މެމްބަރު ޒިޔާދަށް ނޭނގި ޕީއެންސީއަށް ވައްދައިފި، ތަހުގީގު ކުރަން ގޮވާލައިފި
ރައްޔިތުންގެ މަޖިލިހުގެ ވައިކަރަދޫ ދާއިރާގެ މެމްބަރު ހުސައިން ޒިޔާދުގެ ނަން މަތީގައި ވަގު ފޯމެއް ފުރައި ވެރިކަން ކުރާ ޕީޕަލްސް ނޭޝަނަލް ކޮންގްރެސްއަށް ވެއްދި މައްސަލަ ސީރިއަސް މައްސަލައެއްގެ ގޮތުގައި ތަހުގީގު ކުރުމަށް ކަމާ ގުޅުންހުރި އިދާރާތަކަށް، މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އިން ގޮވާލައިފި އެވެ.
އެމްޑީޕީން މިއަދު ނެރުނު ނޫސް ބަޔާނެއްގައި ބުނީ ކޮންގްރެސް ޕާޓީއަށް ވަނުމަށް ފޯމު ފުރާފައި ނުވާ އެ ޕާޓީގެ ބައެއް އާންމު މެމްބަރުންނާއި ގައުމީ މަޖިލީހުގެ މެމްބަރުން ވެސް އެމްޑީޕީގެ ދަފްތަރުން އުނިކޮށް ކޮންގްރެސް ޕާޓީގައި ހިމަނާފައިވާ ކަމަށެވެ. އެ މައްސަލަ އިލެކްޝަންސް ކޮމިޝަން (އީސީ) ގެ ސަމާލު ކަމަށް އެ ޕާޓީން އެކި ފަހަރު މަތިން ގެނެސްފައިވާ ކަމަށެވެ.
އެ މައްސަލައިގައި އީސީ އާއެކު ބޭއްވި ބައްދަލުވުމުގައި ވަގު ފޯމެއް ބަލައިގަނެ، މަޖިލިހުގެ މެމްބަރެއްގެ ޕާޓީ އީސީން ބަދަލުކޮށްފި ނަމަ އެ މެމްބަރެއްގެ ގޮނޑި ގެއްލުމުގެ ފުރުސަތު ގާނޫނު އަސާސީއަށް މިފަހުން ގެނައި ބަދަލާ އެކު އޮތްކަމުގެ ކަންބޮޑުވުން ހިއްސާކުރި ކަމަށް އެމްޑީޕީން ބުންޏެވެ.
އަދި ރައީސް ޑރ. މުހައްމަދު މުއިއްޒު ވިދާޅުވެފައިވާ ގޮތަށް ކޮންގްރެސް ޕާޓީއަށް އެއް ލައްކަ މެމްބަރުން ހަމަކުރަން ކަމަށް ބުނެ، މީހުންގެ ސޮއި ފޯޖުކޮށްގެން ހުށަހަޅަމުންދާ ފޯމުތައް ޕްރޮސެސް ކުރުން ހުއްޓާލުމަށް ވެސް އީސީގައި އެދިފައިވާނެކަން ވެސް ފާހަގަކުރި އެވެ.
"މި ހުރިހާ ކަންބޮޑުވުންތަކެއް ހިއްސާކޮށްފައި ވަނިކޮށް އީސީގެ ތެރެއިން ރައްޔިތުންގެ މަޖިލީހުގެ މެމްބަރެއްގެ ނަމުގައި ހުށަހެޅި ވަގު ފޯމެއް އެޕްރޫވް ވެގެންދިޔުމަކީ ބަލައިގަނެވޭނެ ކަމެއް ނޫނެވެ،"
މައްސަލައިގައި މެމްބަރު ޒިޔާދުގެ ނަމުގައި ހުށަހެޅި ވަގު ފޯމުގެ ކޮޕީއެއް ހޯދުމަށް މިއަދު މެންދުރުފަހު 2:00 ގައި އެ ޕާޓީން އީސީއަށް ދިޔުމަށް ނިންމާފައިވާ ކަމަށް ވެސް ބަޔާނުގައިވެ އެވެ.
އެމްޑީޕީން ވަނީ ޑިޕާޓްމަންޓް އޮފް ނޭޝަނަލް ރެޖިސްޓްރޭޝަން (ޑީއެންއާރު) ގެ ޑޭޓާބޭސްއިން ވެރިކަން ކުރާ ޕާޓީން ކުރަމުންދާ ވައްކަންތައް ހުއްޓުވުމަށާއި ދައުލަތުގެ އިދާރާތަކަށް ނުފޫޒު ފޯރުވައި އެ ޕާޓީއަށް މެމްބަރުން އިތުރުކުރަން ކުރަމުންދާ މަސައްކަތްތައް ތަހުގީގުކޮށް ފިޔަވަޅު އެޅުމަށް ކަމާ ގުޅުންހުރި އިދާރާތަކަށް ގޮވާލާފަ އެވެ.
