިފައިންނާއި ލޯކަލް ގަވާމެންޓް މިނިސްޓްރީގެ އިތުރުން ދިވެހި ސްކައުޓުން ވެލި ބަސްތާ ޖެހުމުގެ މަސައްކަތް ވަނީ ކޮށްފަ އެވެ. އެ އޮތޯރިޓީން ބުނެފައި ވަނީ އެކި އެހީތަކަށް އެދި 774 ތަނަކުން ރިޕޯޓްކުރި ކަމަށެވެ. އޭގެކުރިން 554 ރިކުއެސްޓަކީ ވެލި ބަސްތާ ޖެހުމަށް އެދި ކުރި ރިޕޯޓުތައް ކަމަށެވެ.
ޒަރޫރީ ބޭނުންތަކަށް ހުރަސް އެޅިގެން ރިޕޯޓުކުރި 53 ގެއެއްގެ ރެޕިޑް އެސެސްމެންޓް ހެދުމަށްފަހު އާންމު ދިިރިއުޅުމަށް ހުރަސްއެޅޭ ހާލަތުގައިވާ 36 ގޭބީސީގެ 226 މީހުންނަށް ވަގުތީ ބޯހިޔާވަހިކަމާއި ކެއިންބުއިން ވަނީ ފޯރުކޮށްދީފަ އެވެ.
އެންޑީއެމްއޭއިން ބުނެފައިވާ ގޮތުގައި ޑެމޭޖް އެސެސްމަންޓް ހަދަން ޖެހޭ ކަމަށް އެ އޮތޯރިޓީއަށް ފާހަގަކުރެވުނު 141 ގޭގެ ތެރެއިން 112 ގޭގެ އެސެސްމަންޓް މިހާތަނަށް ހަދާފައިވާ ކަމަށެވެ. އަދި 13 ގެއަކުން އެސެސްމަންޓް ހަދަން ބޭނުންނުވާކަން އަންގާފައިވާ ކަމަށެވެ.
އެންޑީއެމްއޭގެ ޗީފް އެގްޒެކެޓިވް ހިސާން ހަސަން "ދެން" އަށް ވިދާޅުވީ ވިއްސާރައިގައި ފެންބޮޑުވުމާ ގުޅިގެން ދެ މިލިއަން ރުފިޔާއަށް ވުރެ ބޮޑު ގެއްލުމެއް މާލެ ސިޓީއަށް ލިބުނު ކަމަށެވެ. ހާދިސާ އާ ގުޅިގެން ހަދަމުން އަންނަ އެސެސްމެންޓުގެ މަސައްކަތް އަދި އެއްކޮށް ނިމިފައި ނުވާ ކަމުގައި ފާހަގަކުރެއްވި އެވެ.
އިތުރަށް ބުނެފައިވާ ގޮތުގައި ފެންބޮޑުވުމުގެ ސަބަބުން ވަގުތީ ބޯހިޔާވަހި ކަމަށް ބޭނުންވި ފަރާތްތަކަށް ދެ ދުވަހުގެ މުއްދަތަށް އެހީތެރިކަން ފޯރުކޮށްދީފައިވާ ކަމުގަ އެވެ.
އެސެސްމަންޓް ހެދުމުގެ މަސައްކަތުގައި އެ އޮތޯރިޓީގެ އިތުރުން ސޯޝަލް އެންޑް ފެމެލީ ޑީވެލޮޕްމަންޓާއި ދިވެހި ރެޑްކްރެސެންޓުން ވަނީ ބައިވެރިވެފަ އެވެ.
