ޗައިނާގެ އެޗްއެމްޕީވީ ކޭސްތަކާ ގުޅިގެން ކަންބޮޑުވުން އުފެދިއްޖެ
ޗައިނާގައި ހިއުމަން މެޓަޕްނިއުމޯވައިރަސް (އެޗްއެމްޕީވީ) ގެ ކޭސްތައް އިތުރުވަމުން ދިޔުމާ ގުޅިގެން ދުނިޔޭގެ އެކި ކަންކޮޅުތަކުގައި އުފުދިފައިވާ ބިރުވެރިކަމަކީ ބޮޑުކަމެއްކަމަށް ސިއްހީ މާހިރުން ވިދާޅުވެއްޖެ އެވެ.
މި ބިރުވެރިކަން އުފެދިފައިވަނީ ކޮވިޑް-19 ގެ ބަލިމަޑުކަމުގެ ސަބަބުން މީހުންގެ ހިތްތަކުގައި އަދިވެސް އޮތް ނުތަނަވަސްކަމުގެ ސަބަބުންކަމަށް ބެލެވެއެވެ.
ވޮޝިންގްޓަންގެ ރިޕޯޓުގައި ބުނީ އެޗްއެމްޕީވީ އަކީ އާންމުކޮށް ފެންނަ ވައިރަހެއް ކަމަށާއި، ގިނަފަހަރު މި ބަލީގެ އަލާމާތްތަކަކީ އާދައިގެ ރޯގާއެއްގެ އަލާމާތްތަކާ އެއްގޮތް ކަމަށެވެ. ނަމަވެސް ކުޑަކުދިންނާއި، ދުވަސްވީ މީހުންނާއި، ބަލިކަށި މީހުންނަށް މި ބައްޔަކީ ނުރައްކާތެރި ވެދާނެ ބައްޔެއް ކަމަށް ރިޕޯޓުގައި ބުނެ އެވެ.
މި ބަލީގެ ފެތުރުން ހުއްޓުވުމަށް ޗައިނާގެ ސަރުކާރުން އަޅަމުންދާ ފިޔަވަޅުތަކާ ގުޅޭގޮތުން ބައިނަލްއަގްވާމީ ސިއްހަތު ޖަމިއްޔާ (ޑަބްލިޔު.އެޗް.އޯ) އިން ބުނީ މި ފިޔަވަޅުތައް އެކަށީގެންވާ ކަމަށެވެ. އަދި މި ބަލި ދުނިޔޭގެ އެހެން ގައުމުތަކަށް ފެތުރުމުގެ ނުރައްކާ ކުޑަކަމަށް ޑަބްލިޔު.އެޗް.އޯ އިންވެސް ބުނެފި އެވެ.
ނަމަވެސް، ކޮވިޑް-19 ގެ ބަލިމަޑުކަމުގެ ތަޖުރިބާގެ ސަބަބުން، ގިނަ ބަޔަކު މިފަދަ ސިއްހީ ނުރައްކާތަކާ މެދު ވަރަށް ބޮޑަށް ސަމާލުވެފައިވާކަމަށް ފާހަގަކުރެ އެވެ. މިކަމުގެ ސަބަބުން، އެޗްއެމްޕީވީ އާ ގުޅޭ މައުލޫމާތުތައް އިޖުތިމާއީ މީޑިއާގައި ވަރަށް ބާރު ސްޕީޑެއްގައި ފެތުރެމުންދާކަން ވެސް ފާހަގަކުރެ ވެއެވެ.
ސިއްހީ މާހިރުން އާންމުންނަށް އިލްތިމާސްކުރައްވަނީ ބޭކާރު ބިރުވެރިކަމެއް ނުގެންގުޅުމަށާއި، އަތްދޮވުމާއި، ކެއްސާއިރު އަނގަ ނިވާކުރުން ފަދަ އާންމު ސިއްހީ ރައްކާތެރިކަމުގެ ފިޔަވަޅުތައް އެޅުމަށެވެ. އަދި ބަލީގެ އަލާމާތެއް ފެނިއްޖެނަމަ ލަސްނުކޮށް ޑޮކްޓަރަކަށް ދެއްކުމަށް ވެސް އެ ފަރާތްތަކުން ލަފާދެއްވައެވެ.
Ads by STO
