ތިމަރަފުށްޓާއި ފޮނަދޫގައި ޓޫރިސްޓް ހޮޓާ ތަރައްޤީކޮށް ހިންގާނެ ބަޔަކު ހޯދަނީ
ތިމަރަފުށްޓާއި ފޮނަދޫގައި ޓޫރިސްޓް ހޮޓާ ތަރައްޤީކޮށް ހިންގާނެ ފަރާތްތައް ހޯދުމަށް ފަތުރުވެރިކަމާ ބެހޭ ވުޒާރާއިން ބީލަމަށް ހުޅުވާލައިފިއެވެ.

ތ. ތިމަރަފުށްޓާއި ލ. ފޮނަދޫގައި ޓޫރިސްޓް ހޮޓާ ތަރައްޤީކޮށް ހިންގާނެ ބަޔަކު ހޯދުމަށް ފަތުރުވެރިކަމާއި މަދަނީ އުދުހުންތަކާ ބެހޭ ވުޒާރާއިން އިޢުލާންކޮށްފިއެވެ.
އެ ވުޒާރާއިން ބުނި ގޮތުގައި ތިމަރަފުށިން މިކަމަށް ކަނޑައަޅާފައި ވަނީ 26,480.67 އަކަމީޓަރުގެ ބިމެކެވެ. މީގެ އިތުރުން ފޮނަދޫގައި ފަތުރުވެރިކަން ތަރައްޤީކުރުމަށް ކަނޑައަޅާފައިވާ ބިންތަކުގެ ތެރެއިން ތިން ބިމެއްގައި ހޮޓާ ތަރައްޤީކުރަން ވަނީ ހުޅުވާލާފައެވެ.
މި ބީލަންތަކާ ގުޅޭ މަޢުލޫމާތު ދިނުމުގެ ބައްދަލުވުންތައް އަންނަ މަހުގެ 1 އަދި 17ވަނަ ދުވަހު މައިކްރޮސޮފްޓް ޓީމްސް މެދުވެރިކޮށް ބޭއްވުމަށް ވަނީ ހަމަޖެހިފައެވެ. މި ބައްދަލުވުންތަކުގައި ބައިވެރިވާން ބޭނުންވާ ފަރާތްތަކުން މި މަހުގެ 30 ނުވަތަ އަންނަ މަހުގެ 16ގެ ކުރިން އީމެއިލް މެދުވެރިކޮށް ރަޖިސްޓްރީ ކުރަން ޖެހެއެވެ.
ބީލަން ފޮތް ގަތުމުގެ ފުރުސަތު މި މަހުގެ 22އިން ފެށިގެން އަންނަ އަހަރުގެ ޖެނުއަރީ 6ވަނަ ދުވަހުގެ ނިޔަލަށް ވަނީ ހުޅުވާލާފައެވެ. ސަރުކާރު ބަންދު ނޫން ކޮންމެ ދުވަހެއްގެ ހެނދުނު 9:00އިން މެންދުރު 13:00އާ ދެމެދު [email protected] އަށް އީމެއިލް ކުރުމުން ބީލަން ފޮތް ލިބޭނެ ކަމަށް ވެސް އެ ވުޒާރާއިން ބުނެއެވެ.
މި ބީލަމާ ގުޅޭ އިތުރު މަޢުލޫމާތު ސާފުކުރަން ބޭނުންވާ ފަރާތްތަކަށް 2027 ޖެނުއަރީ 5ވަނަ ދުވަހުގެ މެންދުރު 1:00ގެ ކުރިން އެ ފުރުސަތު އޮންނާނެ ކަމަށް ވެސް ފަތުރުވެރިކަމާ ބެހޭ ވުޒާރާގެ އިޢުލާނުގައި ބަޔާންކޮށްފައިވެއެވެ.





ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.