އާސަންދައިން ތައިލެންޑާއި ޔޫއޭއީއަށް ބޭސްފަރުވާގެ ހިދުމަތް ފުޅާކޮށްފި
އާސަންދައިގެ ދަށުން ހިދުމަތް ދިނުމަށް އެމްޕެނަލްވެފައިވާ ތައިލެންޑް އަދި ޔުނައިޓެޑް އެރެބް އެމިރޭޓްސް (ޔޫއޭއީ) ގެ ހޮސްޕިޓަލްތަކުން މިއަދުން ފެށިގެން އާސަންދަ ސްކީމުގެ ހިދުމަތްދޭ ގޮތަށް ހުޅުވާލައިފި އެވެ.
އާސަންދައިން ބުނީ ހޮސްޕިޓަލްތަކަށް ހިދުމަތް ދިނުމަށް ފޮނުވާނީ ހުސްނުވާ އާސަންދަ ސްކީމް ހިންގުމުގެ ގަވާއިދުގެ ދަށުން މިހާރު ވެސް ރާއްޖެއިން ބޭރުގެ ހޮސްޕިޓަލްތަކުން ހިދުމަތް ދިނުމަށް އަމަލުކުރާ ނިޒާމުގެ ތެރެއިން ކަމަށެވެ.
ތައިލެންޑް އަދި ޔޫއޭއީގެ އާސަންދަ ހިދުމަތް ފޯރުކޮށްދޭ މަރުކަޒުތަކަށް ބަލިމީހުން ރިފަކުރަން ފެށޭއިރު، ފުރަތަމަ އިސްކަން ދިނުމަށް ހަމަޖެހިފައި ވަނީ ކިޑްނީ ޓްރާންސްޕްލާންޓް ކުރުމަށް ބޭނުންވާ ބަލި މީހުންނަށް ކަމަށް އާސަންދައިން ބުންޏެވެ.
އެއީ "ފަސްޓް ޑިގްރީ ޑޯނަ" އެއް (އާއިލާގެ ތެރެއިން ކިޑްނީ ޑޮނޭޓްކުރާނެ ފަރާތެއް) ނުލިބުމުގެ ސަބަބުން ކިޑްނީ ޓްރާންސްޕްލާންޓް ނުކުރެވި، އެކަމުގެ ވޭން ތަހައްމަލު ކުރަމުންދާ ފަރާތްތަކެވެ. އަދި މިހާތަނަށް އާސަންދައަށް އެމްޕެނަލް ކުރެވިފައިވާ ގައުމުތަކުގެ އުސޫލުތައް ކަނޑައެޅިފައިވާ ގޮތުން، ކިޑްނީ ޑޯނަރަކީ "ފަސްޓް ޑިގްރީ ޑޯނަ" އަކަށްވުން އެ ގައުމުތަކުގެ ގާނޫނާ ގަވާއިދުތަކުން ލާޒިމުވާތީވެ، ފަރުވާ ކުރިއަށް ގެންދެވިފައިނުވާ ފަރާތްތައްކަން ވެސް ފާހަގަކުރި އެވެ.
އާސަންދައިން ބުނި ގޮތުގައި ސްކީމަށް އިތުރުކުރެވޭ އެމްޕެނަލްމަންޓާ އެކު މިފަދަ ހާލަތުގައިވާ ފަރާތްތަކަށް ކިޑްނީ ޓްރާންސްޕްލާންޓް ކުރުމުގެ މަގުފަހިވެގެންދާނެ ކަމުގަ އެވެ.
ދެވަނަ ބަޔަކީ، ރާއްޖެ، އިންޑިއާ ނުވަތަ ސްރީ ލަންކާގެ މަރުކަޒެއް މެދުވެރިކޮށް، އެތައް ފަހަރެއްގެ މަތިން ފަރުވާ ދެވުނު ނަމަވެސް އެ ފަރާތެއްގެ ބަލި ހާލަތަށް ކުރިއެރުމެއް ނުލިބި، ބަލި ތަހައްމަލު ކުރަމުންދާ ފަރާތްތައް ކަމުގަ އެވެ. އެފަދަ ފަރާތްތަކަށް ކަމާ ބެހޭ ޑޮކްޓަރުންގެ ޓީމުގެ ފަންނީ ލަފަ އާއެކު ބަލިމީހާ ރިފަ ކުރާނެ މަރުކަޒު އެ ކުންފުނިން ކަނޑައަޅައި، ބޭނުންވާ ބޭސްފަރުވާއަށް އެހީ ފޯރުކޮށްދެވޭނެ ކަމަށް އާސަންދައިން ބުންޏެވެ.
ތައިލެންޑާއި ޔޫއޭއީއަށް އާސަންދަ ސްކީމުގެ ހިދުމަތް ފުޅާވެގެންދާއިރު، އެ ދެ ބަޔަށް އިސްކަންދިނުމާ އެކު، ކުރިއަށް އޮތް ތަނުގައި އިތުރު ބައިތަކަށް ހިދުމަތް ފުޅާކުރާނެކަން އެ ކުންފުނިން ފާހަގަކުރި އެވެ.
އާސަންދައިން ބުނީ ސްކީމުގެ ދަށުން ރާއްޖެއިން ބޭރުން ފަރުވާ ހޯދުމަށް އެދި ހުށަހަޅާނީ މިހާރު ވެސް އެ ހިދުމަތަށް އެދޭ ގޮތަށް ކަމަށެވެ. އެގޮތުން އާސަންދަ މޯބައިލް އެޕުންނާއި މައި އާސަންދަ ޕޯޓަލުން އޮންލައިންކޮށް އެޕްލިކޭޝަން ހުށަހެޅޭނެ ކަމަށެވެ. އަދި ހޮސްޕިޓަލުތަކުގައި ގާއިމުކުރެވިފައިވާ ވިރަ ކައުންޓަރުތަކަށާއި އާސަންދަ ފްރަންޓް އޮފީހުގެ ކައުންޓަރަށް ވެސް އެޕްލިކޭޝަން ހުށަހެޅޭނެ ކަމަށެވެ.
