އިންޑިއާގެ ބޮޑުވަޒީރު ފްރާންސްގައި ބާއްވާ އޭއައި ސަމިޓްގައި ބައިވެރިވަނީ
އިންޑިއާގެ ބޮޑުވަޒީރު ނަރެންދްރަ މޯދީ ފްރާންސްގައި ބާއްވާ އޭއައި ސަމިޓްގައި ބައިވެރިވާން ހަމަޖެހިފައިވާ ކަމަށް ފްރާންސްގެ ރައީސް އެމުނުއެލް މެކްރޯން ވިދާޅުވެއްޖެ އެވެ.
ފްރާންސްގެ ރައީސް ވިދާޅުވީ މޯދީ މި އަންނަ މަހުގެ 10 އަދި 11 ވަނަ ދުވަހު ފްރާންސްގައި ބާއްވާ "އާޓިފިޝަލް އިންޓެލިޖެންސް އެކްޝަން ސަމިޓް" ގައި ބައިވެރިވެ ވަޑައިގަންނަވާނެ ކަމަށެވެ.
މެކްރޯން ވިދާޅުވީ މި ސަމިޓަކީ އާޓިފިޝަލް އިންޓެލިޖެންސް (އޭއައި) ޓެކްނޮލޮޖީގެ ސަބަބުން ކުރިމަތިވެދާނެ ނުރައްކާތަކާ ބެހޭގޮތުން މަޝްވަރާކުރުމަށް ބޭއްވޭ މުހިންމު ބައްދަލުވުމެއް ކަމަށެވެ. މި ބައްދަލުވުމުގައި ދުނިޔޭގެ އެކި ގައުމުތަކުގެ ލީޑަރުންނާއި، ޓެކްނޮލޮޖީ ދާއިރާގެ ފަންނުވެރިން އަދި ސިވިލް ސޮސައިޓީގެ މަންދޫބުން ބައިވެރިވެ ވަޑައިގަންނަވަން ހަމަޖެހިފައިވާ ކަމަށްވެސް ފްރާންސްގެ ރައީސް ވިދާޅުވި އެވެ.
މީގެ އިތުރުން މެކްރޯން ވިދާޅުވީ މި ސަމިޓުގައި އޭއައި ޓެކްނޮލޮޖީ ތަރައްގީކުރުމުގައި ގެންގުޅެންޖެހޭ އުސޫލުތަކާއި، މި ޓެކްނޮލޮޖީ ބޭނުންކުރުމުގައި ހިފަހައްޓަންޖެހޭ އަހްލާގީ މިންގަނޑުތަކާ ބެހޭގޮތުން މަޝްވަރާކުރެވޭނެ ކަމަށެވެ. އަދި އޭއައި ޓެކްނޮލޮޖީގެ ސަބަބުން ކުރިމަތިވެދާނެ ގޮންޖެހުންތަކަށް ހައްލު ހޯދުމަށް މަސައްކަތްކުރެވޭނެ ކަމަށްވެސް އެމަނިކުފާނު ވިދާޅުވި އެވެ.
އިންޑިއާގެ ބޮޑުވަޒީރު މޯދީ މި ސަމިޓުގައި ބައިވެރިވެ ވަޑައިގަތުމަކީ، އިންޑިއާއާއި ފްރާންސްއާ ދެމެދު އޮތް ގުޅުން އިތުރަށް ބަދަހިވެގެންދާނެ ކަމެއް ކަމަށް ބެލެވެ އެވެ. އަދި އޭއައި ޓެކްނޮލޮޖީ ތަރައްގީކުރުމުގައި އިންޑިއާގެ ދައުރު އިތުރަށް ފުޅާވެގެންދާނެ ކަމަށްވެސް ލަފާކުރެވެ އެވެ.
